ឆៃ លីដាឡែន កាន់តែបង្ហាញអារម្មណ៍ខូចចិត្ត ខណៈមានការសង្ស័យលើភាពប្រេះឆាស្នេហ៍

ភ្នំពេញ ៖ តាមការកត់សម្គាល់នេះ ពុំមែនទើបជាលើកទី១នោះទេ ដែលតារាចម្រៀងស្រីយ៉េៗអ្នកនាង ឆៃ លីដាឡែន បញ្ចេញពីអារម្មណ៍មិនសប្បាយចិត្ត និងថែមទាំងពេលខ្លះ នាងបាននិយាយថា ខ្លួនតែងមានភាពស្មោះត្រង់លើការស្រឡាញ់ ប៉ុន្តែគេវិញបានត្រឹមតែធ្វើឲ្យខ្លួនខកចិត្ត និងបំផ្លាញនូវអ្វី ដែលជាភាពស្មោះត្រង់តែប៉ុណ្ណោះ។

ការទម្លាយសារបង្ហាញពីការខូចចិត្តនិងហាក់កំពុងតែបៀមទុក្ខនូវវិបត្តិផ្លូវចិត្តពីសំណាក់តារាចម្រៀងអ្នកនាង ឆៃ លីដាឡែន នាពេលនេះ បានធ្វើឲ្យមហាជនជាច្រើនដាក់ការសង្ស័យថា តារាស្រីរូបនេះអាចកំពុងប្រឈមរឿងរ៉ាវវិបត្តិស្នេហាជាមួយស្វាមី ខណៈចម្លើយមិនទាន់ត្រូវបានឆ្លើយបញ្ជាក់ការពិតពីសាមីខ្លួននៅឡើយ។

ជាក់ស្តែងថ្មីៗនេះ កញ្ញា ឆៃ លីដាឡែន បានបង្ហាញអារម្មណ៍ជាសាធារណៈថា សូមសរសើរពិតជាពូកែសម្តែងមែន ពូកែសម្តែងគ្រប់ទម្រង់ សម្តែងគ្រប់រឿង អស់ពីរឿងមួយចូលរឿង។ ហ៊ឺ ឯងខំតែអាណិត និងបារម្ភ តែការអាណិត និងបារម្ភបែរជាគ្មានន័យនឹងគ្មានតម្លៃសម្រាប់គេទៅវិញ។

អ្នកនាង ឆៃ លីដាឡែន បន្តទៀតថា ល្មមឈប់ទៅ ដាឡែនក្តីស្រលាញ់អាណិតបារម្ភ អោយទៅអ្នកណាទៀតទៅ ទោះអ្នកធ្វើល្អ និងបារម្ភយ៉ាងណា ក៏នៅតែគ្មានតម្លៃនឹងគ្មានន័យសម្រាប់គេទេល្មមដឹងខ្លួនហើយ។ សង្ឃឹមថាខ្ញុំអាចធ្វើបាន ទោះខ្ញុំក្រទោះខ្ញុំគ្មានអ្វីគ្រប់យ៉ាងដូចគេ ក៏ខ្ញុំមានបេះដូងស្មោះអោយអ្នកដែរ អ្នកណាស្រលាញ់រាប់អានខ្ញុំត្រូវការបេះដូងស្មោះអាចដាក់ពាក្យបាន តែបើត្រូវការអ្វីផ្សេងខ្ញុំគ្មានទេ។

អ្នកនាង ឆៃ លីដាឡែន នៅព្រឹកថ្ងៃទី២៥ ខែកក្កដា ឆ្នាំ២០១៨នេះក ម្ពុជាថ្មីពុំទាន់អាចទំនាក់ទំនងដើម្បីសុំការសួរនាំបន្ថែមនៅឡើយទេ។ ខណៈមានមហាជនជាច្រើនកំពុងតែចង់ដឹង និងរង់ចាំចម្លើយចេញដោយផ្ទាល់មាត់របស់ស្រីស្រស់រូបនេះ៕