ភ្នំពេញ ៖ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក)ដែលជាផ្នែកមួយរបស់បេឡាជាតិរបបសន្តិសុខសង្គម បានអំពាវនាវដល់អ្នកបើកបររថយន្តដឹកកម្មករទាំងអស់ត្រូវ គោរពច្បាប់ចរាចរណ៍ឲ្យបានខ្ជាប់ខ្ជួនដើម្បីបញ្ចៀសកម្មករនិយោជិតចាកផុតពីគ្រោះថ្នាក់ចរាចរណ៍។
ការអំពាវនាវនេះ បានធ្វើឡើងបន្ទាប់ពីមានករណីគ្រោះថ្នាក់ទៅលើកម្មករដែលបណ្តាលមកពីអ្នកបើកបររថយន្តដឹកកម្មករមួយចំនួនបើកបរមិនបានគោរពច្បាប់ចរាចរណ៍ឲ្យបានត្រឹមត្រូវ។
ជាមួយគ្នានេះដែរ ក្រុមការងារ ស.ផ.ក ក៏បានណែនាំដល់អ្នកបើកបរមិនត្រូវផ្ទុកកម្មករលើសចំណុះ ត្រូវត្រួតពិនិត្យយានយន្តមុនពេលចេញទៅដឹកកម្មករ និងត្រូវឈៀករថយន្តជាប្រចាំព្រមទាំងទៅប្រឡងយកប័ណ្ណបើកបរឲ្យស្របតាមប្រភេទយានចូលរួមវគ្គបណ្តុះបណ្តាលរបស់ក្រុមការងារ ប.ស.ស ស្តីពីច្បាប់ចរាចរណ៍ផ្លូវគោកនិងជាពិសេសប្រកាន់ខ្ជាប់នូវក្រមសីលធម៌ទាំង ១០ចំណុចរបស់គណៈកម្មការជាតិសុវត្ថិភាពចរាចរណ៍ផ្លូវគោក។
ដើម្បីចូលរួមកាត់បន្ថយការគ្រោះថ្នាក់ចរាចរណ៍របស់កម្មករបេឡាជាតិរបបសន្តិសុខសង្គមដែលហៅកាត់ថា(ប.ស.ស) បានចាត់ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) សហការជាមួយ អគ្គនាយកដ្ឋានដឹកជញ្ជូនផ្លូវគោក នៃក្រសួង សាធារណការ និងដឹកជញ្ជូន បន្តយុទ្ធនាការរៀបចំវគ្គប្រឡងយកបណ្ណបើកបរដល់ អ្នកបើកបររថយន្តដឹកកម្មករ និយោជិត ដែលគ្មានបណ្ណបើកបរតាមប្រព័ន្ធស្វ័យប្រវត្តិកម្ម (Online) ដល់អ្នកបើកបររថយន្តដឹកកម្មករ។
ជាក់ស្តែងកាលពីថ្ងៃទី២០ខែកក្កដាឆ្នាំ២០១៨ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) សហការជាមួយ អគ្គនាយកដ្ឋានដឹកជញ្ជូនផ្លូវគោក នៃក្រសួង សាធារណការ និងដឹកជញ្ជូនធ្វើយុទ្ធនាការរៀបចំវគ្គប្រឡងយកប័ណ្ណបើកបរដល់ អ្នកបើកបររថយន្តដឹកកម្មករ និយោជិត ដែលគ្មានប័ណ្ណបើកបរតាមប្រព័ន្ធស្វ័យប្រវត្តិកម្ម (Online) ដល់អ្នកបើកបររថយន្តដឹកកម្មករ ដែលមានទីតាំងស្ថិតនៅក្នុងតំបន់សេដ្ឋកិច្ច ខេត្តព្រះសីហនុ។
វគ្គប្រឡងយកប័ណ្ណបើកបរដល់អ្នកបើកបររថយន្តដឹកកម្មករនេះ គឺដើម្បីឱ្យអ្នកបើកបរថយន្តដឹកកម្មករទាំងអស់ មានប័ណ្ណបើកបរគ្រប់ៗគ្នា និងត្រូវមានប័ណ្ណបើកបររថយន្តស្របតាមប្រភេទយានយន្តដឹកកម្មករ ដែលច្បាប់បានកំណត់។
យុទ្ធនាការប្រឡងផ្តល់ប័ណ្ណបើកបរនេះ រៀបចំឡើងដោយមានអ្នកចូលរួមជាអ្នកបើកបររថយន្តដឹកកម្មករនិយោជិតសរុបចំនួន៦៧នាក់ ក្នុងនោះ អ្នកគ្មានប័ណ្ណបើកបរមានចំនួន២៦នាក់ និងអ្នកមានប័ណ្ណបើកបរមិនស្របតាមប្រភេទយានយន្តមាន ចំនួន៤១នាក់ (ប្រភេទ ឃ)ហើយ នីតិវិធីនៃការប្រឡងនេះ មានទាំងការប្រឡង ទ្រឹស្តី និងដៃចង្កូតផ្ទាល់។
វគ្គប្រឡងយកប័ណ្ណបើកបរនេះ ត្រូវបានរៀបចំឡើងដោយមានការត្រួតពិនិត្យ និងគ្រប់គ្រងតាមប្រព័ន្ធប្រតិបត្តិការកុំព្យូទ័រស្វ័យប្រវត្តិ(Online) របស់ក្រសួងសាធារណការ និងដឹកជញ្ជូន ដែលតម្រូវឲ្យអ្នកប្រឡងយកប័ណ្ណបើកបរទាំងអស់ ត្រូវអនុវត្តតាមការណែនាំយ៉ាងត្រឹមត្រូវ។
ក្រុមការងារ ស.ផ.ក នៃ ប.ស.ស និងបន្តសហការជាមួយក្រុមអគ្គនាយកដ្ឋានដឹកជញ្ជូន ចុះបណ្តុះបណ្តាល ប្រឡង និងផ្តល់ប័ណ្ណបើកបរដល់អ្នកបើកបររថយន្តដឹកកម្មករ ដើម្បីឲ្យពួកគាត់មានប័ណ្ណបើកបរស្របតាមប្រភេទយានយន្ត ដែលច្បាប់បានកំណត់ឲ្យបានទាំងអស់គ្នា ស្របតាមអនុសាសន៍ដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
យោងតាមរបាយការណ៍ត្រីមាសទី២ ឆ្នាំ២០១៨ របស់ក្រុមការងារ ស.ផ.ក បានឲ្យដឹងថា ករណីគ្រោះថ្នាក់ចរាចរណ៍មកលើកម្មករនិយោជិត មានការថយចុះចំនួន១០ភាគរយ បើធៀបនឹងត្រីមាសទី១ ឆ្នាំ២០១៨៕
Source: Kampuchea Thmey Daily
0 Comments