ក្លិបបាល់ទាត់ជើងឯកលីគកំពូលកម្ពុជា៦សម័យកាល ភ្នំពេញក្រោន បានប្រកាសដោះដូរកៅអីអង្គុយសម្រាប់អ្នកគាំទ្រទស្សនាជុំវិញកីឡដ្ឋាន RSN Stadium របស់ខ្លួនក្នុងពេលឆាប់ៗ គឺនៅមុនរដូវកាលឆ្នាំ២០១៩ មកដល់ដោយគ្រោងប្រើប្រាស់ទឹកប្រាក់អស់ប្រមាណជាង៧ម៉ឺនដុល្លារអាមេរិក។
យោងតាមការប្រភពបញ្ជាក់ពីក្លិបដែលមានមូលដ្ឋាននៅខណ្ឌទួលគោក មួយនេះលើកឡើងថា លោកឧកញ៉ា ឬទ្ធី សំណាង ដែលជាប្រធានក្លិបបានសម្រេចប្តូរកៅអីចាស់ៗចេញ ដោយនឹងជំនួសវិញនូវកៅអីថ្មីដែលត្រូវទទួលរ៉ាប់រងបំពាក់ដោយក្រុមហ៊ុនបរទេសមួយមានជំនាញក្នុងការស្ថាបនា ក៏ដូចជាកែលម្អកីឡដ្ឋាននានានៅក្នុងព្រះរាជាណាចក្រថៃ ផ្ទាល់តែម្តង។
តាមការគ្រោងទុក គម្រោងនេះអាចនឹងបញ្ចប់នៅចុងឆ្នាំ២០១៨ ពោលគឺក្រុមការងារនឹងចាប់ផ្តើមបំពេញបេសកកម្មនាពេលឆាប់ៗដើម្បីធានាថា កៅអីថ្មីនឹងអាចបង្ហាញខ្លួនមុនរដូវកាលឆ្នាំ២០១៩។
ប្រភពព័ត៌មានបានបញ្ជាក់ទៀតថា គម្រោងផ្លាស់ប្តូរកៅអីជ័រគ្រោងនឹងចំណាយប្រមាណជាជិត ៧ម៉ឺនដុល្លារអាមេរិកស្របពេលដែលប្រធានក្លិបមួយនេះបានប្តេជ្ញាចិត្តថានឹងព្យាយាមកែលម្អកីឡដ្ឋានស្មៅធម្មជាតិមួយនេះឲ្យកាន់តែល្អប្រសើរស័ក្តិសមជាក្លិបបាល់ទាត់អាជីពដើម្បីរួមចំណែកក្នុងការអភិវឌ្ឍវិស័យកីឡាបាល់ទាត់នៅកម្ពុជា ទាំងផ្នែកហេដ្ឋារចនាសម្ព័ន្ធ និងធនធានមនុស្សផងដែរ។
កីឡដ្ឋាន RSN Stadium ត្រូវបានក្លិបភ្នំពេញក្រោនកសាងឡើងកាលពីឆ្នាំ២០១៥ ដែលអាចផ្ទុកអ្នកទស្សនាបានចំនួន ៥០០០នាក់។ ចំណែកក្នុងបរិវេណកីឡដ្ឋាននេះរួមមានទីលានធំ, ទីលានហ្វឹលហាត់, ទីលានហ្វូតសាល, ទីលានបាល់បោះ, ទីកន្លែងស្នាក់នៅសម្រាប់កីឡាករ, ការិយាល័យ, អាហារដ្ឋាន និងសាល VIP រួមទាំងផ្នែកផ្សេងៗទៀត។
កាលពីចុងឆ្នាំ២០១៦កន្លងមកក្លិបបានប្តូរបង្គោលភ្លើងបំភ្លឺទីលានធំ (main pitch) ចំនួន ៤បង្គោលដែលបានចំណាយថវិកាមិនតិចជាង៣០ម៉ឺនដុល្លារនោះឡើយ ដើម្បីបំពេញតាមបទដ្ឋានតម្រូវរបស់សហព័ន្ធបាល់ទាត់អាស៊ី (AFC) ហើយត្រូវបានដំឡើងដោយក្រុមហ៊ុន Musco ដែលជាក្រុមហ៊ុនឈានមុខគេខាងផ្នែកភ្លើងបំភ្លឺកីឡដ្ឋានហើយក៏ជាក្រុមហ៊ុនដែលបានតំឡើងភ្លើងនៅកីឡដ្ឋាន Emirates របស់ក្លិប Arsenal ផងដែរនោះ៕
Source: Kampuchea Thmey Daily
0 Comments