ភ្នំពេញ ៖ មន្ត្រីសាលាសង្កាត់ច្បារអំពៅទី២ បាននិយាយថា នៅព្រឹកព្រលឹមស្រាងៗ ថ្ងៃទី២៥ខែកក្កដានេះ កម្លាំងប្រជាការពារសង្កាត់ បានចុះទៅកើបបេតុងដែលកំពប់លើទ្រូងស្ពានព្រះមុនីវង្សចាស់ស្ថិតក្នុងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ដែលបេតុង ដែលកំពប់នេះគឺត្រូវបានសាក្សីឃើញរថយន្តក្រឡុកស៊ីម៉ងត៍មកខូចម៉ាស៊ីន ហើយកំពប់ជ្រុះមុនពេលដំណើរការបន្ត។
លោកយ៉ិន វុធ ចៅសង្កាត់ច្បារអំពៅទី២បានឲ្យដឹងថា នៅព្រឹកព្រលឹមស្រាងៗថ្ងៃទី២៥ ខែកក្កដា នេះពិតជាមានរថយន្តក្រឡុកស៊ីម៉ងត៍មកខូច ហើយកំពប់ជ្រុះបេតុងលើទ្រូងស្ពានព្រះមុនីវង្សចាស់ដែលតម្រូវឲ្យកម្លាំងប្រជាការពារសង្កាត់របស់លោកចេញទៅប្រមូលកើបយកចេញចំនួន៥ការុង។
លោកចៅសង្កាត់បន្តថា បើសិនទុកចោល ហើយមិនកើបចេញបានទាន់ពេលទេនោះ អាចបង្កគ្រោះថ្នាក់ដល់អ្នកដំណើរជាមិនខាន។ នេះពុំមែនជាលើកទី១នោះទេ គឺកើតមានជាច្រើនលើកច្រើនសាណាស់ ដែលបង្កឡើងដោយរថយន្តក្រឡុកស៊ីម៉ងត៍ខូចពេលធ្វើដំណើរឡើងស្ពាន ហើយពេលខ្លះគឺរថយន្តដឹកខ្សាច់សើម ដែលខូចលើស្ពានក៏បានហូរខ្សាច់ចេញពីរថយន្តពេញលើស្ពានទៀតផង។
ទាក់ទិនទៅនឹងហេតុការណ៍ខាងលើនេះ លោកវរសេនីយ៍ឯកសារ៉ន អធិការរងនគរបាលខណ្ឌច្បារអំពៅទទួលបន្ទុកសណ្តាប់ធ្នាប់ចរាចរណ៍បានទទួលស្គាល់ថា ពិតជាមានរថយន្តក្រឡុកស៊ីម៉ងត៍ខូច ហើយកំពប់បេតុងលើស្ពាន តែម្ចាស់រថយន្តមិនបានកើបចេញទេ គឺបន្តដំណើរទៅមុខដែលករណីនេះនគរបាលនឹងស្រាវជ្រាវរកក្រុមហ៊ុនក្រឡុកស៊ីម៉ងត៍ ដែលកំពប់លើស្ពានឲ្យមកទទួលខុសត្រូវព្រោះបង្កផលប៉ះពាល់ដល់អ្នកដំណើរអាចជួបគ្រោះថ្នាក់ដល់អាយុមនុស្សទៀតផង។
លោកអធិការរងបានស្នើរឲ្យអ្នកបើកបររថយន្តត្រូវពិនិត្យមើលម៉ាស៊ីន និងកង់មុនពេលចេញដំណើរចៀសវាងខូចលើកំណាត់ស្ពានឬតាមដងផ្លូវបង្កឲ្យផលប៉ះពាល់ដល់អ្នកដំណើរខ្លាំងណាស់៕
Source: Kampuchea Thmey Daily
0 Comments