ភ្នំពេញ ៖ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោហ៊ុនសែន និងជាប្រមុខគណបក្សប្រជាជនកម្ពុជាក្នុងនាមជាអ្នកដឹកនាំស្ដារប្រទេសចេញពីភ្លើងសង្គ្រាម និងបន្ដដឹកនាំប្រទេសរហូតមានការអភិវឌ្ឍដូចសព្វថ្ងៃនេះ បានប្រកាសការពារយ៉ាងដាច់ខាតមិននរណាម្នាក់មកបំផ្លាញកម្ពុជានោះទេ ដរាបណានៅមានវត្តមានរបស់សម្តេចដឹកនាំប្រទេសកម្ពុជាបន្ដទៀតហើយសម្តេចបានប្រកាសថា នឹងមើលថែកម្ពុជាជារៀងរហូតដោយមិនឲ្យប្រទេសជាតិវិលត្រឡប់ទៅរកសង្គ្រាមវិនាសកម្មជាថ្មីទៀតឡើយ។
សម្តេចតេជោហ៊ុនសែនបានបង្ហោះសារដោយភ្ជាប់ជាមួយរូបថតអង្គុយទទួលអាហារថ្ងៃត្រង់ដ៏សាមញ្ញប្រកបដោយភាពស្និទ្ធស្នាលជាមួយកម្មករកម្មការិនីនៅរោងចក្រកាលពីថ្ងៃទី១៨ខែកក្កដា២០១៨ដែលសារនយោបាយនេះមានភ្ជាប់រូបថតជាច្រើនសន្លឹកកាលពីរាត្រីថ្ងៃទី២០ខែកក្កដាតាមរយៈទំព័រហ្វេសប៊ុកផ្ទាល់របស់សម្តេចដែលបានបញ្ជាក់ថា៖«គណបក្សប្រជាជនគឺរួមសុខរួមទុក្ខជាមួយគ្នាព្រោះថាសុខទុក្ខបងប្អូនកូនក្មួយគឺជាសុខទុក្ខផ្ទាល់របស់ខ្ញុំហើយក៏ជាសុខទុក្ខរបស់គ្រួសារកម្ពុជាទូទាំងប្រទេស។យើងលំបាកខ្លាំងណាស់ក្នុងការកសាងកម្ពុជាពីគ្មានអ្វីសោះមកកម្ពុជាសព្វថ្ងៃនេះ។គណបក្សប្រជាជនគឺធានាមិនឲ្យប្រទេសជាតិវិលទៅរកសង្គ្រាមវិនាសកម្មទៀតឡើយ។ ចាប់ពីពេលនេះតទៅគឺមានតែសុខសន្តិភាពនិងរីកចម្រើនទៅមុខហើយខ្ញុំនឹងនៅមើលថែកម្ពុជាជារៀងរហូត»។
ក្នុងសារនយោបាយចេញទាំងយប់អធ្រាត្រនេះសម្តេចតេជោហ៊ុនសែនក៏បានអរគុណដល់កម្មករកម្មការិនីព្រមទាំងប្រជាពលរដ្ឋខ្មែរនៅទូទាំងប្រទេសដែលមានជំនឿទុកចិត្តឥតងាករេហើយបន្តបោះឆ្នោតគាំទ្រគណបក្សប្រជាជនកម្ពុជាលេខរៀងទី២០ដើម្បីសម្តេចមានឱកាសអភិវឌ្ឍប្រទេសកម្ពុជាឲ្យកាន់តែរុងរឿង។
សម្តេចតេជោនាយករដ្ឋមន្ត្រីហ៊ុនសែនដែលបានស្ដារប្រទេសចេញពីភ្លើងសង្គ្រាមនិងបន្ដដឹកនាំប្រទេសរហូតមានការអភិវឌ្ឍដូចសព្វថ្ងៃនេះបានប្រកាសការពារយ៉ាងដាច់ខាតមិននរណាម្នាក់មកបំផ្លាញកម្ពុជានោះទេដរាបណានៅមានវត្តមានរបស់សម្តេចដឹកនាំប្រទេសកម្ពុជាបន្ដទៀត។
សម្តេចតេជោហ៊ុនសែនបានយកជីវិតទៅប្ដូរដើម្បីសុខសន្តិភាពនិងការបង្រួបបង្រួមជាតិគឺចង់ឃើញកម្ពុជារីកចម្រើននិងចង់ឃើញយុវជនមានឱកាសគ្រប់យ៉ាងជាពិសេសឱកាសក្នុងការសិក្សាទាំងក្នុងនិងក្រៅប្រទេសឱកាសការងារនិងឱកាសបង្កើតមុខរបរដោយខ្លួនឯងដើម្បីជីវភាពរស់នៅធូរធារព្រមទាំងមានសិទ្ធិសេរីភាពគ្រប់យ៉ាងរួមទាំងសិទ្ធិបោះឆ្នោតជ្រើសរើសគណបក្សនយោបាយនិងតំណាងរាស្ត្រដែលខ្លួនពេញចិត្តជាដើម។
នៅក្នុងសេចក្តីថ្លែងការណ៍បើកយុទ្ធនាការឃោសនារកសម្លេងឆ្នោតកាលពីថ្ងៃទី៧ខែកក្កដាសម្តេចតេជោហ៊ុនសែនប្រធានគណបក្សប្រជាជនកម្ពុជាបានថ្លែងថា៖“ក្នុងនាមគណបក្សប្រជាជនកម្ពុជាខ្ញុំព្រះករុណាខ្ញុំសូមសន្យាយ៉ាងឧឡារិកជាថ្មីម្តងទៀតថាក្រោយពេលគណបក្សប្រជាជនកម្ពុជាឈ្នះឆ្នោតគណបក្សនឹងបន្តពុះពារធ្វើអ្វីៗគ្រប់យ៉ាងក្នុងលទ្ធភាពទាំងអស់របស់ខ្លួនដើម្បីធានានូវសន្តិភាពស្ថិរភាពសន្តិសុខនិងការអភិវឌ្ឍប្រកបដោយចីរភាពដោយផ្តោតឤទិភាពទៅលើការកែទម្រង់អភិបាលកិច្ចសំដៅពង្រឹងស្ថាប័នសាធារណៈនិងកសាងរដ្ឋបាលស្អាតស្អំការវិនិយោគលើមូលធនមនុស្សការបង្កើតបរិយាកាសអំណោយផលសម្រាប់ធុរកិច្ចនិងការវិនិយោគព្រមទាំងការពង្រឹងភាពជាម្ចាស់និងភាពជាដៃគូក្នុងការអភិវឌ្ឍជាមួយគ្រប់ដៃគូដែលមានការពាក់ព័ន្ធពិសេសការពង្រឹងសមត្ថភាពកម្ពុជាសម្រាប់សមាហរណកម្មជាមួយសេដ្ឋកិច្ចតំបន់និងពិភពលោកដែលទាំងអស់នេះគឺជាធាតុផ្សំចាំបាច់សម្រាប់ធ្វើឱ្យប្រជាជនគ្រប់ៗរូបមានកម្រិតជីវភាពកាន់តែប្រសើរឡើងឥតឈប់ឈរហើយរស់នៅយ៉ាងសុខដុមរមនាក្នុងសង្គមកម្ពុជាមួយដែលគោរពតម្លៃមនុស្សប្រជាធិបតេយ្យសេរីភាពនិងយុត្តិធម៌”៕
Source: Kampuchea Thmey Daily
0 Comments