ស្ទឹងត្រែង ៖ ដោយសារមានភ្លៀងធ្លាក់ជាប់គ្នា ទំនប់វារីអគ្គិសនី Se-pian Se Nam Noi នៅក្នុងខេត្តអត្តពឺ(Attapeu)ប្រទេសឡាវ បានបាក់ជន់លិចភូមិចំនួន៦ ធ្វើអោយប្រជាពលរដ្ឋឡាវបាត់ខ្លួនជាច្រើនរយនាក់ និង៦ពាន់នាក់គ្មានទីជម្រក ហើយនៅព្រឹកថ្ងៃ២៥ ខែកក្កដានេះ អភិបាលខេត្តស្ទឹងត្រែងបានដឹកនាំកម្លាំងដើម្បីជម្លៀសប្រជាពលរដ្ឋរស់នៅតាមដងទន្លេសេកុងក្នុងស្រុកសៀមប៉ាង ដែលនៅតាមវាលទំនាបប្រឈមនឹងការលិចលង់ មកកាន់ទីទួលសុវត្ថិភាព។
យោងតាមព័ត៌មានទាន់ហេតុការណ៍របស់ក្រសួងធនធានទឹក និងឧតុនិយមនៅថ្ងៃទី២៤ ខែកក្កដា ឆ្នាំ២០១៨នេះ ទំនប់វារីអគ្គិសនីក្នុងខេត្តអត្តពឺប្រទេសឡាវ ដែលមានសមត្ថភាពស្តុកទឹកបានប្រមាណ៥លាន់ម៉ែត្រគូប និងអាចផលិតថាមពលអគ្គីសនីបាន៤១០មេហ្គាវ៉ាត់ និងមានចម្ងាយប្រមាណ៧០គីឡូម៉ែត្រពីព្រំដែនកម្ពុជាឡាវនោះ បានបាក់។
លោកប៉ាងប៉េងប្រធានមន្ទីរធនធានទឹក និងឧតុនិយមខេត្តបានបញ្ជាក់ថា ៖ បន្ទាប់មានការបាក់ទំនប់អគ្គិសនីនៅខេត្តអត្តពឺប្រទេសឡាវ កាលពីល្ងាចថ្ងៃទី២៤កក្កដា នៅស្រុកសៀមប៉ាង មានកម្ពស់ទឹក១០ម៉ែត្រ៤៦ និងនៅព្រឹកថ្ងៃទី២៥កក្កដានេះ មានកម្ពស់ទឹក១១ម៉ែត្រ៣០ ភាពខុសគ្នាកើនឡើង០.៨៤នៅសល់០,២០ម៉ែត្រទៀតនឹងត្រូវប្រកាសអាសន្ន។
លោកជឹមអេនអធិការដ្ឋាននគរបាលស្រុកសៀមប៉ាងបានបញ្ជាក់ថា នៅពេលនេះ មានកិច្ចប្រជុំបន្ទាន់មួយ ដោយសារមានទឹកលិចជាបណ្តើរៗហើយនោះ លោកម៉ុមសារឿនអភិបាលខេត្តស្ទឹងត្រែង បានដឹកនាំកម្លាំងគ្រប់ស្ថាប័នពាក់ព័ន្ធចុះជម្លៀសប្រជាពលរដ្ឋក្នុងស្រុកមួយនេះ ដែលប្រឈមនឹងគ្រោះទឹកជំនន់ ដោយសារបាក់ទំនប់វារីអគ្គិសនីនៅក្នុងខេត្តអត្តពឺប្រទេសឡាវ ដែលអាចជន់លិចមកដល់ស្រុកសៀមប៉ាងនៅថ្ងៃ២៥កក្កដានេះ៕
Source: Kampuchea Thmey Daily
0 Comments