បាត់ដំបង ៖ ជនសង្ស័យម្នាក់ ដែលជាមុខសញ្ញាវាយប្លន់យកទ្រព្យសម្បត្តិរបស់ជនរងគ្រោះកាលពីយប់ម្សិលមិញនោះ ត្រូវបានកម្លាំងមានសមត្ថកិច្ចតាមប្រមាញ់ និងឈានដល់ការចាន់ខ្លួន បន្ទាប់ពីជនសង្ស័យរូបនេះ បានបង្វែងដានគេចខ្លួនទៅកាន់ខេត្តសៀមរាបអស់ប៉ុន្មានម៉ោងរួចមក។
យុវជនម្នាក់ បានរងរបួសយ៉ាងធ្ងន់ធ្ងររហូតដេកដួលសន្លប់ លែងដឹងខ្លួន បន្ទាប់ពីត្រូវជនមិនស្គាល់មុខប្រើប្រាស់ដំបងឫស្សី វាយចំពីក្រោយអស់ជាច្រើនដំបង ខណៈពេលដែលយុវជនរូបនេះ អង្គុយលេងនៅទីងងឹតជាមួយនឹងដៃគូ ដើម្បីបន្ធូរអារម្មណ៍ និងដើម្បីស្រូបយកខ្យល់អាកាសនាទេសភាពស្រុកស្រែ។
គួរបញ្ជាក់ដែរថា នៅវេលាម៉ោង៨យប់ ថ្ងៃទី២៣ ខែកក្កដា ឆ្នាំ២០១៨ នៅត្រង់ចំណុចបឹងស្នោក្នុងភូមិសំរោងតាកុក ឃុំសំរោងក្នុង ស្រុកឯកភ្នំ ខេត្តបាត់ដំបង មានករណីប្លន់ម៉ូតូមួយបានកើតឡើង ដោយមានជនមិនស្គាល់មុខ បានប្រើប្រាស់ដំបងឫស្សីវាយទៅលើជនរងគ្រោះឈ្មោះ ថៃ ធៀង ភេទប្រុស អាយុ២២ឆ្នាំ រស់នៅភូមិសម្តេច ឃុំតាប៉ុន ស្រុកសង្កែ ខេត្តបាត់ដំបង ខណៈដែលគេកំពុងអង្គុយលេងជាមួយដៃគូ បណ្តាលអោយសន្លប់ និងរងរបួសរយះសៀតផ្កាខាងស្តាំ និងរលាត់ស្បែកស្មាទាំងសងខាង រីឯមិត្តស្រីបានរត់កាត់វាលស្រែដើម្បីគេចខ្លួន ដែលនៅពេលនោះដែរជនសង្ស័យដែលមិនស្គាល់អត្តសញ្ញាណ បានយកទៅជាមួយនូវរបស់របរមួយចំនួនដូចជា ម៉ូតូម៉ាក ហុងដា ១ គ្រឿង ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ បាត់ដំបង1S0318 កុំព្យូទ័រ ១ គ្រឿង ម៉ាក(អេស័រ) ពណ៌ខ្មៅ ទូរស័ព្ទដៃម៉ាក អាយហ្វូនហ្វាយអេស ពណ៌ខ្មៅ+ប្រផេះ ចំនួន០១គ្រឿង និងសម្ភារមួយចំនួនទៀត។
លោកស្នងការរង ជេត វណ្ណនី បានបញ្ជាក់ថា ក្រោយពីមានសកម្មភាពបទល្មើសបែបនេះភ្លាម លោកបានធ្វើការសិក្សា និងស្រាវជ្រាវរកមុខសញ្ញា ទើបទទួលបានពន្លឺ ដោយមានការចង្អុលបង្ហាញពីលោក ស្នងការ អ៊ុច សុខុន ផងដែរ គឺក្រោយពេលកើតហេតុ មុខសញ្ញាបានចេញដំណើរទៅកាន់ខេត្តសៀមរាប ក្នុងគោលបំណងទៅជួបសង្សាររបស់គេ នៅស្រុកក្រឡាញ់ នៅពេលនោះដែរ លោកបានដាក់កម្លាំងទៅសហការជាមួយខេត្តបន្ទាយមានជ័យ ខេត្តសៀមរាប ដើម្បីតាមរកមុខសញ្ញានោះ តែផ្ទុយទៅវិញគឺមានការយឺតមួយជំហាន ដោយមុខសញ្ញាបានវិលត្រឡប់មកកាន់ខេត្តបាត់ដំបងវិញ។
លោកស្នងការរងបានបន្តថា នៅពេលនេះគឺលោកបានរៀបចំកំលាំង ដោយមានកម្លាំងព្រហ្មទណ្ឌកម្រិតធ្ងន់ ក្រុមបង្ការ បង្ក្រាប កម្លាំងអធិការដ្ឋាន នគរបាលស្រុកសង្កែ និងស្រុកឯកភ្នំ ដើម្បីសហការស្រាវជ្រាវរកជនដៃដល់យកមកផ្ដន្ទាទោសតាមផ្លូវច្បាប់។
នៅទីបំផុត គឺវេលាម៉ោង ១ និង ២០ នាទី រសៀលថ្ងៃទី ២៥ ខែកក្កដា ឆ្នាំ២០១៨ នេះកម្លាំងចម្រុះបានឃាត់ខ្លួនជនសង្ស័យ បាននៅចំណុចផ្ទះរបស់គេផ្ទាល់ដែលស្ថិតនៅភូមិបាសែត ឃុំតាប៉ុន ស្រុកសង្កែ ខេត្តបាត់ដំបង ដោយជនសង្ស័យរូបនេះមានឈ្មោះស៊ិន ពិសិទ្ធ ភេទប្រុស អាយុ៣០ឆ្នាំ រួមជាមួយនឹងវត្ថុតាងដែលគេបានប្លន់យកទៅគឺត្រូវសមត្ថកិច្ចប្រមូលយកមកវិញទាំងអស់ ហើយនៅពេលនេះដែរ សមត្ថកិច្ចជំនាញកំពុងអនុវត្តតាមនីតិវិធី៕
Source: Kampuchea Thmey Daily
0 Comments