សៀមរាប ៖ ស្នងការរងនៃស្នងការនគរបាលខេត្តសៀមរាប លោកឧត្តម សេនីយ៍ត្រីភឹង សម្បត្តិ បានបង្ហាញការព្រួយបារម្ភ ចំពោះគ្រោះអគ្គិភ័យ ក្នុងផ្សារលើធំថ្មី ក្រោយពិនិត្យឃើញតូបលក់ដូរក្នុងផ្សារមួយនេះ មានរហូតជាង១០០០កន្លែងឯបំពង់ពន្លត់អគ្គិសភ័យមានត្រឹមជាង១០០កន្លែង។
ការបង្ហាញជំហរបែបនេះគឺ បន្ទាប់ពីនគរបាលជំនាញបង្ការ ពន្លត់អគ្គិភ័យនិងសង្គ្រោះ នៃស្នងការ ខេត្តសៀមរាប ចុះផ្សព្វផ្សាយអំពីបញ្ហាអគ្គិភ័យ នៅផ្សារលើធំថ្មី នាព្រឹកថ្ងៃទី២១ ខែកក្កដា ហើយបានឃើញភាពអវិជ្ជមានជាច្រើន ពាក់ព័ន្ធការបំពាក់បំពង់ពន្លត់អគ្គិភ័យ។
លោកបានបន្ថែមថា ផ្សារលើធំថ្មី ជាផ្សារធំជាងគេ នៅខេត្តសៀមរាប ប៉ុន្តែការបំពាក់បំពង់ពន្លត់អគ្គិភ័យនៅមានកម្រិតទាប ខុសពីផ្សារដទៃទៀត។ ពោលគឺផ្សារលើធំថ្មីនេះ មានជាង១ពាន់តូប ប៉ុន្តែបំពង់សម្រាប់ពន្លត់អគ្គិភ័យ មានជាង១០០ប៉ុណ្ណោះ នេះជាចំណុចខ្សោយរបស់ផ្សារ។
ក្នុងនោះដែរ មន្ត្រីជំនាញក៏បានណែនាំពន្យល់អំពីហានិភ័យ ជូនដល់ម្ចាស់ផ្សារលើធំថ្មីនិង ម្ចាស់អាជីវករ ដែលស្ថិតនៅជាប់បណ្ដោយផ្លូវជាតិលេខ៦ ក្រុងសៀមរាប។
ជាមួយការបារម្ភនេះ នាយការិយាល័យ បង្ការនិងពន្លត់អគ្គិសភ័យ លោកវរសេនីយ៍ទោ សេន សុវណ្ណនី ក៏បានស្នើសុំដល់ប្រធានផ្សារឲ្យមានការរៀបចំឡើងវិញ ត្បិតផ្លូវចូលផ្សារលើធំថ្មី ប៉ែកខាងលិចខាងកើតនិងខាងត្បូង ត្រូវបានអាជីវកលក់ដូរ និងយកធ្វើជាកន្លែងផ្ញើម៉ូតូកង់ យ៉ាងអនាធិបតេយ្យបំផុត ដែលជាការ រារាំងធំបំផុតដល់រថយន្តពន្លត់អគ្គិភ័យ។ ព្រោះ ថាបញ្ហានេះ បើសិនជាកើតមាន ហានិភ័យ ណាមួយកើតឡើងនោះ រថយន្តបង្ការ ពន្លត់អគ្គិភ័យនិងសង្គ្រោះ មិនអាចបើកចូលទៅបាញ់ទឹកពន្លត់បាននោះឡើយ។
ករណីនេះ ក្រុមការងារ គណៈកម្មការផ្សារលើធំថ្មី ទទួលស្គាល់ថា ជារឿងពិត ដែលផ្លូវចូលផ្សារ មានភាពចង្អៀត ផ្ទុយពីពេលកន្លងមកផ្លូវព័ទ្ធជុំវិញផ្សារមានទទឹងជាង៦ម៉ែត្រ។
ទោះយ៉ាងណាលោកស្រីមាឃ ចន្ទ័មុនីរម្យ អនុប្រធានគណៈកម្មការផ្សារលើធំថ្មី បញ្ជាក់ថា នឹងរៀបចំឲ្យមានផ្លូវចូលផ្សារ ទំហំ៦ម៉ែត្រឡើងវិញក្នុងពេលខាងមុខនេះ៕
Source: Kampuchea Thmey Daily
0 Comments