ភ្នំពេញ ៖ ការបោះឆ្នោតជ្រើសតាំងតំណាងរាស្ត្រ នីតិកាលទី៦ នឹងត្រូវធ្វើឡើងនៅថ្ងៃទី២៩ ខែកក្កដា ឆ្នាំ២០១៨ ខាងមុខ ចាប់ពីម៉ោង ៧ព្រឹក ដល់ម៉ោង ៣រសៀល។ សម្រាប់ការបោះឆ្នោតជាតិឆ្នាំ២០១៨នេះ នឹងអ្នកសង្កេតការណ៍អន្តរជាតិដោយស្ម័គ្រចិត្តចំនួន ២២០នាក់ តំណាងអង្គការ ស្ថាប័ន និងតំណាងប្រទេសចំនួន ៥២ នៃទ្វីបទាំង៥ នៅលើពិភពលោក រួមជាមួយអ្នកអង្កេតការណ៍ជាតិចំនួន ១០៣៦នាក់ មកពី៩៣ អង្គការសមាគមនៅទូទាំង២៥រាជធានី ខេត្ត ដើម្បីចូលរួមសង្កេតការណ៍នៅក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ខាងមុខនេះផងដែរ។
នេះបើតាមប្រសាសន៍លោក កឹមរ័ត្ន វិសិដ្ឋ ប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល និងជាប្រធានគណៈកម្មការសម្របសម្រួលការងារអ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ បានបញ្ជាក់នៅក្នុងពិធីផ្តល់ព័ត៌មានអំពីការចូលរួមរបស់ក្រុមអ្នកសង្កេតការណ៍ជាតិ និងអន្តរជាតិ ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ កាលពីរសៀលថ្ងៃទី ២៤ ខែកក្កដា ឆ្នាំ២០១៨ នៅមជ្ឈមណ្ឌលសន្និបាតកោះពេជ្រ។ លោក កឹមរ័ត្ន វិសិដ្ឋ បញ្ជាក់ថា អង្គការ ស្ថាប័នអន្តរជាតិ ដែលនឹងមកចូលរួមសង្កេតការណ៍បោះឆ្នោតនៅកម្ពុជានាពេលខាងមុខនេះ ជាអង្គការស្ថាប័នធំៗ ដែលមានបទពិសោធន៍ចូលរួមសង្កេតការណ៍បោះឆ្នោតជាតិធំៗជាច្រើនប្រទេសនៅលើពិភពលោក ដែលមានដូចជា សន្និសីទអន្តរជាតិ នៃបណ្តាគណបក្សនយោបាយនៅអាស៊ី (International Conference of Asian Political Parties) ដែលហៅកាត់ថា ICAPP ជាស្ថាប័នមួយបានបង្កើតឡើងក្នុងគោលបំណងលើកកម្ពស់កិច្ចសហប្រតិបត្តិការ និងការផ្លាស់ប្តូរយោបល់ និងទស្សនៈគ្នារវាងបណ្តាគណបក្សនយោបាយក្នុងតំបន់ ដែលមានមនោគមវិជ្ជាខុសៗគ្នា ដើម្បីបង្កើនការយល់ដឹងនិងទំនុកចិត្តគ្នាទៅវិញទៅមកក្នុងរង្វង់ប្រទេស និងប្រជាជនក្នុងតំបន់។ គិតមកត្រឹមដើមឆ្នាំ២០១៨នេះ ICAPP មានសមាជិកចំនួន ៣៥៥ គណបក្សនយោបាយ មកពី ៥២ប្រទេស។ អង្គការធំមួយទៀត ដែលចូលរួមឃ្លាំមើលការបោះឆ្នោតនាពេលខាងមុខនេះដែរ គឺអង្គការអ្នកប្រជាធិបតេយ្យនិយមកណ្ដាលអន្តរជាតិ ដែលហៅកាត់ថា “CDI’ ។ ជាពិសេសអ្នកសង្កេតការណ៍ទាំងនោះភាគច្រើនជាអ្នកតំណាងរាស្ត្រមកពីអឺរ៉ុប និងមួយចំនួនទៀតមកពីប្រទេស អ៊ីតាលី អាល្លឺម៉ង់ បារាំង អូទ្រីស។ ចំនួននេះបើប្រៀបធៀបទៅនឹងការបោះឆ្នោតជ្រើសតាំងតំណាងរាស្ត្រ នីតិកាលមុនៗ គឺមានចំនួនច្រើនជាង ហើយពួកគាត់សុទ្ធតែមានបទពិសោធន៍លើការងារសង្កេតការណ៍នៅតាមប្រទេសនានា។ អ្នកសង្កេតការណ៍ទាំងអស់នោះគឺមកតាមគោលការណ៍ស្ម័គ្រចិត្ត ហើយពួកគាត់មកនេះមិនមែនតាមការរៀបចំដោយប្រការណាមួយ ដើម្បីឱ្យពួកគាត់និយាយលំអៀងទៅខាងណានោះទេ គឺពួកគាត់នឹងនិយាយពីអ្វីដែលជាការពិត ដែលពួកគាត់មើលឃើញជាក់ស្តែងនៅកម្ពុជា។ ក្រុមអ្នកសង្កេតការណ៍ទាំងអស់នោះភាគច្រើននឹងមកដល់នៅថ្ងៃទី ២៧ ខែកក្កដា ហើយនឹងអញ្ជើញចូលជួបសម្តេចក្រឡាហោម ស ខេង នៅក្រសួងមហាផ្ទៃ។ នៅថ្ងៃទី ២៩ ខែកក្កដា ឆ្នាំ២០១៨ ពួកគេនឹងចូលរួមសង្កេតការណ៍បោះឆ្នោតទៅតាមគោលដៅដែលពួកគាត់ចង់ទៅ រហូតដល់រសៀលថ្ងៃទី ២៩ ដដែលពួកគេនឹងរៀបចំសន្និសីទសារព័ត៌មានមួយទាក់ទងនឹងការវាយតម្លៃសភាពការណ៍បោះឆ្នោតនៅកម្ពុជា។ នៅថ្ងៃ៣០ ពួកគាត់មួយចំនួនអាចអញ្ជើញទៅវិញ មួយចំនួនទៀតអាចនៅបន្តដំណើរទេសចរកំសាន្តតាមរមណីយដ្ឋានទេសចរណ៍នៅកម្ពុជា ដូចជានៅអង្គរវត្ត ខេត្តសៀមរាបជាដើម។
បើតាមរបាយការណ៍របស់គណៈកម្មាធិការជាតិរៀបចំការបោះឆ្នោតបានឱ្យដឹងថា ការបោះឆ្នោតជាតិ នីតិកាលទី៦ ឆ្នាំ២០១៨នេះ មានគណបក្សនយោបាយចំនួន ២០ ចូលរួមប្រកួតប្រជែង និងមានប្រជាជនជាង ៨លាននាក់ ជាអ្នកបោះឆ្នោតដើម្បីជ្រើសតាំងសមាជិករដ្ឋសភា នីតិកាលទី៦ ចំនួន ១២៥រូប តំណាងឱ្យរាជធានី ខេត្ត ទាំង២៥៕
Source: Kampuchea Thmey Daily
0 Comments