ក្រុម Surat Thani FCសមាជិកក្នុងពានរង្វាន់លីគលំដាប់ទី៣របស់ប្រទេសថៃ (T3-League) ឆ្នាំ២០១៨ ដែលកីឡាករ ឃួន ឡាបូរ៉ាវី របស់កម្ពុជា កំពុងតែប្រកបអាជីព នៅពេលនេះកំពុងតែត្រូវការពិន្ទុបន្ថែម ដើម្បីស្វែងរកកៅអីសុវត្តិភាពគេចពីតំបន់បាតតារាង។
នៅចុងសប្ដាហ៍នេះ ក្រុមដែលមានមូលដ្ឋាននៅខេត្តភាគខាងត្បូងប្រទេសថៃ មួយនេះត្រូវប្រកួតប្រចាំសប្ដាហ៍ទី២០ របស់ខ្លួនក្នុងពានរង្វាន់ T3 League 2018 ត្រូវបើកទ្វារកីឡដ្ឋាន Surat Thani Stadium ទទួលក្រុម Army FC នៅវេលាម៉ោង៤ល្ងាចថ្ងៃអាទិត្យ ទី២២ ខែកក្កដា ឆ្នាំ២០១៨។
គិតត្រឹមសប្ដាហ៍ទី១៩កន្លងមកនេះក្រុម Surat Thani កំពុងឈរចំណាត់ថ្នាក់លេខ១២បណ្តោះអាសន្នក្នុងចំណោមសមាជិកទាំង១៤ ប្រចាំមណ្ឌលជាមួយគ្នា ក្រោយប្រកួតឈ្នះ៤លើក ស្មើគ្នា៦លើក និងចាញ់៩លើក មាន១៧ពិន្ទុ។ តាមការកំណត់របស់សហព័ន្ធកីឡាបាល់ទាត់ថៃ ក្រុមកំពូលតារាងប្រចាំលីគទី៣ថៃនេះ មានឈ្មោះឡើងទៅកាន់លីគលំដាប់ទី២ ខណៈក្រុមលេខ២មានឈ្មោះប្រកួតជម្រុះជាមួយក្រុមនៅមណ្ឌលផ្សេងទៀត ខណៈក្រុមនៅបានតារាងត្រូវធ្លាក់ទៅលេងនៅលីគលំដាប់ទី៤។
កីឡាករ ឃួន ឡាបូរ៉ាវី ធ្លាប់រកបានគ្រាប់បាល់១គ្រាប់ឲ្យក្រុម ម្តងរួចមកហើយ ខណៈ៦ប្រកួតដំបូងរបស់គេពេលធ្វើដំណើរទៅដល់ក្រុម Sarat Thani FC បានប្រកួតចាញ់៥លើក និងស្មើ១លើក ដោយលើកដំបូងចាញ់ក្រុម Customs United ៤ទល់១ ហើយចាញ់ក្រុម Nara United បន្តចាញ់ក្រុម Phuket City ២ទល់១ ចាញ់ក្រុម Simork ១ទល់០ ចាញ់ក្រុមម្ចាស់ផ្ទះSimork ដោយលទ្ធផល ១ទល់០ បន្តចាញ់ក្រុម Bangkok U. Deffo ៣ទល់២ និងស្មើគ្នាជាមួយក្រុម Ranong United។
ក្លិបថ្មីរបស់កីឡាករមានកំណើតនៅខេត្តកំពង់ចាម នេះមានមូលដ្ឋាននៅខេត្តSurat Thani មានលោក Monthien Morrakot គ្រូបង្វឹកប្រចាំក្រុម។ គ្រូបង្វឹករូបនេះនៅតែមានជំនឿចិត្តចំពោះការដាក់ឲ្យកីឡាករកម្ពុជា រូបនេះ ក្នុងការជួយរកគ្រាប់បាល់នៅប្រកួតបន្តបន្ទាប់។ ក្តីស្រម៉ៃរបស់ ឃួន ឡាបូរ៉ាវី ដែលចង់រកគ្រាប់បាល់ឲ្យក្រុមថ្មីនេះ គឺបានសម្រេចហើយ តែអ្វីដែលរូបគេរំពឹងជាបន្តនោះគឺសង្ឃឹមថា អាចជាផ្នែកមួយជួយឲ្យក្រុមរកបានពិន្ទុប្រជែងគេឲ្យផុតពីតំបន់បាតតារាងនៅប្រកួតបន្តបន្ទាប់។
នៅលីគរបស់ប្រទេសថៃ បានតម្រូវឲ្យក្លិបជាសមាជិករបស់ខ្លួនចុះបញ្ជីកីឡាករបរទេសបានចំនួន៥នាក់ ដោយក្នុងនោះមានកីឡាករបរទេសមិនគិតជាតិសាសន៍ចំនួន៣នាក់ កីឡាករជាជនជាតិក្នុងទ្វីបអាស៊ី១នាក់ និងកីឡាករក្នុងតំបន់អាស៊ានម្នាក់។ ក្លិប Surat Thani វិញបានចុះបញ្ជីកីឡាករពេញហើយ មានកីឡាករប្រេស៊ីល Vinicius Silva Freitas កីឡាករកូឌីវ័រ Soumahoro Mafaកីឡាករកូឌីវ័រ Kourouma Mohamed កីឡាករអ៊ីរ៉ង់ Faramarz Vahdat Derakhshan និង ឃួន ឡាបូរ៉ាវី របស់កម្ពុជា៕
Source: Kampuchea Thmey Daily
0 Comments