ដោយលើកសរសើរអំពី “ទំនាក់ទំនងល្អ” ជាមួយមេដឹកនាំកូរ៉េខាងជើងគីមជុងអ៊ុន, កាលពីថ្ងៃអង្គារ ប្រធានាធិបតីសហរដ្ឋអាមេរិកលោកដូណាល់ត្រាំបានស្វាគមន៍របាយការណ៍ដែលថា ក្រុងព្យុងយ៉ាងបានចាប់ផ្តើមរុះរើកន្លែងមួយដែលត្រូវបានគេមើលឃើញថា ជាទីតាំងសាកល្បងមីស៊ីលផ្លោងអន្តរទ្វីប។
លោក ត្រាំ បាននិយាយក្នុងព្រឹត្តិការណ៍មួយសម្រាប់អតីតយុទ្ធជនយោធានៅទីក្រុង Kansas នៃរដ្ឋ Missouri ថា “រូបភាពផ្កាយរណបបានបង្ហាញថា ប្រទេសកូរ៉េខាងជើងបានចាប់ផ្តើមដំណើរការរំលាយទីតាំងមីស៊ីលដ៏សំខាន់មួយហើយយើងពេញចិត្តណាស់ចំពោះរឿងនេះ”។
ឆ្លើយតបទៅនឹងការរិះគន់ដែលថាជំនួបកំពូលកាលពីថ្ងៃទី១២ខែមិថុនាជាមួយលោកគីមនៅប្រទេសសិង្ហបុរីបានផ្តល់នូវលទ្ធផលជាក់ស្តែងតិចតួចបំផុតនោះ, លោក ត្រាំ បានលើកឡើងថា ទំនាក់ទំនងថ្មីរបស់លោកជាមួយលោកគីមកំពុងតែបង្កើតផ្លែផ្កា។
លោក ត្រាំ បានថ្លែងថា: “យើងមានកិច្ចប្រជុំដ៏អស្ចារ្យមួយជាមួយលោកប្រធានគីមហើយវាហាក់ដូចជាដំណើរការយ៉ាងល្អ”។
បន្ទាប់ពីកិច្ចប្រជុំកំពូលនោះ លោកត្រាំបានប្រកាសថា ការគំរាមកំហែងនុយក្លេអ៊ែររបស់កូរ៉េខាងជើងគឺបានបញ្ចប់ហើយប៉ុន្តែរបាយការណ៍ប្រព័ន្ធផ្សព្វផ្សាយមួយចំនួនរបស់អាមេរិកបានបង្ហាញថា លោកមានការខឹងសម្បាយ៉ាងខ្លាំងចំពោះល្បឿននៃការរំសាយអាវុធនុយក្លេអ៊ែរ។
គេហទំព័រ 38 North ដែលមានមូលដ្ឋាននៅសហរដ្ឋអាមេរិកបានចេញផ្សាយរូបភាពកាលពីថ្ងៃចន្ទដែលបង្ហាញថា ក្រុងព្យុងយ៉ាងបានចាប់ផ្តើមរុះរើអាគារកែច្នៃមួយនិងជើងទម្រធ្វើតេស្តម៉ាស៊ីនរ៉ុក្កែតមួយនៅស្ថានីយបាញ់បង្ហោះផ្កាយរណប Sohae របស់ខ្លួន។
អ្នកវិភាគរបស់ 38 North លោក Joseph Bermudez បានហៅការរុះរើនេះថាជា “ជំហានដំបូងដ៏សំខាន់មួយ” សម្រាប់លោកគីមដើម្បីបំពេញតាមការសន្យាមួយដែលលោក ត្រាំ និយាយថា មេដឹកនាំកូរ៉េខាងជើងបានធ្វើ។
ប៉ុន្តែអ្នកជំនាញមួយចំនួនបានជំរុញឲ្យមានការប្រុងប្រយ័ត្នហើយមន្ត្រីក្រសួងការពារជាតិអាមេរិកម្នាក់បានច្រានចោលព័ត៌មាននេះដោយនិយាយថា ទីតាំង Sohae មិនមែនជាអាទិភាពក្នុងការឃ្លាំមើលកិច្ចខិតខំប្រឹងប្រែងរំសាយអាវុធនុយក្លេអ៊ែររបស់កូរ៉េខាងជើងនោះទេ៕ AFP
Source: Kampuchea Thmey Daily
0 Comments