ស្ទឹងត្រែង ៖ នៅវេលាម៉ោង១៤រសៀល ថ្ងៃទី២៦ ខែកក្កដានេះ ទឹកទន្លេសេកុងបានហក់ឡើង១២,១០ហួសកម្រិតប្រកាសអាសន្នត្រឹម១១,៥០ អភិបាលខេត្តស្ទឹងត្រែង បានប្រកាសឲ្យប្រជាពលរដ្ឋមានផ្ទះសម្បែងរស់នៅជិតតាមដងទន្លេសេកុង-មេគង្គ-សេសាន-នឹងទន្លេស្រែពក ត្រូវត្រៀមបង្ការខ្ពស់បំផុត ព្រោះនៅថ្ងៃ២៦កក្កដានេះ ប្រជាពលរដ្ឋក្នុងស្រុកសៀមប៉ាងជាច្រើនគ្រួសារបានរងផលប៉ះពាល់ពីទឹកជំនន់ទន្លេសេកុងមួយចំនួនបានជម្លៀសទៅកាន់ទីទួលសុវត្ថិភាព។
ក្នុងពេលដែលស្ថានភាពទឹកជំនន់ទន្លេសេកុងកំពុងបន្តឡើង និងទឹកទំនប់វារីអគ្គិសនី សេពាន សេណាមណយ ខេត្តអត្តពឺ ប្រទេសឡាវ បានសម្រុកជន់មកបន្ថែមនៅថ្ងៃទី២៦ ខែកក្កដា ឆ្នាំ២០១៨នេះលោកប៉ាងប៉េង ប្រធានមន្ទីរធនធានទឹក និង ឧតុនិយមខេត្តបានបញ្ជាក់ថា ករណីនេះប្រជាពលរដ្ឋយើងត្រូវតែបង្កើនការលើកកម្ពស់ប្រុងប្រយ័ត្នឲ្យបានទ្វេដង ព្រោះស្ថានការណ៍នេះយើងទទួលបានព័ត៌មានពីអាជ្ញាធរខេត្តអត្តពឺ រួចមកហើយ។
លោកបន្ថែមថា ស្ថានភាពទឹកទន្លេមេគង្គអាចឡើងដល់កម្រិតប្រកាសអាសន្នកម្ពស់១០.៧០ម៉ែត្រ នៅព្រឹកថ្ងៃទី២៦នេះទឹកទន្លេមេគង្គមានកម្ពស់១០ម៉ែត្រ រួចទៅហើយ រីឯទឹកទន្លេសេកុងកម្រិតប្រកាសអាសន្ន១១,៥០តែថ្ងៃ២៦កក្កដានេះ បានឡើងដល់១២,១០ហួសកម្រិតប្រកាសអាសន្នហើយព្រមជាមួយនឹងការទទួលរបបទឹកជន់ពីទំនប់ឡាវមកទៀត ធ្វើឲ្យភូមិ១៧ឃុំ៤ និងប្រជាពលរដ្ឋជាច្រើនគ្រួសារ រួមទាំងការិយាល័យបោះឆ្នោតចំនួន៧រងផលប៉ះពាល់ផងដែរ។
លោកម៉ុម សារឿន អភិបាលខេត្តស្ទឹងត្រែងស្នើឲ្យបងប្អូនប្រជាពលរដ្ឋ នាំគ្នាបង្កើនការប្រុងប្រយ័ត្ននឹងជម្លៀសចេញទៅទីទួលសុវត្ថិភាពតែម្តងជាពិសេសបងប្អូននៅតាមដងទន្លេសេកុងក្នុងស្រុកសៀមប៉ាង។
លោកអភិបាលខេត្តបន្តថា ស្ថានភាពប្រឈមនេះអាជ្ញាធរនិងមន្ត្រីស្ថាប័នមានសមត្ថកិច្ចបង្កើនការប្រុងប្រយ័ត្នរួចជាស្រេច ទាំងខេត្ត ក្រុងស្រុក និងសមត្ថកិច្ចពាក់ព័ន្ធបានត្រៀមកម្លាំងជួយប្រជាពលរដ្ឋយើងដែលរស់នៅតាមភូមិសាស្ត្រវាលទំនាបដែលងាយរងគ្រោះ។
លោកអភិបាលខេត្តបន្តថា នៅចំពោះមុខនេះប្រជាពលរដ្ឋមួយចំនួនបានជម្លៀសសត្វពាហនៈ ទ្រព្យសម្បត្តិទៅកាន់ទីទួលសុវត្ថិភាពបានមួយចំនួនធំរួចហើយ ដោយឡែកកម្លាំងសមត្ថកិច្ចក៏បានត្រៀមប្រចាំការទៅតាមតំបន់ប្រឈមមួយចំនួនផងដែរ។
សូមបញ្ជាក់ថា គិតមកដល់ថ្ងៃទី២៦កក្កដានេះទឹកទន្លេមេគង្គនៅខេត្តស្ទឹងត្រែងមានកម្ពស់១០ម៉ែត្រនៅកម្ពស់០.៧០ម៉ែត្រទៀត នឹងដល់កម្រិតប្រកាសអាសន្នចំណែកនៅទន្លេសេកុងទឹកមានកម្ពស់១២,១០ហួសកម្រិតប្រកាសអាសន្នហើយ តែអាជ្ញាធរខេត្តបានចេញសេចក្តីជូនដំណឹងទាន់ហេតុការណ៍ស្តីពីករណីគ្រោះទឹកជំនន់-ការត្រៀមបង្ការ-និងការអន្តរាគមន៍នេះរួចហើយ៕
Source: Kampuchea Thmey Daily
0 Comments