ភ្នំពេញ ៖ បុរសវ័យចំណាស់ម្នាក់ សង្ស័យស្រវឹងស្រាបាន បើករថយន្តបុករនាំងពុះចែកទ្រូងផ្លូវខូចខាតអស់ចំនួន២ផ្ទាំង ហើយខ្លួនឯងរងរបួសស្រាល ខណៈពេលនោះដែរ ត្រូវបានរថយន្ដមួយគ្រឿងទៀត បើកមកបុកបន្ថែមមួយជាន់ទៀត ហើយបើកគេចបាត់ភ្លាមៗមិននៅតតាំងនាំវែងឆ្ងាយឡើយ ដែលហេតុការណ៍នេះ បានកើតឡើងកាលពីវេលម៉ោង១១យប់ថ្ងៃទី២៥ ខែកក្កដា ឆ្នាំ២០១៨ នៅមុខប្រលានយន្តហោះអន្តរជាតិភ្នំពេញ ស្ថិតនៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ។
រថយន្តបង្កម៉ាក កាមរីគូទហើម ស៊េរី ៩៥ ពណ៌ស្លែ អត់ស្លាកលេខបើកបរដោយបុរសវ័យចំណាស់ម្នាក់ ក្នុងទិសដៅពីលិចទៅកើត រងរបួសស្រាល។
តាមប្រភពព័ត៌មានពី អ្នកឃើញហេតុការណ៍បានឲ្យដឹងថា នៅមុនពេលកើតហេតុគេឃើញរថយន្ត ខាងលើបើកបរ ក្នុងទិសដៅពីលិចទៅកើតក្នុងល្បឿនលឿន លុះបើកមកដល់ចំណុចកើតហេតុ ដោយឃឿនពុះចែកទ្រូងផ្លូវ មិនមានដាក់ភ្លើងសញ្ញាចំណាំងផ្លាត បន្ទាប់មករថយន្តខាងលើវាក់អឺ ជាន់ហ្វ្រាំងមិនជាប់បានបុកឃឿនពុះចែកទ្រូងផ្លូវពេញទំហឹង បណ្តាលឲ្យរថយន្តខូចខាតយ៉ាងធ្ងន់ធ្ងរ ដាច់កាឡេផ្នែកខាងឆ្វេង និង បណ្តាលឲ្យរថយន្តវិលជិតមួយជុំ ធ្វើឲ្យខូចទ្រង់ទ្រាយឃឿនពុះចែកទ្រូងផ្លូវអស់ចំនួន២ផ្ទាំង។
ប្រភពព័ត៌មានបានបន្តទៀតថា ខណៈពេលគ្រោះថ្នាក់ភ្លាមៗស្រាប់តែមានរថយន្តមួយគ្រឿងមិនចាំម៉ាក បានវាក់អើបុកគូទរថយន្តនេះបន្ថែមទៀត ហើយរថយន្តដែលបុកបានបើករត់គេចខ្លួនបាត់ស្រមោល។ ភ្លាមៗនោះ ត្រូវបានជំនាញចរាចរណ៍ខណ្ឌពោធិ៍សែនជ័យស្ទូចយកទៅរក្សាទុកនៅផ្នែកសណ្តាប់ធ្នាប់ចរាចរណ៍ខណ្ឌពោធិ៍សែនជ័យ រង់ចាំការដោះស្រាយនៅពេលក្រោយ៕
Source: Kampuchea Thmey Daily
0 Comments