ប្រទេសក្រិក បានកាន់ទុក្ខកាលពីថ្ងៃអង្គារ បន្ទាប់ពីជួបប្រទះនឹងភ្លើងឆេះព្រៃដ៏អាក្រក់បំផុតនៅក្នុងសតវត្សនេះ។ មានការភ័យខ្លាចថាចំនួនអ្នកស្លាប់អាចនឹងកើនឡើងទៀតក្រោយពេលអ្នកស្លាប់គិតមកត្រឹមពេលនេះមានយ៉ាងតិច៧៤នាក់និង១៨៧នាក់រងរបួស។
អគ្គិភ័យដែលបានផ្ទុះឡើងកាលពីរសៀលថ្ងៃចន្ទមួយនេះបានដុតផ្ទះនិងព្រៃឈើដោយបង្ខំឲ្យពលរដ្ឋដែលមានភាពភ័យខ្លាចត្រូវភៀសខ្លួនទៅសមុទ្រដើម្បីសុវត្ថិភាពខណៈរថយន្តបានតម្រង់ជួរនៅតាមដងផ្លូវដែលពោរពេញទៅដោយផ្សែងនៃទីក្រុងមាត់សមុទ្រក្បែរទីក្រុងអាតែន។
លោកនាយករដ្ឋមន្ត្រី Alexis Tsipras ដែលបានលុបចោលដំណើរទស្សនកិច្ចរយៈពេលខ្លីមួយទៅប្រទេសបូស្នៀរបាននិយាយថា “ថ្ងៃនេះប្រទេសក្រិកកំពុងកាន់ទុក្ខ”។ លោកបានប្រកាសពីការកាន់ទុករយៈពេលបីថ្ងៃ។
ចំណែកប្រព័ន្ធផ្សព្វផ្សាយក្រិកបានហៅគ្រោះមហន្តរាយនេះថាជា “សោកនាដកម្មជាតិ”។
ទោះបីជាយ៉ាងណាក៏ដោយ រដ្ឋាភិបាលមិនទាន់បាននិយាយថាតើមានមនុស្សប៉ុន្មាននាក់ត្រូវបានគេចាត់ទុកថាបាត់ខ្លួននោះទេប៉ុន្តែចំនួនអ្នកស្លាប់អាចកើនលើសពីអគ្គិភ័យដែលបានវាយប្រហារកោះ Evia ភាគខាងត្បូងប្រទេសក្រិកកាលពីឆ្នាំ២០០៧ដែលសម្លាប់មនុស្ស៧៧នាក់ ។
សេវាអគ្គិភ័យបាននិយាយថា ក្នុងចំណោមមនុស្សសរុប១៨៧នាក់ដែលបានចូលសម្រាកក្នុងមន្ទីរពេទ្យគឺមាន៨២នាក់ដោយក្នុងនោះភាគច្រើនជាកុមារគឺកំពុងទទួលការព្យាបាលកាលពីល្ងាចថ្ងៃអង្គារខណៈមាន១០នាក់ស្ថិតក្នុង “ស្ថានភាពធ្ងន់ធ្ងរ”។
មនុស្សរាប់សិបនាក់ត្រូវបានលេបត្របាក់ដោយអណ្តាតភ្លើងនៅផ្ទះរបស់ពួកគេឬខណៈពេលកំពុងធ្វើដំណើរដោយថ្មើរជើងឬនៅក្នុងឡានរបស់ពួកគេ។ អ្នកថតរូប AFP បានឃើញសពដុតឆេះខ្លោចរបស់មនុស្សនិងសត្វឆ្កែ។
សពឆេះខ្លោចរបស់មនុស្សចំនួន២៦នាក់រួមទាំងកុមារតូចៗផងដែរត្រូវបានគេរកឃើញក្នុងវីឡាមួយនៅរមណីយដ្ឋានមាត់សមុទ្រ Mati ដែលមានចម្ងាយ៤០គីឡូម៉ែត្រភាគអាគ្នេយ៍នៃទីក្រុងអាតែន។ នេះបើតាមសម្តីរបស់អ្នកជួយសង្គ្រោះឈ្មោះ Vassilis Andriopoulos ។
អ្នកនាំពាក្យសេវាអគ្គិភ័យលោកស្រី Stavroula Maliri បាននិយាយថា ក្រុមពន្លត់អគ្គិភ័យនៅតែកំពុងស្វែងរកជនរងគ្រោះបន្ថែមទៀតនិងបានទទួលការហៅទូរស័ព្ទជាច្រើនពីអ្នកដែលស្វែងរកសាច់ញាតិ៕ AFP
Source: Kampuchea Thmey Daily
0 Comments