កំពង់ស្ពឺ ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់កាលពីនៅរសៀលថ្ងៃសុក្រ ៨កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែកក្កដា ឆ្នាំ២០១៨ បានចុះពិនិត្យស្ថានភាពដោយផ្ទាល់នៃផលប៉ះពាល់ក្នុងគោលបំណងស្វែងរកវិធានការអន្តរាគមន៍ដើម្បីជួយសង្គ្រោះ និងស្តារស្ថានភាពឲ្យល្អប្រសើរឡើងវិញជូនប្រជាកសិករ។
ក្រសួងកសិកម្មបានឲ្យដឹងថា ដោយមានក្តីបារម្ភអំពីសុខទុក្ខ ស្ថានភាពបង្កបង្កើនផល និងជីវិតសត្វពាហនៈរបស់ប្រជាកសិករនៅក្នុងស្រុកសំរោងទង ខេត្តកំពង់ស្ពឺដែលត្រូវបានប៉ះពាល់ដោយសារទទួលរងនូវបាតុភាពគ្រោះធម្មជាតិបង្កឡើងដោយទឹកជំនន់ទឹកភ្លៀង លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទអមដំណើរថ្នាក់ដឹកនាំ និងមន្ត្រីជំនាញបានចុះពិនិត្យស្ថានភាពដោយផ្ទាល់នៃផលប៉ះពាល់ក្នុងគោលបំណងស្វែងរកវិធានការអន្តរាគមន៍ដើម្បីជួយសង្គ្រោះ និងស្តារស្ថានភាពឲ្យល្អប្រសើរឡើងវិញជូនប្រជាកសិករក្នុងរដូវវស្សាឆ្នាំនេះ។
ក្រសួងបញ្ជាក់ផងដែរថា បាតុភាពគ្រោះធម្មជាតិដែលបង្កឡើងដោយទឹកជំនន់ទឹកភ្លៀងនាប៉ុន្មានថ្ងៃនេះ បានបង្កឲ្យមានជំនន់ទឹកភ្លៀងហូរកាត់ដីស្រែរបស់ប្រជាកសិករតាមតំបន់ទំនាបជាង ១ ពាន់ហិកតា ប៉ុន្តែមកទល់ពេលនេះស្ថានភាពនៃទឹកជំនន់ គឺមិនបានបង្កឲ្យខូចខាតធ្ងន់ធ្ងរនោះទេ ទាំងដំណាំស្រូវ និងសត្វពាហនៈ។ មកទល់ពេលនេះ ទឹកបានស្រកចុះជាបណ្តើរ ហើយការលិចលង់ នៅសេសសល់តិចតួចណាស់ គឺនៅសេសសល់តែតំបន់ទំនាបមាត់អូរតែប៉ុណ្ណោះ។
នាឱកាសនោះ លោករដ្ឋមន្ត្រីបានណែនាំដល់មន្ត្រីមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្តឲ្យបង្កើនការយកចិត្តទុកដាក់ចុះពិនិត្យស្ថានភាពប្រជាកសិករប្រកបដោយស្មារតីទទួលខុសត្រូវខ្ពស់ និងមានប្រសិទ្ធភាពតាមសារាចរណែនាំរបស់ក្រសួងស្តីពីវិធានការជួយដោះស្រាយរាល់បញ្ហាប្រឈមរបស់កសិករក្នុងការស្តារការដាំដុះឡើងវិញ និងការចាក់វ៉ាក់សាំងការពារជំងឺឆ្លងសត្វ ដែលបានជួបគ្រោះទឹកជំនន់ទឹកភ្លៀងរដូវវស្សា ឆ្នាំ២០១៨៕
Source: Kampuchea Thmey Daily
0 Comments