ភ្នំពេញ ៖ ជនសង្ស័យម្នាក់ក្នុងចំណោមបក្ខពួក២នាក់ ត្រូវបានម្ចាស់ម៉ូតូតាមទាន់ចាប់ប្រគល់ឲ្យសមត្ថកិច្ច បន្ទាប់ពីធ្វើសកម្មភាពលួចកាច់កម៉ូតូបានហើយជិះគេចខ្លួនមិនរួចកាលពីវេលាម៉ោង៩និង៣០នាទីព្រឹក ថ្ងៃទី២១ ខែកក្កដា ឆ្នាំ២០១៨ មុខផ្ទះជនរងគ្រោះក្រុម៧ ស្ថិតក្នុងភូមិឡកំបោ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យឈ្មោះចាន់ សុដា ភេទប្រុស អាយុ២៣ឆ្នាំមុខរបរមិនពិតប្រាកដស្នាក់នៅសង្កាត់ស្រះចកខណ្ឌដូនពេញ។
ជនរងគ្រោះឈ្មោះនួន សុវណ្ណធី ភេទប្រុស អាយុ២៦ឆ្នាំ ស្នាក់នៅក្រុម៧ភូមិឡកំបោ សង្កាត់ស្វាយប៉ាកខណ្ឌឫស្សីកែវរាជធានីភ្នំពេញ។
ម៉ូតូរបស់ជនរងគ្រោះម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខភ្នំពេញ1GZ-1643។
ប្រភពព័ត៌មានពីជនរងគ្រោះបានរៀបរាប់ឲ្យដឹងថា នៅមុនពេលកើតហេតុខ្លួនបានទុកម៉ូតូនៅមុខផ្ទះ ខណៈរវល់ដួសទឹករៀបចំហូបបាយស្រាប់តែលឺសំឡេងជនសង្ស័យបញ្ឆេះម៉ូតូនិងជាន់លេខម៉ូតូ ខ្លួនក្រឡេកមើលម៉ូតូមិនឃើញក៏ចេញមកក្រៅផ្ទះឃើញជនសង្ស័យខាងលើជិះម៉ូតូខ្លួនហើយបក្ខពួកជនសង្ស័យម្នាក់ទៀតជិះម៉ូតូហុងដាឌ្រីម ពណ៌ខ្មៅ មិនចាំស្លាកលេខដែលជាមធ្យោបាយធ្វើដំណើររបស់ពួកវាខ្លួនក៏ស្រវាម៉ូតូមួយគ្រឿងទៀតជិះដេញតាមរហូតដល់មុខសាលាកូរ៉េ ក្នុងភូមិផ្លូផ្អែម សង្កាត់គោករកា ខណ្ឌព្រែកព្នៅ ជនសង្ស័យជិះទៅមុខលែងរួចដោយផ្លូវទាល់រូបគេនិងប្រជាពលរដ្ឋនៅក្បែរនោះក៏ចាប់បានប្រគល់ឲ្យសមត្ថកិច្ចប៉ុស្តិ៍ស្វាយប៉ាកតែម្តង។
ចំណែកបក្ខពួកម្នាក់ជិះគេចខ្លួនបាត់ស្រមោល។ វត្ថុតាងដែលសមត្ថកិច្ចដកហូតពីជនសង្ស័យមានដែកសម្រាប់កាច់សោកម៉ូតូចំនួនមួយ។ បច្ចុប្បន្នជនសង្ស័យនិងវត្ថុតាងត្រូវបានបញ្ជូនទៅផ្នែកជំនាញនៃអធិការដ្ឋាននគរបាលខណ្ឌឫស្សីកែវ ដើម្បីសាកសួរ និង កសាងសំណុំរឿងចាត់ការតាមនីតិវិធី៕
Source: Kampuchea Thmey Daily
0 Comments