ស្ទឹងត្រែង ៖ ដោយសារមានភ្លៀងធ្លាក់ជាប់ៗគ្នា ក្នុងរយៈពេលប៉ុន្មានថ្ងៃនេះទឹកទន្លេមេគង្គបានឡើងចូលតាមអូរនិងផ្ទះ ប្រជាពលរដ្ឋមួយចំនួនដែលមានលំនៅឋានជាប់នឹងដងទន្លេមេគង្គនិងវាលទំនាប មកដល់ថ្ងៃទី២១កក្កដាឆ្នាំ២០១៨នេះ ទឹកទន្លេមេគង្គមានកំពស់៩ម៉ែត្រ៥០ហើយ អាជ្ញាធរសូមឲ្យបងប្អូនប្រជាពលរដ្ឋលើកម្ពស់ការប្រុងប្រយ័ត្ន។
លោកប៉ាងប៉េងប្រធានមន្ទីរធនធានទឹក និងឧតុនិយមខេត្តស្ទឹងត្រែងបានធ្វើការក្រើនរំលឹកឲ្យបងប្អូនប្រពលរដ្ឋ ដែលរស់នៅតាមមូលដ្ឋានជាប់តាមដងទន្លេមេគង្គ សូមលើកកម្ពស់ការប្រយ័ត្នខ្ពស់នៅរដូវវស្សាទឹកឡើងពេញព្រៀប ច្រាំងទន្លេនេះ។
លោកប្រធានបញ្ជាក់ថា ការគ្រោះថ្នាក់វាអាចកើតមានឡើងដោយយថាហេតុណាមួយប្រសិនបើបងប្អូនប្រជាពលរដ្ឋយើង ធ្វេសប្រហែសបន្តិចបន្តួចតែប៉ុណ្ណោះ ព្រោះគិតមកដល់ថ្ងៃទី២១ ខែកក្កដា ឆ្នាំ២០១៨នេះ វេលាម៉ោង៧ព្រឹកទឹកមានកម្ពស់៩ម៉ែត្រកន្លះ រួចទៅហើយ ចំណែកកម្រិតប្រកាសអាសន្នមានកម្រិតកម្ពស់១០ម៉ែត្រ៧០សង់ទីម៉ែត្រតែប៉ុណ្ណោះ។
អាជ្ញាធរខេត្តស្ទឹងត្រែងស្នើឲ្យប្រជាពលរដ្ឋយើងត្រូវត្រៀមលក្ខណៈ គ្រប់មធ្យោបាយរួមមាន ទូកក្តា ម៉ាស៊ីន អាវពោង កាន់ ស្បៀងអាហារឲ្យបានគ្រប់គ្រាន់ហើយនៅតាមគ្រួសារនីមួយៗត្រូវថែរក្សាសុខភាព និងការពារកូនចៅកុំចុះលេងទឹកដើម្បីបញ្ចៀសកុំឲ្យជួបគ្រោះមហន្តរាយ ពីទឹកជំនន់នេះ។
លោកស្រី ធឿង ប៉ាន់ រស់នៅភូមិហាងសាវ៉ាត សង្កាត់សាមគ្គីក្រុងស្ទឹងត្រែងបានបញ្ជាក់ថា ទឹកជំនន់ទន្លេមេគង្គប៉ុន្មានថ្ងៃនេះហក់ឡើងលឿនមែន មានស្ថានភាពគួរឲ្យព្រួយបារម្ភ ហើយបងប្អូនរស់នៅតាមដងទន្លេមេគង្គចាត់ទុកជារឿងធម្មតា ព្រោះធម្មជាតិបែបនេះវាមានជារៀងរាល់ឆ្នាំ។
លោកស្រីទទួលស្គាល់ថា ទោះជាយ៉ាងណាការរំលឹកពីមន្ត្រីជំនាញនិងអាជ្ញាធរនេះវាបានដាស់ស្មារតីដល់ប្រជាពលរដ្ឋបានច្រើនជាពិសេសអ្នកធ្វើដំណើរតាមទូកតូចៗនាំយកបន្លែបង្ការមកលក់នៅទីផ្សារបានប្រុងប្រយ័ត្នចំពោះសុវត្ថិភាពខ្លួនឯង៕
Source: Kampuchea Thmey Daily
0 Comments