នៅថ្ងៃសុក្រ ប្រទេសវ៉ានូអាទូ បានប្រកាសដាក់រដ្ឋក្នុងភាពអាសន្នសាជាថ្មីនៅលើកោះ Ambae ដែលរងការវាយប្រហារដោយភ្នំភ្លើង ហើយបានបញ្ជាឲ្យមានការជម្លៀសប្រជាជនជាកំហិត។
ការផ្ទុះជាបន្តបន្ទាប់នៅភ្នំភ្លើង Manaro ដែលបានចាប់ផ្តើមកាលពីខែកញ្ញាឆ្នាំមុនបានកើនឡើងខ្លាំងនៅសប្តាហ៍នេះដោយបញ្ចេញផេះចូលក្នុងបរិយាកាសកម្ពស់១២គីឡូម៉ែត្រ។
នាយកដ្ឋានឧតុនិយមនិងភូមិសាស្ត្រប្រទេសវ៉ានូអាទូបានចាត់ទុកភ្នំភ្លើងនេះថា “មានគ្រោះថ្នាក់ដោយផ្ទាល់ដល់សុវត្ថិភាពជីវិត” និងបានព្រមានប្រជាជនឲ្យស្ថិតនៅចម្ងាយ៣គីឡូម៉ែត្រពីមាត់របស់វា។
នាយកដ្ឋាននេះបាននិយាយថា “ប្រជាជនក្នុងតំបន់មកពីកោះ Ambae និងមកពីកោះនៅជិតខាងនោះបានបន្តឮការរញ្ជួយ ការផ្ទុះភ្នំភ្លើងនិងធុំក្លិនឧស្ម័នភ្នំភ្លើង”។
កាកបាទក្រហមបានរាយការណ៍ថា ពពកផេះដ៏ក្រាស់បានគ្របដណ្តប់លើកោះប៉ាស៊ីហ្វិកមួយនេះដោយធ្វើឲ្យប៉ះពាល់ដល់ដំណាំនិងការមើលឃើញនៅក្នុងតំបន់មួយចំនួន។
រដ្ឋមន្ត្រីការបរទេសលោក Ralph Regenvanu បាននិយាយថា រដ្ឋាភិបាលបានសម្រេចចិត្តបញ្ជាឲ្យប្រជាជនជម្លៀសចេញ។ លោកបានសរសេរក្នុង Twitter ថា “គណៈរដ្ឋមន្ត្រីបានដាក់ច្បាប់រដ្ឋក្នុងភាពអាសន្នឡើងវិញហើយបានបញ្ជាឲ្យមានការជម្លៀសអ្នកកោះ Ambae ទាំងមូល”។
កោះនេះបានធ្វើការជម្លៀសចំនួនពីរលើករួចទៅហើយចាប់តាំងពីខែកញ្ញាមក។
នៅលើកទីមួយដែលធ្វើឡើងបន្ទាប់ពីភ្នំភ្លើងចាប់ផ្តើមរង្គើ, អាជ្ញាធរបានប្រញាប់ប្រញាល់ជម្លៀសអ្នកកោះទាំងអស់ចំនួន១១,០០០នាក់ដោយប្រើសាឡាងនិងទូកឯកជនតូចៗ។
ការជម្លៀសលើកទីពីរនៅក្នុងខែឧសភាគឺត្រូវបានរៀបចំកាន់តែប្រសើរដោយមានមនុស្សរាប់ពាន់នាក់ត្រូវបានដឹកជញ្ជូនទៅកាន់ជំរំដែលបង្កើតឡើងនៅលើកោះនានាដែលស្ថិតនៅជិត៕ AFP
Source: Kampuchea Thmey Daily
0 Comments