ភ្នំពេញ ៖ ទីតាំងបើកហ្គេមបាញ់ត្រីមួយកន្លែងទៀត ដែលហ៊ានបើកលេងផ្គើននឹងការហាមឃាត់របស់អាជ្ញាធរនោះ ត្រូវបានកម្លាំងខណ្ឌដូនពេញបានឆ្មក់ចុះបង្ក្រាបជាក់ស្តែងវេលាម៉ោង១៧ល្ងាចថ្ងៃទី២០ ខែកក្កដា ឆ្នាំ២០១៨ នេះនៅចំណុចផ្ទះលេខ១៥ភូមិ០៨ សង្កាត់ជ័យជំនះខណ្ឌដូនពេញ។
សមត្ថកិច្ចខណ្ឌដូនពេញបានឲ្យដឹងថា បន្ទាប់ពីទទួលបានសេចក្តីរាយការណ៍ពីប្រជាពលរដ្ឋថា មានការលួចបើកលួចលាក់នូវទីតាំងហ្គេមបាញ់ត្រីនោះ ទើបកម្លាំងបានចុះបង្ក្រាបជាក់ស្តែងនៅទីតាំងនោះជាលទ្ធផល ដកហូតបានទូហ្គេមបាញ់ត្រីចំនួន២ទូរកៅអី១០និងកង្ហារ២គ្រឿង។
សមត្ថកិច្ចបានបន្តទៀតថា ក្នុងប្រតិបត្តិការបង្ក្រាបទីតាំងលេងហ្គេម បាញ់ត្រីនោះគឺដោយសារតែបាន ការសហការពី ប្រជាពលរដ្ឋ ផ្តល់ព័ត៌មាន មកខាងកម្លាំងសមត្ថកិច្ច ទើបឈានដល់ការចុះបង្ក្រាប ជាក់ស្តែងតែម្តង។
អាជ្ញាធរខណ្ឌដូនពេញបានឲ្យដែរថា ទីតាំងលេងហ្គេមបាញ់ត្រីនេះគី អាចបង្កឲ្យមានក្មេងទំនើង ក្មេងជក់ថ្នាំញៀន និង បង្កជាបញ្ហាផ្សេងៗ ធ្វើឲ្យប្រជាពលរដ្ឋរស់នៅជិតខាងមានការភ័យខ្លាច ហេតុនេះទើបឲ្យកម្លាំងគណៈបញ្ជាការចុះបង្ក្រាបទីតាំងនោះ។
ចំណែកលោកសុខ ពេញវុធ អភិបាលខណ្ឌដូនពេញក៏ធ្លាប់មានប្រសាសន៍ថា លោកនិងបន្តបង្ក្រាបយ៉ាងសកម្មចំពោះល្បែងស៊ីសងគ្រប់ប្រភេទ ជាពិសេសល្បែងហ្គេមបាញ់ត្រីនេះដែលធ្វើឲ្យពង្វក់អារម្មណ៍ក្មេងៗសិស្សសាលាភ្លេចការរៀនសូត្រនោះ។
លោកអភិបាលក៏បានសុំឲ្យប្រជាពលរដ្ឋនៅក្នុងមូលដ្ឋានខណ្ឌដូនពេញទាំងអស់ជួយសហការជាមួយអាជ្ញាធរនឹងផ្ដល់ព័ត៌មាន ចំពោះទីតាំងល្បែងហ្គេមបាញ់ត្រីណា ដែលនៅបន្តបើកដោយលួចលាក់ទៀតនោះ រដ្ឋបាលខណ្ឌនឹងចាត់វិធានការបង្ក្រាបឲ្យទាន់ពេលវេលាតែម្តង។
ក្រោយពីធ្វើកំណត់ហេតុដកហូតសម្ភារៈខាងលើ ត្រូវបានយកមករក្សាទុកនៅសាលាខណ្ឌដូនពេញ បណ្តោះអាសន្ន ដើម្បីមានវិធាការបន្ត។ ចំណែកអ្នកលេងនិងអ្នកមើលការខុសត្រូវចំនួន៤នាក់ មានប្រុស៣នាក់ និង ស្រីម្នាក់បានធ្វើការអប់រំនៅនឹងកន្លែងឲ្យវិលត្រឡប់ទៅវិញ៕
Source: Kampuchea Thmey Daily
0 Comments