ប្រធានាធិបតីបារាំងលោក Emmanuel Macron បាននិយាយកាលពីថ្ងៃអង្គារថា លោកបានត្រៀមខ្លួនដើម្បីដោះស្រាយចំពោះរឿងអាស្រូវមួយពាក់ព័ន្ធអំពើហិង្សារបស់ជំនួយការកំពូលម្នាក់ដែលបានធ្វើឲ្យប៉ះពាល់ដល់មេដឹកនាំបារាំងរូបនេះស្របពេលដែលអត្រាគាំទ្ររបស់គាត់បានធ្លាក់ចុះដល់កម្រិតទាបបំផុតមិនធ្លាប់មានក្នុងកំណត់ត្រា។
នៅឯកិច្ចប្រជុំមួយនៃតំណាងរាស្ដ្រមកពីគណបក្ស Republic on the Move របស់គាត់, លោក Macron បាននិយាយថា លោកមានអារម្មណ៍ថា “ត្រូវគេក្បត់” ដោយសារសកម្មភាពរបស់ជំនួយការ Alexandre Benalla ដែលឥឡូវនេះត្រូវបានបណ្តេញចេញហើយកំពុងប្រឈមមុខនឹងការចោទប្រកាន់ពីបទវាយដុំនិងក្លែងបន្លំធ្វើជាមន្ត្រីប៉ូលិស។
យោងតាមការកត់ត្រានៃកិច្ចប្រជុំនេះដែលទទួលបានដោយ AFP បានឲ្យដឹងថា លោក Macron បាននិយាយថា “ប្រសិនបើពួកគេស្វែងរកអ្នកទទួលខុសត្រូវនោះ គាត់គឺនៅចំពោះមុខអ្នក។ បុគ្គលតែម្នាក់គត់ដែលទទួលខុសត្រូវចំពោះកិច្ចការនេះគឺខ្ញុំហើយខ្ញុំតែម្នាក់ឯងគត់។ ខ្ញុំគឺជាអ្នកដែលជឿជាក់លើលោក Alexandre Benalla”។
គាត់បានបន្ថែមថា លោក Benalla ធ្លាប់ជាអ្នកគាំទ្រម្នាក់ក្នុងអំឡុងពេលយុទ្ធនាការឃោសនាបោះឆ្នោតរបស់គាត់និងជាបុគ្គលិកដ៏ស្មោះត្រង់ម្នាក់ប៉ុន្តែថា សកម្មភាពកាលពីថ្ងៃទី១ខែឧសភាគឺ “ធ្ងន់ធ្ងរហើយជាការខកចិត្តមួយសម្រាប់ខ្ញុំ វាជាការក្បត់”។
វីដេអូជាច្រើនបានលេចឡើងកាលពីសប្តាហ៍មុនដែលបង្ហាញថា លោក Benalla មានអាយុ២៦ឆ្នាំបានវាយបុរសម្នាក់ក្នុងអំឡុងបាតុកម្មទិវា May Day នៅទីក្រុងប៉ារីសហើយបានចាប់បោកស្ត្រីម្នាក់ផ្តួលទៅលើដី។
ជំនួយរបស់លោក Macron មិនបានប្រាប់ដល់រដ្ឋអាជ្ញាអំពីឧបទ្ទវហេតុនោះទេថ្វីបើច្បាប់តម្រូវឲ្យមន្ត្រីសាធារណៈជូនដំណឹងដល់អាជ្ញាធរប្រសិនបើមានការបំពានច្បាប់ក៏ដោយ។
រឿងអាស្រូវដែលត្រូវបានគេដាក់ឈ្មោះថា “Benallagate” នេះបានជំរុញឲ្យមានការខឹងសម្បាយ៉ាងខ្លាំងដោយគណបក្សប្រឆាំងបានអះអាងពីការប៉ុនប៉ងបិទបាំងប៉ុន្តែត្រូវបានរដ្ឋាភិបាលបដិសេធ។
លោក Benalla ត្រូវបានផ្អាកការងាររយៈពេលពីរសប្ដាហ៍ដោយគ្មានប្រាក់ខែកាលពីខែឧសភានិងត្រូវបានផ្ទេរទៅតួនាទីរដ្ឋបាលមួយបើទោះបីជាគាត់ត្រូវបានគេមើលឃើញជាញឹកញាប់នៅក្នុងសកម្មភាពជាមួយលោក Macron រហូតទាល់តែគាត់ត្រូវបានបណ្តេញចេញកាលពីថ្ងៃសុក្រក៏ដោយ៕ AFP
Source: Kampuchea Thmey Daily
0 Comments