ភ្នំពេញ៖ ក្រសួងអប់រំ យុវជន និងកីឡា កំពុងរៀបចំផែនការសកម្មភាពធ្វើយ៉ាងណាដើម្បីលុបបំបាត់ការប្រើអំពើហិង្សារបស់គ្រូបង្រៀន ទៅលើសិស្សនៅសាលារៀនឲ្យបាន១០០%។
នៅក្នុងសិក្ខាសាលាផ្សព្វផ្សាយ និងដាក់ឲ្យអនុវត្តគោលនយោបាយ និងផែនការសកម្មភាពសម្រាប់អនុវត្តគោលនយោបាយ ស្តីពីកិច្ចការពារកុមារនៅសាលារៀន កាលពីថ្ងៃទី ២០ ខែកក្កដា ឆ្នាំ២០១៨ នៅភោជនីយដ្ឋានទន្លេបាសាក់២ រាជធានីភ្នំពេញ លោក ចាន់ សុភា អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិកម្ពុជា ដើម្បីអភិវឌ្ឍយុវជន និងជាប្រធាននាយកដ្ឋានបឋមសិក្សា នៃក្រសួងអប់រំ យុវជន និងកីឡា បានមានប្រសាសន៍អះអាងថា សព្វថ្ងៃនេះក្រសួងអប់រំ យុវជន និងកីឡា កំពុងរៀបចំផែនការសកម្មភាពធ្វើយ៉ាងណា ដើម្បីលុបបំបាត់ការប្រើអំពើហិង្សារបស់គ្រូទៅលើសិស្សនៅក្នុងសាលារៀន ឲ្យបាន១០០%។ ការងារនេះបច្ចុប្បន្នក្រសួងអប់រំ យុវជន និងកីឡា បានដាក់ឲ្យខេត្តចំនួន ៣ គឺខេត្តបាត់ដំបង ខេត្តកំពត និង ខេត្តព្រៃវែង ឲ្យអនុវត្តសាកល្បងជំហានដំបូង មុននឹងឈានទៅអនុវត្តនៅខេត្តដ៏ទៃៗជាបន្តបន្ទាប់ទៀត។
លោកបន្តថា ការឈានទៅលុបបំបាត់អំពើហិង្សានៅសាលារៀនឲ្យបានទាំងស្រុង ១០០%នោះ ទាមទារការបណ្តុះបណ្តាលលើកកម្ពស់សមត្ថភាពគ្រូបង្រៀន។ ទន្ទឹមនេះទាមទារឲ្យមានកិច្ចសហការពីក្រសួងពាក់ព័ន្ធដូចជាក្រសួងមហាផ្ទៃ កិច្ចការនារី សង្គមកិច្ច សុខាភិបាល ជាពិសេសគឺអាជ្ញារដ្ឋអំណាចភូមិ ឃុំ ស្រុក ខណ្ឌ នៅមូលដ្ឋានចូលរួមដើម្បីការពារកុមារនៅសាលារៀនឲ្យមានប្រសិទ្ធភាពផងដែរ។ ឧទាហរណ៍បើមានករណីមានអំពើហិង្សាកើតឡើង តើសិស្ស ឬអ្នកដែលបានឃើញអំពើហិង្សានេះ ត្រូវទៅរកអន្តរាគមន៍នៅទីណា។ មួយទៀតដើម្បីទប់ស្កាត់កុំឲ្យកើតមានអំពើហិង្សាកើតឡើងលើកុមារ ផ្នែកសង្គមកិច្ចក៏ត្រូវចុះអប់រំផ្ទាល់ដល់មាតា បិតា អាណាព្យាបាល ដោយសហការជាមួយអាជ្ញាធរមូលដ្ឋានធ្វើយ៉ាងណាកុំឲ្យមានអំពើហិង្សាកើតមានលើកុមារជាកូនចៅរបស់ខ្លួន។
រដ្ឋលេខាធិការក្រសួងអប់រំ យុវជន និងកីឡា លោកបណ្ឌិតសភាចារ្យ ណាត ប៊ុនរឿនថ្លែងបញ្ជាក់ថា ដើម្បីឲ្យគោលនយោបាយ ស្តីពីកិច្ចការពារកុមារនៅសាលារៀន អាចអនុវត្តទៅបាន និងប្រកបដោយប្រសិទ្ធភាព តម្រូវឲ្យមានផែនការសកម្មភាពច្បាស់លាស់មួយក្នុងការអនុវត្ត។
សិក្ខាសាលាផ្សព្វផ្សាយ និងដាក់ឲ្យអនុវត្តគោលនយោបាយ និងផែនការសកម្មភាពសម្រាប់អនុវត្តគោលនយោបាយ ស្តីពីកិច្ចគាំពារកុមារនៅសាលារៀន ក្រោមការរៀបចំរបស់នាយកដ្ឋានបឋមសិក្សា សហការជាមួយអង្គការមូលនិធិសិទ្ធិកុមារ អង្គការ Chil Fund Cambodia អង្គការ UNICEF អង្គការ Plan international Cambodia ថ្ងៃនេះដើម្បីពិគ្រោះយោបល់ជាមួយអ្នកពាក់ព័ន្ធសំខាន់ៗ ដែលរួមមាននាយកដ្ឋាននានា នៃក្រសួងអប់រំ យុវជន និងកីឡា មន្ទីរអប់រំ យុវជន និងកីឡា រាជធានី-ខេត្ត ក្រសួងពាក់ព័ន្ធ ក្រុមប្រឹក្សាជាតិកម្ពុជាដើម្បីកុមារ តំណាងអង្គការជាតិ អន្តរជាតិ និងតំណាងកុមារ ដើម្បីជជែកពិភាក្សាស្វែងរកធាតុចូល និងការផ្តល់មតិយោបល់ ក្នុងការរៀបចំផែនការសកម្មភាព សម្រាប់ការអនុវត្តឲ្យមានប្រសិទ្ធភាព។ ក្រសួងអប់រំ យុវជន និងកីឡាសង្ឃឹមយ៉ាងមុតមាំថា គោលនយោបាយ និងផែនការសកម្មភាពសម្រាប់អនុវត្តគោលនយោបាយ ស្តីពីកិច្ចការពារកុមារនៅសាលារៀននឹងឆ្លើយតបទៅនឹងឧត្តមប្រយោជន៍ពិតប្រាកដរបស់កុមារគ្រប់រូប ក្នុងការអប់រំប្រកបដោយសមធម៌ និងគុណភាព ព្រមទាំងអាចផលិតបានធនធានមនុស្ស ដែលឆ្លើយតបនឹងតម្រូវការរបស់សង្គម និងទីផ្សារការងារនាពេលអនាគត ដូចបណ្តាប្រទេសក្នុងតំបន់ និងសកលលោក ព្រមទាំងសម្រេចបានចំណុចដៅនៅឆ្នាំ២០៣០។ លោកបណ្ឌិតសភាចារ្យ ណាត ប៊ុន រឿន ក៏បានរម្លឹកដល់គ្រូបង្រៀនត្រូវរកវិធីសាស្ត្រក្នុងការបង្រៀន ដើម្បីឲ្យសិស្សឆាប់ចាប់បាន ងាយយល់ ឆាប់ចេះ មិនមែនបង្រៀនតាមរបៀបប្រើទណ្ឌកម្មដល់សិស្សនោះទេ។
ក្រសួងអប់រំ យុវជន និងកីឡា នឹងបន្តការគាំទ្រចំពោះគោលនយោបាយ និងផែនការសកម្មភាពសម្រាប់អនុវត្តគោលនយោបាយកិច្ចការពារកុមារនៅសាលារៀន ដើម្បីបម្រើផលប្រយោជន៍ដល់កុមារទាំងអស់ និងប្រែក្លាយសាលារៀនឲ្យទៅជាកន្លែងសុខសុវត្ថិភាពមួយ សម្រាប់ការសិក្សារៀនសូត្រទៅថ្ងៃអនាគត៕
Source: Kampuchea Thmey Daily
0 Comments