ភ្នំពេញ ៖ លោក លឹម គានហោ រដ្ឋមន្ដ្រីក្រសួងធនធានទឹក និងឧតុនិយម នៅព្រឹកថ្ងៃទី២១ ខែកក្កដា ឆ្នាំ២០១៨នេះ ជំនន់ទឹកភ្លៀងឆ្នាំនេះទឹកនៅស្ទឹងព្រែកត្នោត បានកើនឡើងខ្ពស់ជាងឆ្នាំ២០១០ តែមិនបង្កឲ្យមានការបាក់ ស្រុតនោះទេដោយសារក្រុមការងារបច្ចេកទេសបានធ្វើការទប់ស្កាត់ទាន់ពេលវេលា។
លោក លឹម គានហោ មានប្រសាសន៍បែបនេះនាឱកាសដែល លោករដ្ឋមន្ដ្រី លឹម គានហោ ដែលកំពុងមានវត្តមានដឹកនាំមន្ដ្រីបច្ចេកទេសអន្ដរាគមន៍នៅតាមទំនប់សណ្ដរ នៃស្ទឹងព្រែកត្នោត និងទំនប់៧មករា នៅព្រឹកថ្ងៃទី២១។
លោករដ្ឋមន្ត្រី បញ្ជាក់ថា គិតត្រឹម ទាបភ្លឺ នេះទឹកស្ទឹងព្រែកត្នោត មានការកើនឡើងដែលខុសពីបណ្ដាឆ្នាំមុនៗ ដែលឆ្នាំ២០១០ដែលកើនឡើងខ្លាំងនោះ កម្ពស់១.២៧ម៉ែត្រ តែព្រឹកមិញនេះឡើងដល់ ១.៤៧ម៉ែត្រ ដែលជាការឡើងក្នុងកម្រិតអតិបរមា ប៉ុន្ដែក្រុមការងារបច្ចេកទេសបានធ្វើការទប់ស្កាត់ទាន់ពេលវេលា តាមរយៈការចាក់ដីបំពេញលើទំនប់សណ្ដរ ស្ទឹងព្រែកត្នោត និងបិទរន្ធនាគ មិនឲ្យការហូរច្រោះកើតឡើងទៀតឡើយ។
លោក លឹម គានហោ រដ្ឋមន្ដ្រីក្រសួងធនធានទឹក និងឧតុនិយមបានបន្តថា ក្រុមការងាររបស់ក្រសួង និងអាជ្ញាធររាជធានីភ្នំពេញ បានគ្រប់គ្រងទាំងស្រុងហើយ នៃជំនន់ទឹកភ្លៀងនៅស្ទឹងព្រែកត្នោត ដែលហូរចាក់ចូលមកខណ្ឌដង្កោ រាជធានីភ្នំពេញ និងស្រុកកណ្ដាលស្ទឹង ខេត្តកណ្ដាល។
ជាមួយគ្នានេះ លោករដ្ឋមន្ដ្រី បាន ប្រកាសជូនដំណឹង ទៅ ប្រជាពលរដ្ឋរាជធានីភ្នំពេញ និងខេត្តកណ្ដាល ថាទំនប់ស្ទឹងពញរែកត្នោត មិនមានបញ្ហាទេ កុំបារម្ភ។
លោករដ្ឋមន្ដ្រី លឹម គានហោបញ្ជាក់បន្ថែមថា ទឹកស្ទឹងព្រែកត្នោតនិងស្រកទៅវិញ ក្នុងប៉ុន្មានថ្ងៃខាងមុខនេះ បើសិន ផ្នែកខាងលើពុំមានភ្លៀងធ្លាក់ទៀត។ ជាមួយគ្នានេះ លោករដ្ឋមន្ដ្រីក្រសួងធនធានទឹក បានថ្លែងអំណរគុណដល់មន្ដ្រី អាជ្ញាធរពាក់ព័ន្ធ និងប្រជាពលរដ្ឋ ដែលបានសហការទាំងអស់គ្នាក្នុងការទប់ស្កាត់ គ្រោះធម្មជាតិមួយនេះកុំឲ្យមានការប៉ះពាល់ និងគំរាមកំហែងនៅពេលខាងមុខនេះ។
សូមបញ្ជាក់ថា ចំណាត់ការដ៏មានប្រសិទ្ធភាពនេះ បានធ្វើឡើងបន្ទាប់ពីក្រុមការងាររបស់ក្រសួងធនធានទឹក និងអាជ្ញាធរខណ្ឌដង្កោ រាជធានីភ្នំពេញ បានប្រចាំការតាំងពីយប់ថ្ងៃទី២០ ខែកក្កដា ឆ្នាំ២០១៨ រហូតដល់ព្រឹកថ្ងៃទី២១ ខែកក្កដានេះ ដើម្បីត្រៀមអន្ដរាគមន៍ដើម្បីទប់ស្កាត់គ្រោះធម្មជាតិនេះ៕
Source: Kampuchea Thmey Daily
0 Comments