ភ្នំពេញ ៖ លោក ឃ្លាំង ហួត ជំនួយការសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាអភិបាលនៃគណៈអភិបាលខណ្ឌជ្រោយចង្វារ បានអំពាវនាវដល់ប្រជាពលរដ្ឋឲ្យអញ្ជើញទៅចូលរួមបោះឆ្នោតឲ្យបានគ្រប់ៗគ្នា នៅថ្ងៃទី២៩ ខែកក្កដា ឆ្នាំ២០១៨ ដើម្បីជ្រើសរើសអ្នកដឹកនាំប្រទេសជាតិ ដើម្បីការអភិវឌ្ឍ និងការរីកចម្រើនរុងរឿងថ្កើងថ្កានលើគ្រប់វិស័យ។
លោកបានថ្លែងបែបនេះនៅព្រឹកថ្ងៃសៅរ៍ ៩កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែកក្កដា ឆ្នាំ២០១៨នេះ ខណៈលោក ឃ្លាំង ហួត រួមនឹងលោកស្រី ក្រុមប្រឹក្សាខណ្ឌ មន្ត្រីរាជការរដ្ឋបាលខណ្ឌ និងអាជ្ញាធរសង្កាត់កោះដាច់ ព្រមទាំងប្រជាពុទ្ធបរិស័ទចំណុះជើងវត្តសាមគ្គីក្បាលកោះ បានអញ្ជើញចូលរួមយ៉ាងច្រើនកុះករក្នុងពិធីប្រគេនទៀនព្រះវស្សា និងទេយ្យវត្ថុមួយចំនួន ប្រគេនចំពោះព្រះសង្ឃចំនួន ៧វត្ត ក្នុងសង្កាត់កោះដាច់ ខណ្ឌជ្រោយចង្វារ សម្រាប់ប្រើប្រាស់ក្នុងពេលចូលព្រះវស្សានាពេលខាងមុខ ចាប់ពីថ្ងៃ១រោច ខែទុតិយាសាឍ រហូតដល់ថ្ងៃ១៥កើត ខែអស្សុជ។
ទេយ្យវត្ថុដែលយកទៅប្រគេនរួមមានរបស់សាលារាជធានីភ្នំពេញ សាលាខណ្ឌជ្រោយចង្វារ សាលាសង្កាត់កោះដាច់ និងពុទ្ធបរិស័ទ សរុបទាំង ៧វត្ត រួមមាន៖ ទៀនវស្សា ៧គូ, សាដក ៧, អង្ករ ១៤បាវ មី ១៤កេស, ទឹកដោះគោ ៧កេស, ទឹកបរិសុទ្ធ ២៨កេស, ទឹកក្រូច ២៨កេស, ទឹកផ្លែឈើ ១៤កេស, ស្ករស ៧បាវ ប្រេង ៧កាន និងបច្ច័យ ៣,៥៧០,០០០រៀល។
ក្នុងឱកាសនៃមហាបុណ្យកុសលនោះផងដែរ លោក ឃ្លាំង ហួត អំពាវនាវដល់កងកម្លាំងគ្រប់ប្រភេទត្រូវពង្រឹងការការពារសន្តិសុខ សុវត្ថិភាព និងសណ្តាប់ធ្នាប់ឲ្យបានល្អប្រសើរ និងត្រូវចូលរួមសហការ ជួយសម្រួលចរាចរដល់គ្រប់គណបក្សនយោបាយទាំងអស់ ដែលដង្ហែក្បួនឃោសនារកសំឡេងឆ្នោតក្នុងមូលដ្ឋានខណ្ឌ។
ជាមួយគ្នានោះ លោកក៏សូមឧទ្ទិសកុសលផលបុណ្យដែលកើតចេញពីសទ្ធាជ្រះថ្លា សូមកើតមានដល់បងប្អូនប្រជាពលរដ្ឋខ្មែរទាំងក្នុងនិងក្រៅប្រទេសទាំងអស់ សូមអនុមោទនាទទួលយកចំណែកបុណ្យស្មើៗគ្នា៕
Source: Kampuchea Thmey Daily
0 Comments