បន្ទាយមានជ័យ ៖ ជនសង្ស័យម្នាក់រូបរាងស្អាតបាត នឹងគេដែរ តែចិត្តសាហាវជាងសត្វខ្លាទៅទៀត មួយថ្ងៃៗមិនគិតរកស៊ីចិញ្ចឹមប្រពន្ធកូននោះទេ គិតតែពីដើរជក់គ្រឿងញៀន ពេលត្រឡប់មកដល់ផ្ទះវិញរករឿងប្រពន្ធមិនឈប់ឈានដល់ចង់សម្លាប់ប្រពន្ធចោលទៀត។
ដោយទ្រាំនឹងការធ្វើបាបពីប្ដីខ្លាំងពេក មិនបាន ក៏រត់ទៅប្ដឹងអាវុធហត្ថក្រុងប៉ោយប៉ែត ក្រោយពីទទួលបានពាក្យបណ្ដឹង ហើយ កម្លាំងមូលដ្ឋានកងរាជអាវុធហត្ថក្រុង ដឹកនាំដោយលោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុងប៉ោយប៉ែត បានចុះបង្ក្រាបឃាត់ខ្លួនជនសង្ស័យបានចំនួន១នាក់ ។
នៅវេលាម៉ោង៤ល្ងាចថ្ងៃទី២៨ ខែមីនា ឆ្នាំ២០១៩ នៅចំណុចភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បន្ទាប់ពីធ្វើការឃាត់ខ្លួនជនសង្ស័យហើយក៏ បញ្ជូនមកទីបញ្ជាការកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌ បានឲ្យដឹងថា ជនរងគ្រោះមានឈ្មោះ អឿន ណាក់ ភេទ ស្រី អាយុ ៣៧ឆ្នាំ ត្រូវជាប្រពន្ធរបស់ជនសង្ស័យ ឈ្មោះឃួន ហាន ភេទ ប្រុស អាយុ ៣៨ឆ្នាំ។ គ្រួសារនេះរស់នៅភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ទោ ព្រហ្ម ថេងបានបញ្ជាក់ឲ្យដឹងទៀតថា តាមការរៀបរាប់របស់ប្រពន្ធថា ប្តីរបស់ខ្លួនជាមនុស្សញៀនគ្រឿងញៀនជារៀងរាល់ថ្ងៃ ឲ្យតែខ្លួនមកពីធ្វើការតែងតែរករឿងមិនចេះឈប់។
នៅមុនពេលកើតហេតុនោះ ខ្លួនបានត្រឡប់មកពីធ្វើការវិញ ស្រាប់តែរករឿងឈ្លោះហើយបានប្រើហិង្សាមកលើខ្លួន និងបានយកកាំបិតផ្គាក់មកគំរាមសម្លាប់ទៀតផងរហូតដល់ខ្លួនមិនហ៊ាននៅផ្ទះ ព្រោះខ្លាចប្តីសម្លាប់តាមការគំរាមក៏រត់មកដាក់ពាក្យប្តឹងតែម្តង។
ចំណែកជនសង្ស័យបានឆ្លើយសារភាពថា ខ្លួនពិតជាចង់សម្លាប់ប្រពន្ធពិតប្រាកដមែន ដោយសារតែខ្លួនខឹងប្រពន្ធទៅធ្វើការយូរពេកត្រឡប់មកផ្ទះយឺតពេល។ លោកវរសេនីយ៍ទោ ព្រហ្ម ថេង បានបញ្ជាក់បន្ថែមទៀតថាផ្អែកលើចម្លើយសារភាពរបស់ជនសង្ស័យតាមការបំភ្លឺរបស់ជនរងគ្រោះ ឃើញថាមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ អាចត្រូវចោទពីបទ ហិង្សាប្រព្រឹត្តដោយសហព័ទ្ធ និងប្រើប្រាស់សារធាតុញៀនដោយខុសច្បាប់ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាងទៅតុលាការដើម្បីចាត់ការទៅតាមច្បាប់៕
Source: Kampuchea Thmey Daily
0 Comments