បាត់ដំបង ៖ យុវជនម្នាក់ បានស្លាប់ភ្លាមៗនៅនឹងកន្លែងកើតហេតុ ដោយមានទាំងមួកសុវត្ថិភាពនៅជាប់នឹងក្បាលផង ខណៈដែលជនរងគ្រោះរូបនេះ កំពុងបើកបរម៉ូតូនៅក្នុងពេលយប់ ហើយក៏បានពើបប្រទះជាមួយនឹងរថយន្តធុនធ្ងន់ដែលឈប់សំចតនៅលើទ្រូងផ្លូវដោយគ្មានដាក់ស្លាកសញ្ញាអ្វីជាសម្គាល់ ទើបធ្វើអោយម៉ូតូនេះបុកចំពីក្រោយយ៉ាងពេញទំហឹងតែម្តង។
ហេតុការណ៍នេះដែរ បានកើតឡើងនៅថ្ងៃទី២៤ ខែកក្កដា ឆ្នាំ២០១៨ វេលាម៉ោង១០និង ៣០ នាទីយប់ ស្ថិតនៅចំណុចក្រុមទី៨ ភូមិពោធិ២ ឃុំគារ ស្រុកមោងឫស្សី ខេត្តបាត់ដំបង លើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ២៤៩ និង២៥០ រវាងម៉ូតូមួយគ្រឿងម៉ាកហុងដាឌ្រីមធុនសេ១២៥ ពណ៌ខ្មៅ ស៊េរីឆ្នាំ ២០១៧ ពាក់ស្លាកលេខបាត់ដំបង1X.7099 ជាមួយនឹងរថយន្ត ម៉ាកហ្វូសូ ធុនដឹកជញ្ជូន ពាកស្លាកលេខ PP- 2466 ក្នុងទិសដៅស្របគ្នា។
យោងតាមរបាយការណ៍របស់សមត្ថកិច្ចបានអោយដឹងថា នៅមុនពេលកើតហេតុ គឺរថយន្តបង្កបានបើកបរក្នុងទិសដៅពីភ្នំពេញ ទៅបាត់ដំបង ដោយសាររថយន្តមានបញ្ហា ទើបគេបានឈប់សំចតនៅលើទ្រូងផ្លូវនោះតែម្តង ប៉ុន្តែជាចៃដន្យក៏ស្រាប់តែមានម៉ូតូមួយគ្រឿង ដែលបើកបរដោយឈ្មោះ សរ សុខដារ៉ា ភេទប្រុស អាយុ ២៨ឆ្នាំ ស្នាក់នៅបណ្ដោះអាសន្ននៅភូមិកន្សៃបន្ទាយ ឃុំ មោង ស្រុកមោងឫស្សី ខេត្តបាត់ដំបង ដែលកំពុងបើកមកពីក្រោយក្នុងទិសដៅស្របគ្នា បានបុកគូទរថយន្តនោះតែម្តង បណ្ដាលអោយជនរងគ្រោះបែកមួកសុវត្ថិភាព និងទំនងជាបាក់.ក បានស្លាប់នៅនឹងកន្លែងតែម្តង។
នៅមុនពេលសមត្ថកិច្ចជំនាញចុះទៅដល់ គឺអ្នកបើកបររថយន្តបានរត់គេចខ្លួនបាត់ ស្រមោលទាំងយប់ ទៅហើយ ដោយសមត្ថកិច្ចក៏បានធ្វើការប្រគល់សព ទៅអោយក្រុមគ្រួសារ នាំយកទៅរៀបចំធ្វើបុណ្យតាមប្រពៃណី ចំណែកមធ្យោបាយធ្វើដំណើរទាំង២ក៏ត្រូវបាននាំយកទៅរក្សាទុកនៅអធិការដ្ឋាន រង់ចាំធ្វើការប្រគល់បន្តទៅកាន់ ការិយាល័យនគរបាល ចរាចរណ៍ផ្លូវគោក ខេត្ត ដើម្បីចាត់ការតាមនីតិវិធី៕
Source: Kampuchea Thmey Daily
0 Comments