ក្រុមបាល់ទាត់ជម្រើសជាតិយុវជនក្រោមអាយុ១៦ឆ្នាំ (U16) របស់កម្ពុជា កំពុងហ្វឹកហាត់នៅប្រទេសម៉ាឡេស៊ី រយៈពេល១០ថ្ងៃមុនចេញដំណើរទៅប្រកួតក្នុងពានរង្វាន់ជើងឯកប្រចាំតំបន់អាស៊ាន 2018 AFF U16 Championship នៅចុងខែកក្កដា ឆ្នាំ២០១៨ នេះដែលគ្រោងធ្វើឡើងនៅទីក្រុង Solo ក្នុងប្រទេសឥណ្ឌូណេស៊ី។
ក្រុមU16កម្ពុជា ដឹកនាំដោយលោកLee Tae Hoon គ្រូបង្វឹករបស់ក្រុមយុវជនសាលាបាល់ទាត់ជាតិបាទី បានប្រកួតមិត្តភាពអន្តរជាតិចាញ់ក្រុមម្ចាស់ផ្ទះម៉ាឡេស៊ីដោយលទ្ធផល៤ទល់០ នៅល្ងាចថ្ងៃសុក្រ ទី២០ ខែកក្កដា ឆ្នាំ២០១៨ សប្ដាហ៍នេះលើទីលានកីឡដ្ឋាន Bukit Jalil។ គ្រាប់បាល់ទាំង៤គ្រាប់របស់ម្ចាស់ផ្ទះម៉ាឡេស៊ីរកបានដោយកីឡាករ Mohammad Marwan Abdul Rahman នៅនាទី២២ហើយកីឡាករ Harith Naem Jaineh រកបានគ្រាប់បាល់ទី២នៅនាទី៣៦ ស្របពេលកីឡាករ Luqman Hakim Shamsudin រកបានគ្រាប់បាល់ទី៣នៅនាទី៦១ និងកីឡាករAlif Daniel Abd Aziz រកបានគ្រាប់បាល់ចុងក្រោយនៅនាទី៨៩។
បុរសកូរ៉េខាងត្បូង រូបនេះបានប្រាប់មុនចេញដំណើរថ្មីៗនេះថា «យើងត្រូវចេញទៅហ្វឹកហាត់នៅប្រទេសម៉ាឡេស៊ី សិនគឺថ្ងៃទី១៧ ខែកក្កដា ហើយហ្វឹកហាត់នៅទីនោះរយៈពេល១០ថ្ងៃ។ តាមគម្រោងក្រោយប្រកួតជាមួយម្ចាស់ផ្ទះម៉ាឡេស៊ី រួចយើងត្រូវប្រកួតមិត្តភាពមួយប្រកួតទៀតជាមួយក្លិបយុវជនក្នុងស្រុករបស់ម៉ាឡេស៊ី នៅថ្ងៃទី២៣ ខែកក្កដា។ ចប់ការប្រកួតយើងបន្តដំណើរទៅប្រកួតនៅឥណ្ឌូណេស៊ី តែម្តង»។
ងាកទៅពានរង្វាន់ 2018 AFF U16 Championship វិញមានក្រុមត្រៀមចូលរួមចំនួន១១ ចាប់ដំណើរការប្រកួតពីថ្ងៃទី២៩ ខែកក្កដា ដល់ថ្ងៃទី១១ ខែសីហា ឆ្នាំ២០១៨ ដោយប្រើប្រាស់ទីលានចំនួន២គឺកីឡដ្ឋាន Gelora Joko Samudro Stadium និងកីឡដ្ឋានGelora Delta Stadium។ យោងតាមការចាប់ឆ្នោតបែងចែកពូលរបស់សហព័ន្ធកីឡាបាល់ទាត់អាស៊ាន (AFF) មានពូល A ក្រុមម្ចាស់ផ្ទះឥណ្ឌូណេស៊ី, វៀតណាម, មីយ៉ាន់ម៉ា, កម្ពុជា, ទីម័រខាងកើត និងហ្វីលីពីន ខណៈពូល B មានថៃ, ម៉ាឡេស៊ី, សិង្ហបុរី, ឡាវ និងប្រ៊ុយណេ។
សម្រាប់កាលវិភាគប្រកួតក្នុងពូលឃើញថាកម្ពុជា ត្រូវប៉ះក្រុមវៀតណាម ក្នុងជំនួបបើកពូលក្នុងថ្ងៃទី២៩ ខែកក្កដា ហើយនៅថ្ងៃទី៣១ កក្កដា បន្តប៉ះក្រុមហ្វីលីពីន ខណៈនៅថ្ងៃទី២ ខែសីហា កម្ពុជា ជួបក្រុមទីម័រខាងកើត នៅថ្ងៃទី៤ ខែសីហា កម្ពុជាត្រូវប៉ះក្រុមមីយ៉ាន់ម៉ា និងនៅថ្ងៃទី៦ ខែសីហា កម្ពុជាប្រកួតបិទពូល ជាមួយម្ចាស់ផ្ទះ ឥណ្ឌូណេស៊ី៕
Source: Kampuchea Thmey Daily
0 Comments