ភ្នំពេញ ៖ ដើម្បីកាត់បន្ថយឲ្យបាននូវការលិចលង់រដ្ឋបាលរាជធានីភ្នំពេញបានយកចិត្តទុកដាក់យ៉ាងខ្លាំង ដោយរកអស់គ្រប់មធ្យោបាយក្នុងការធ្វើយ៉ាងណាអាចរំដោះទឹកចេញពីក្រុងបាន ក្នុងនោះមានទាំងការស្តារលូ ស្តារប្រឡាយ ការស្ថាបនាលូថ្មីដែលមានទំហំធំជាងមុន រួមនឹងការកសាងនូវស្ថានីយបូមទឹកថ្មីជាច្រើនកន្លែងផងដែរ។
ជាក់ស្តែងនៅពេលនេះ រដ្ឋបាលរាជធានីភ្នំពេញបានិងកំពុងដាក់លូទំហំ១ម៉ែត្រប្រវែងជាង១០០០ម៉ែត្រ ចាប់ពីផ្លូវ៣៧១ដល់ផ្លូវលូ៥ សង្កាត់ស្ទឹងមានជ័យទី២ មន្ត្រីរដ្ឋបាលរាជធានីភ្នំពេញ បានបញ្ជាក់ថា ក្នុងផែនការដោះស្រាយបញ្ហាទឹកលិចនៅតំបន់ភូមិទ្រា៤ នៅថ្ងៃនេះ រដ្ឋបាលរាជធានីភ្នំពេញ បាននិងកំពុងដាក់លូទំហំ ១ម៉ែត្រ ប្រវែង ១០៨០ម៉ែត្រ ដោយចាប់ពីផ្លូវលេខ ៣៧១ ដល់ផ្លូវលូ ៥ ក្នុងសង្កាត់ស្ទឹងមានជ័យទី២ ខណ្ឌមានជ័យ។
គួរបញ្ជាក់ដែរថា កន្លងមកនេះក្នុងគម្រោងរបស់រដ្ឋបាលរាជធានីភ្នំពេញ គឺបានដាក់ចេញជាផែនការ ដោយឲ្យមន្ទីរសាធារណការនិងដឹកជញ្ជូនរាជធានីភ្នំពេញធ្វើការសិក្សាបច្ចេកទេស លើបញ្ហាដោះស្រាយទឹកលិចចំនួន ៥គម្រោង លើចំនួន ៥តំបន់ក្នុងរាជធានីភ្នំពេញនៅឆ្នាំ២០១៨នេះ។
តំបន់លិចទឹកទាំង៥កន្លែងដែលត្រូវដោះស្រាយនេះរួមមានទី១-តំបន់ផ្លូវជាតិលេខ ៤ មុខសាលាក្តីខ្មែរក្រហម ដោយកំពុងជីកភ្ជាប់ប្រឡាយស្របផ្លូវរថភ្លើង ប្រឡាយជើងឯក និងប្រឡាយទួលពង្រ។ ទី២-តំបន់មហាវិថីសហព័ន្ធរុស្ស៊ី ខាងជើងព្រលានយន្តហោះ។ គម្រោងដាក់លូប្រអប់ក្នុងសាច់ផ្លូវតាំងកសាង ចាប់ពីមហាវិថីសហព័ន្ធរុស្ស៊ីទៅភ្ជាប់ប្រឡាយទួលសំពៅនិង១ខ្សែទៀតទៅភ្ជាប់ប្រឡាយចំការឪឡឹក។ ទី៣-តំបន់ខាងត្បូងនិងខាងកើតព្រលានយន្តហោះ។ គម្រោងនឹងដាក់លូប្រអប់ទំហំ ៦.៨ម៉ែត្រ និង ៤.៨ម៉ែត្រ ដើម្បីដោះទឹកលិចនៅផ្លូវ សឡា ផ្លូវណ័រប្រ៊ីត ផ្លូវដួង ងៀប ភូមិថ្មគោល ប្រឡាយលូ៥ បុរី អូរបែកក្អម បុរី ស ឡា។ ទី៤-គម្រោងស្ថាបនាប្រឡាយបេតុងស្ទឹងមានជ័យ និងផ្លូវអបប្រឡាយនិងទី៥-គម្រោងស្តារលូ នៅក្នុងខណ្ឌចំការមន ដូនពេញ ៧មករា និងទួលគោក។
ដើម្បីដោះស្រាយបាននូវការលិចលង់នេះដែរ រដ្ឋបាលរាជធានីភ្នំពេញក៏បានដាក់ចេញជា គម្រោងសាងសង់ស្ថានីយបូមទឹកថ្មីចំនួន៤កន្លែងទៀតផងដែរ ដូចជា នៅគឺទី១ស្ថានីយបុរី១០០ខ្នង ទី២ស្ថានីយលូ ៥ ទី៣ស្ថានីយបឹងទំពុន និងទី៤ស្ថានីយទួលសំពៅ ដែលបង្កើនសមត្ថភាពបូមទឹកបាន៣ដង។
ជាងនេះទៅទៀត រដ្ឋបាលរាជធានីភ្នំពេញនូវបានដាក់ចេញជាយុទ្ធនាការស្តារលូទាំងខ្នាតតូចនិងខ្នាតធំ នៅ៤ខណ្ឌកណ្តាលក្រុង ដែលមានប្រវែង៤១៨គីឡូម៉ែត្រ ថែមទៀតផងដែរ៕
Source: Kampuchea Thmey Daily
0 Comments