បន្ទាយមានជ័យ ៖ បើតាមសមត្ថកិច្ចនៅស្រុក២ គឺស្រុកស្វាយចេក និងស្រុកមង្គលបូរីបានប្រាប់អ្នកយកព័ត៌មានឲ្យដឹងថា ក្នុងថ្ងៃតែមួយក្មេង ប្រុស ស្រី ២នាក់ បានលង់ទឹកស្លាប់នៅស្រុកផ្សេងគ្នា។
ករណីទី១កើតឡើងនៅព្រឹកថ្ងៃទី២០ ខែកក្កដា ឆ្នាំ២០១៨ មានក្មេងប្រុសម្នាក់ឈ្មោះនួន ម៉ាណាវ ភេទប្រុស អាយុ២ឆ្នាំ បានលង់ទឹកស្លាប់នៅនិងស្រះកៀនផ្ទះ ពេលម្តាយរវល់ជាប់ទៅលក់ទឹកអំពៅក្នុង ភូមិគោកបល្ល័ង្គ ឃុំគោកបល្ល័ង្គ ស្រុកមង្គលបូរី ខេត្តបន្ទាយមានជ័យ។ ករណីទី២កើតឡើងនៅ ថ្ងៃទី២០ ខែកក្កដា ឆ្នាំ២០១៨កុមារីម្នាក់បានចុះលេងទឹកអូរនៅចំណុចជិតផ្ទះលង់ទឹកស្លាប់។ សមត្ថកិច្ចបានប្រាប់អ្នកយកព័ត៌មានឲ្យដឹងថា កុមារីរងគ្រោះមាន ឈ្មោះ ធូ សុលី ភេទស្រី អាយុ៧ឆ្នាំ រស់នៅភូមិបន្ទាត់បោះ ឃុំតាផូ ស្រុកស្វាយចេក ខេត្តបន្ទាយមានជ័យ។
សមត្ថកិច្ចបានបញ្ជាក់ទៀតថា ជាច្រើនខែមកហើយឪពុកម្តាយ ទៅធ្វើការនៅប្រទេសថៃ ទុកកូនឲ្យយាយតាមើល ពេលតាយាយ រវល់ទៅស្រែទុកចៅនៅផ្ទះម្នាក់ឯង ស្រាប់តែចៅចុះទៅលេងទឹកអូរក៏លង់ស្លាប់តែម្តង។ សពកុមារីនិងកុមារាទាំង២នាក់ ត្រូវបានក្រុមគ្រួសាររៀបចំចាត់ចែងធ្វើបុណ្យតាមប្រពៃណីនៅផ្ទះសពរៀងខ្លួន។
ស្របពេលនោះ សមត្ថកិច្ចបានធ្វើការអំពាវនាវដល់ប្រជាពលរដ្ឋទាំងអស់មេត្តាប្រុងប្រយ័ត្នចំពោះកូនតូចៗ ជៀសវាងជួបប្រទះរឿងករណីលង់ទឹកបន្តទៀត ព្រោះនេះជារដូវទឹកឡើង៕
Source: Kampuchea Thmey Daily
0 Comments