ក្រុមបាល់ទាត់វិសាខា និងបឹងកេត រកបាន៣ពិន្ទុដូចគ្នា ខណៈអង្គរថាយហ្គឺរ និងព្រះខ័នរាជស្វាយរៀង ចែកគ្នាម្នាក់១ពិន្ទុក្នុងសប្ដាហ៍ទូ១៥ ប្រចាំពានរង្វាន់លីគកំពូលកម្ពុជា (Metfone Cambodian League 2018) ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា នៅល្ងាចថ្ងៃសៅរ៍ ទី២១ ខែកក្កដា ឆ្នាំ២០១៨។
ក្រុមអាស៊ីអឺរ៉ុប បានចាញ់ក្រុមវិសាខា ៤ទល់២ លើទីលានកីឡដ្ឋាន AEU Sport Park។ កីឡាករ Kelechi Stanley និងកីឡាករ Privat បានរកគ្រាប់បាល់ឱ្យក្រុមម្ចាស់អាស៊ីអឺរ៉ុប ខណៈ៤គ្រាប់ដែលជាគ្រាប់បាល់ជ័យជម្នះរបស់ក្រុមវិសាខា រកបានដោយកីឡាករ Kyong Hun Him, Hyok Chul Ri, កែវ សុខផេង និង ម៉ាត់ សាក់រវី។
ចំពោះក្រុមម្ចាស់ផ្ទះអង្គរថាយហ្គឺរ បានប្រកួតស្មើគ្នាជាមួយក្រុមព្រះខ័នរាជស្វាយរៀង ដោយលទ្ធផល១ទល់១ លើទីលានកីឡដ្ឋានខេត្តសៀមរាប។ កីឡាករ តាំង សុភ័ក្រ បានរកគ្រាប់បាល់ឲ្យក្រុមម្ចាស់ផ្ទះនាំមុខមុន ខណៈកីឡាករ Da Silva Junior បានរកគ្រាប់បាល់ឱ្យព្រះខ័នរាជស្វាយរៀង តាមស្មើគ្នាវិញ។
សម្រាប់ក្រុមបឹងកេត វិញបានប្រកួតឈ្នះលើក្រុមសូលទីឡូអង្គរ ២ទល់១ លើទីលានពហុកីឡដ្ឋានជាតិ ក្នុងរាជធានីភ្នំពេញ។ កីឡាករ Julius និងកីឡាករ Gbenga បានរកគ្រាប់បាល់ឱ្យក្រុមបឹងកេត បន្តឈរកំពូលតារាងលីគកំពូលកម្ពុជា ហើយកីឡាករ Dzama Bata បានរកគ្រាប់បាល់ឱ្យក្រុមសូលទីឡូអង្គរ។
ចំណែកគូប្រកួតសប្តាហ៍ទី១៥ ផ្សេងទៀតបន្តធ្វើឡើងនៅថ្ងៃអាទិត្យ ទី២២ ខែកក្កដា នេះក្រុមវេស្ទើនភ្នំពេញ ជួបក្រុមក្រសួងការពារជាតិ នៅម៉ោង៣រសៀលលើទីលានកីឡដ្ឋានវេស្ទើន មានផ្សាយផ្ទាល់លើទំព័រហ្វេសប៊ុករបស់ CNCC និងក្រុមអគ្គស្នងការដ្ឋាននគរបាលជាតិ ប៉ះក្រុមអគ្គីសនីកម្ពុជា នៅម៉ោង៦ល្ងាចលើទីលានពហុកីឡដ្ឋានជាតិ មានផ្សាយផ្ទាល់តាមទំព័រហ្វេសប៊ុករបស់កម្ពុជា។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship ជាដើម៕
Source: Kampuchea Thmey Daily
0 Comments