ពានរង្វាន់​«​អ្នកគាំទ្រ​លើ​វិស័យ​បាល់ទាត់​យូ​រជាងគេ​» ប្រចាំ​រដូវ​កាល​២០១៨ កំពុងដំណើរការ​ស្វែងរក​ម្ចាស់

គណៈកម្មការ​ប្រកួត​បា​ល់​ទាត់​ជាតិ​កម្ពុជា (CNCC) បាន​ប្រកាស​ជូន​ដល់​អ្នកគាំទ្រ​បាល់ទាត់​ទាំងអស់​ឲ្យ​ចូល​រួម​ប្រកួតប្រជែង​ពានរង្វាន់ អ្នកគាំទ្រ​លើ​វិស័យ​បាល់ទាត់​យូរជាងគេ ប្រចាំ​រដូវ​កាល​២០១៨ តាមរយៈ​ការ​គាំទ្រ​ដោយ​ចុច Like លើ​រូបភាព​របស់​បេក្ខជន នៅលើ​ទំព័រ​ហ្វេ​ស​ប៊ុ​ក CNCC ដោយ​ចាប់ផ្ដើម​ពី​ថ្ងៃ​សៅរ៍ ទី​២១ ខែកក្កដា រហូតដល់​ថ្ងៃទី​១៣ ខែតុលា ឆ្នាំ​២០១៨​។

ប្រភព​ព័ត៌មាន​របស់ CNCC បញ្ជាក់​ថា ​ការប្រកួត​នឹង​ធ្វើ​ឡើង​២​ដំណាក់កាល ដោយ​ដំណាក់កាល​ទី​១ បេក្ខជន​ត្រូវ​ផ្ញើ​រូបភាព​ទៅ​ទស្សនា​ការប្រកួត​បាល់ទាត់ Metfone Cambodian League និង ពានរង្វាន់​សម្តេច​តេ​ជោ ហ៊ុន សែន មក​គណៈកម្មការ​រៀងរាល់​សប្ដាហ៍ ដោយ​ទទួល​ការផ្ញើ​រូបភាព​៣​ថ្ងៃ​ក្នុង​១​សប្ដាហ៍ ពោល​ចាប់ពី​ព្រឹក​ថ្ងៃ​សៅរ៍​ដល់​ល្ងាច​ថ្ងៃ​ចន្ទ​។ រូប​ទទួល​បាន​នឹង​ត្រូវ Post នៅ​លើ​គេហទំព័រ​ហ្វេ​ស​ប៊ុ​ក CNCC នា​ព្រឹក​ថ្ងៃ​អង្គា​រ៍​ប្រចាំ​សប្ដាហ៍​នីមួយៗ ដើម្បី​ឲ្យ​អ្នកគាំទ្រ​បោះឆ្នោត​ដោយ​ចុច​Like ។ ការទទួល​ចំនួន Like នឹង​រាប់​ចាប់ពី​ពេល Post រហូតដល់​ល្ងាច​ថ្ងៃ​សុក្រ អ្នកទទួលបាន​ចំនួន Like ច្រើនជាង​គេ​៣​រូប នឹងត្រូវ​ជ្រើស​យក​ហើយ​កត់​ត្រាទុក​។

​ដំណាក់កាល​ទី​២ គណៈកម្មការ​នឹង​ធ្វើ​ការ​បូកសរុប​ពិន្ទុ​ម្តង​ក្នុង​១​ខែ ដើម្បី​បង្ហាញ​លទ្ធផល​ទាំងនោះ​នៅលើ​ទំព័រ​ហ្វេ​ស​ប៊ុ​ក CNCC រហូតដល់​ថ្ងៃទី​១៣ ខែតុលា ឆ្នាំ​២០១៨​។ ចំនួន​នៃ​ការ​គាំទ្រ​នឹងត្រូវ​បូក​បញ្ចូល​គ្នា អាស្រ័យ​លើ​ចំនួន​នៃ​ការផ្ញើ​រូបភាព​ចូលរួម​របស់​បេក្ខជន​។ ឧទាហរណ៍​ សប្តាហ៍​ទី​១ បេក្ខជន​ទទួល​បាន​១០០ Like លើ​រូបភាព​របស់​ខ្លួន សប្តាហ៍​ទី​២​បេក្ខជន​ដដែល​ផ្ញើ​រូបភាព​ថ្មី​មួយទៀត​ចូលរួម​ប្រកួត នោះ​ចំនួន​នៃ​ការ​គាំទ្រ​នឹងត្រូវ​បូក​បញ្ចូល​គ្នា​គ្រប់​សប្តាហ៍ ដែល​បេក្ខជន​ម្នាក់​នោះ​បាន​ចូលរួម​។ សូម​ចំណាំ​ថា ចំនួន Like ទទួលបាន​ក្រោយ​ការប្រកាស​លទ្ធផល​ប្រចាំ​សប្តាហ៍​នីមួយៗ នឹងមិន​ត្រូវបាន​រាប់បញ្ចូល​ឡើយ​។

បេក្ខជន​តែ​ម្នាក់​គត់​ ដែល​មាន​ចំនួន​គាំទ្រ​ខ្ពស់​ជាងគេ​បង្អស់ នឹង​ត្រូវ​ប្រកាស​នៅ​ថ្ងៃទី​១៤ ខែតុលា ឆ្នាំ​២០១៨ ជា​ជយលាភី​ប្រចាំ​រដូវ​កាល​២០១៨ នៅលើ​ទំព័រ​ហ្វេ​ស​ប៊ុ​ក CNCC ហើយនឹង​ត្រូវបាន​អញ្ជើញ​ទៅ​ទទួល​ពានរង្វាន់ នៅក្នុង​កម្មវិធី Cambodian Football Award ។ កាលពី​រដូវ​កាល​ទី​១​កន្លងទៅ លោក​ប៊ីវ តុលា ជាជយលាភី​អ្នកគាំទ្រ​វិស័យបាល់ទាត់​ជាងគេ​ អម​ដោយ​ប្រាក់​រង្វាន់​១លានរៀល៕

Source: Kampuchea Thmey Daily