បាត់ដំបង ៖ សពបុរសម្នាក់ ត្រូវបានប្រជាពលរដ្ឋប្រទះឃើញ ក្នុងសភាពហើយ ស្អុយស្ទើររលួយទៅហើយ ថែមទាំងមានខ្សែចង ក ជាប់នឹងមែកឈើផងដែរ ដែលបញ្ជាក់ថា បុរសរូបនេះ អាចស្លាប់ដោយសារការធ្វើអត្តឃាត បន្ទាប់ពីបានបាត់ខ្លួនអស់រយៈពេលប្រមាណជាង១សប្តាហ៍រួចមក។
តាមការអះអាងពីក្រុមគ្រួសារ បាននិយាយថា ជនរងគ្រោះមានឈ្មោះ សៅ សុភា ភេទប្រុស អាយុ៣៩ឆ្នាំ ( នៅលីវ ) រស់នៅភូមិឆ្កែខាំប្រើស ឃុំព្រែកជីក ស្រុករុក្ខគីរី ខេត្តបាត់ដំបង ដោយបានបាត់ខ្លួនតាំងពីថ្ងៃទី ១៦ ខែកក្កដា ឆ្នាំ២០១៨ មកម្ល៉េះមិនដឹងជាគេដើរទៅណា។
លុះនៅថ្ងៃទី ២៤ ខែកក្កដា ឆ្នាំ២០១៨ វេលាម៉ោង ១១ និង ១០ នាទី ថ្ងៃត្រង់ ក៏មានការភ្ញាក់ផ្អើលមួយ បានកើតឡើង នៅត្រង់ចំណុចបឹងឫស្សី ស្ថិតក្នុងភូមិសាស្ត្រភូមិ ឃុំ ដែលជនរងគ្រោះរស់នៅ ដោយសារតែប្រជាពលរដ្ឋបានប្រទះឃើញមានមនុស្សធ្វើអត្តឃាតដោយចង កសម្លាប់ខ្លួន នៅក្នុងព្រៃ។
នៅពេលនោះដែរ ទាំងក្រុមគ្រួសារ សាច់ញាតិ រួមទាំងសមត្ថកិច្ចមូលដ្ឋានផងនោះ បាននាំគ្នាចុះទៅកាន់ចំណុចខាងលើ ដើម្បីពិនិត្យជាក់ស្តែងទៅលើសព។ លទ្ធផលគឺសពជនរងគ្រោះ ពិតជាមនុស្ស ដែលគេបានបាត់ខ្លួនជាច្រើនថ្ងៃនោះមែន ដោយសភាពសពហើម ស្អុយ ស្ទើររលួយទៅហើយ សឹងតែមើលលែងយល់។
ពាក់ព័ន្ធនឹងករណីធ្វើអត្តឃាតនេះដែរ ក៏មានប្រភពមួយចំនួនបានលើកឡើងថា ជនរងគ្រោះរូបនេះ អាចមានការបែកថ្នាំ ទើបហ៊ានប្រព្រឹត្តនូវអំពើដែលមិនគប្បីបែបនេះព្រោះពីអតីតកាលគេក៏ជាមនុស្សដែលធ្លាប់សេពគ្រឿងញៀនដែរ។
បច្ចុប្បន្នក្រោយពេលត្រួតពិនិត្យចប់ សមត្ថកិច្ចក៏បានប្រគល់សពទៅអោយក្រុមគ្រួសាររៀបចំចាត់ចែងធ្វើបុណ្យតាមប្រពៃណីហើយ៕
Source: Kampuchea Thmey Daily
0 Comments