ភ្នំពេញ ៖ ក្រសួងសុខាភិបាលបញ្ជូនមុងនិងថ្នាំពេទ្យបន្ថែមដល់មន្ទីរសុខាភិបាលខេត្តស្ទឹងត្រែងសម្រាប់ផ្តល់សេវាសុខភាពជូនប្រជាពលរដ្ឋរងគ្រោះដោយទឹកជំនន់ដែលបណ្តាលមកពីការបាក់ទំនប់វារីអគ្គិសនីសេពានសេណាំណយនៅប្រទេសឡាវកាលពីពេលថ្មីៗនេះ។
ជាមួយគ្នានេះដែរលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលធ្វើការណែនាំឲ្យមន្ទីរសុខាភិបាល យកចិត្តទុកដាក់ផ្តល់សុខភាពប្រជាពលរដ្ឋរងគ្រោះដោយទឹកជំនន់នេះ ជាពិសេសត្រូវចែកមុងសម្រាប់ឲ្យពួកគាត់បានប្រើប្រាស់ការពារមូសដែកគោលខាំ ដែលនាំឲ្យមានជំងឺគ្រុនចាញ់ និងមូសខ្លាខាំដែលបណ្ដាលឲ្យមានជំងឺគ្រុនឈាម ឬមូសខាំផ្សេងៗទៀត ដែលអាចបង្កឲ្យមានជំងឺផ្សេងៗ ព្រមទាំងចុះពិនិត្យសុខភាពនិងចាក់ថ្នាំបង្ការជូនដល់ប្រជាជន និងកុមារមិនឲ្យមានការអាក់ខាននោះឡើយ ជាពិសេសស្ត្រីដែលមានផ្ទៃពោះ ត្រូវបន្តការពិនិត្យផ្ទៃពោះឲ្យបានគ្រប់តាមការកំណត់របស់គ្រូពេទ្យ។
ចំណែកមន្ទីរសុខាភិបាលខេត្តក៏បានបង្កើតក្រុមគ្រូពេទ្យស្ម័គ្រចិត្តចល័តរបស់មន្ទីរសុខាភិបាល ដែល ដឹកនាំដោយ លោកវេជ្ជ អ៊ុង សូវៀត សហការជាមួយមណ្ឌលសុខភាពសៀមប៉ាង បានចុះទៅ ភូមិ ញាំងស៊ុំធំ , ឡាកាយ និងទីទួលសុវត្ថិភាពកោះទន្សាយ ឃុំសន្តិភាព និងបានធ្វើសកម្មភាពចែកមុងជ្រលក់ថ្នាំចំនួន150 មុង(មុងអង្រឹង 100 ,មុងគ្រែ 50។ ផ្តល់ថ្នាំបង្ការ ជំងឺកញ្ជ្រឹល និងគ្រុនស្វិតដៃជើងដល់កុមារ ចំនួន50នាក់ចែកថ្នាំchloramine 17000គ្រាប់ និងអប់រំសុខភាព បាន 208នាក់ព្រមទាំងពិនិត្យព្យាបាលជំងឺជូនប្រជាពលរដ្ឋបានចំនួន 123 នាក់ឲ្យដែរ។
បើតាមលោក ម៉ុម សារឿន អភិបាលខេត្តស្ទឹងត្រែងបានឲ្យដឹងកាលពីរសៀលថ្ងៃទី២៦កក្កដាឲ្យដឹងថាមានប្រជាពលរដ្ឋជិត៥,០០០នាក់ ស្មើនឹងជាង១,០០០គ្រួសារ ស្ថិតនៅឃុំចំនួន៤ ក្នុងស្រុកសៀមប៉ាង ខេត្តស្ទឹងត្រែង ដែលទទួលរងការលិចលង់ដោយសារទឹកជំនន់ ហូរពីប្រទេសឡាវ ក្រោយបាក់ទំនប់សេពាន សេណាំណយ ត្រូវបានអាជ្ញាធរ និងសមត្ថកិច្ច ជួយជម្លៀសចេញពីផ្ទះសម្បែងរបស់ពួកគាត់ទាន់ពេលវេលា មិនបណ្ដាលឲ្យពលរដ្ឋណាម្នាក់ស្លាប់បាត់បង់ជីវិត ឬរងគ្រោះថ្នាក់ធ្ងន់ធ្ងរនោះឡើយ៕
Source: Kampuchea Thmey Daily
0 Comments