ក្លិបបាល់ទាត់ធំៗចំនួន២ ដែលមានមូលដ្ឋាននៅខេត្តសៀមរាប គឺអង្គរថាយហ្គឺរ និងក្រុមសូលទីឡូអង្គរ បានណាត់គ្នាប្រកួតមិត្តភាពកម្តៅសាច់ដុំនៅព្រឹកថ្ងៃព្រហស្បតិ៍ ទី២៦ ខែកក្កដា ឆ្នាំ២០១៨ នេះលើទីលានកីឡដ្ឋានខេត្តសៀមរាម អំឡុងពេលដែលពានរង្វាន់លីគកំពូលកម្ពុជា សម្រាកមួយសប្ដាហ៍ទុកឱកាសឲ្យកីឡាករចូលរួមបោះឆ្នោតជ្រើសរើសតំណាងរាស្ត្រ។
ជាលទ្ធផលក្រុមអង្គរថាយហ្គឺរ បានយកឈ្នះលើក្រុមសូលទីឡូអង្គរ ២ទល់០។ កីឡាករ អ៊ុំ កុម្ភៈ និងកីឡាករវ័យក្មេង សុវណ្ណ ដូណា បានស៊ុតម្នាក់១គ្រាប់ក្នុងប្រកួតនេះ។ កីឡាករ សុវណ្ណ ដូណា ទើបតែបង្ហាញខ្លួនលើកដំបូងជាមួយ និងក្រុមឈុតធំ ក្រោមការគ្រប់គ្រងរបស់គ្រូបង្គោលជនជាតិអេស្ប៉ាញ Oriol Mohedano Segura បន្ទាប់ពីបានចុះកុងត្រារយះពេល ៣ ឆ្នាំ កាលពីខែមេសា។
ក្រុមទាំង២ធ្លាប់ប៉ះគ្នាប៉ុន្មានប្រកួតមកហើយនៅឆ្នាំនេះសម្រាប់ប្រកួតផ្លូវការទាំងក្នុងពានរង្វាន់សម្តេចតេជោ ហ៊ុន សែន និងក្នុងពានរង្វាន់លីគកំពូលកម្ពុជា។ ប្រកួតចុងក្រោយក្រុមអង្គរថាយហ្គឺរ បានទម្លាក់ក្រុមសូលទីឡូអង្គរ ក្នុងវគ្គ១៦ក្រុមចុងក្រោយប្រចាំពានរង្វាន់សម្តេចតេជោ ហ៊ុន សែន ដោយលទ្ធផលទាំង២ជើង៣ទល់២។
ក្រុមអង្គរថាយហ្គឺរ នៅសល់ឱកាសប្រកួតក្នុងពានរង្វាន់២គឺក្នុងពានរង្វាន់សម្តេចតេជោ និងក្នុងលីគ ខណៈប្រកួតបន្តក្នុងពានរង្វាន់សម្តេចតេជោ គឺត្រូវប៉ះក្រុមភ្នំពេញក្រោន ក្នុងវគ្គ៨ក្រុមចុងក្រោយ។ ចំណែកក្នុងលីគកំពូលកម្ពុជា វិញក្រុមដែលមានក្បាលម៉ាស៊ីនជាជនជាតិជប៉ុនមួយនេះប្រកួតបាន១៥លើកឈ្នះបាន៣លើកស្មើគ្នា៤លើកនិងចាញ់៨លើកមាន១៣ពិន្ទុ។
ងាកមកក្រុមសូលទីឡូអង្គរ វិញអស់សិទ្ធក្នុងពានរង្វាន់សម្តេចតេជោ ហើយ តែនៅសល់ពេលកែខៃឱកាសដើម្បីរក្សាកៅអីក្នុងពានរង្វាន់លីគកំពូលកម្ពុជា ក្រោយប្រកួត១៥លើកមកនេះនៅឈរលេខរៀងទី៩ បន្ទាប់ពីឈ្នះបាន៤លើក ស្មើគ្នា២លើកនិងចាញ់៩លើកមាន១៤ពិន្ទុក្នុងដៃ៕
Source: Kampuchea Thmey Daily
0 Comments