សិល្បករ-សិល្បការិនីបង្ហាញវត្តមានចូលរួមចែកអំណោយជនរងគ្រោះ ដោយសារទឹកជំនន់

Cambodia News July 25, 2018

ភ្នំពេញ ៖ សិល្បករ-សិល្បការិនីជាច្រើនរូប បាននាំគ្នាជិះទូកទៅចែកអំណោយដល់បងប្អូនជនរងគ្រោះដោយសារទឹកជំនន់ដល់ទីកន្លែង ក្រោមការដឹកនាំដោយលោក ហែម ដារិទ្ធ អភិបាលនៃគណៈអភិបាលខណ្ឌពោធិ៍សែនជ័យស្ថិតនៅភូមិដូនកុក សង្កាត់បឹងធំ ខណ្ឌពោធិ៍សែនជ័យ។

វត្តមានសិល្បករចូលរួមមាននៅថ្ងៃទី២៤ ខែកក្កដា ឆ្នាំ២០១៨នេះមានដូចជា៖អ្នកនាង សុន ណារីម៉ូនីការ, លោក ម៉ាដូណា,លោក អ៊ឹម ជីវ៉ា ,កញ្ញា បេបី ,លោក វុទ្ធី ,កញ្ញា អ៊ុង នីនិច្ច និងក្រុមបង្ហាញម៉ូត BN model និងសិល្បករមួយចំនួនទៀត។

លោក ហែម ដារិទ្ធ អភិបាលខណ្ឌពោធិ៍សែនជ័យមានប្រសាសន៍ថា ក្នុងនាមលោកជាអាជ្ញាធរដែន ដីពិតជាមានការសោកស្តាយយ៉ាងខ្លាំង ដែលគ្រោះធម្មជាតិទឹកជំនន់នេះ ធ្វើអោយប៉ះពាល់ដល់ការរស់នៅ និងខូចខាតទ្រព្យសម្បត្តិបងប្អូនប្រជាពលរដ្ឋមួយចំនួន តែទោះជាយ៉ាងណាក្នុងនាមលោកជាអភិបាលខណ្ឌមិនព្រងើយកន្តើយបោះបង់បងប្អូនឡើយគឺនៅជាប់កៀកបងប្អូនជានិច្ចដោយលោកបានដាក់ទីស្នាក់ការកងកម្លាំងសង្គ្រោះស្រាលនៅក្នុងភូមិរបស់បងប្អូន ដោយមានក្រុមគ្រូពេទ្យ និងម្ហូបអាហារសម្រាប់បងប្អូនទទួលទានមិនអោយខ្វះខាតឡើយ។

លោកអភិបាលបានបន្ថែមថា ការខិតខំយកចិត្តទុក្ខដាក់របស់ថ្នាក់ដឹកនាំខណ្ឌចំពោះប្រជាពលរដ្ឋក្រោមការចង្អុលបង្ហាញរបស់ឯកឧត្តម ឃួង ស្រេង អភិបាល រាជធានីភ្នំពេញ ធ្វើយ៉ាងយ៉ាងណាគឺជួយលើកទឹកចិត្តចំពោះបងប្អូនប្រជាពលរដ្ឋកុំអោយប្រជាពលរដ្ឋឯកការនៅពេលដែលពួកគាត់មានទុក្ខលំបាក មានន័យថាសុខទុក្ខរបស់ប្រជាពលរដ្ឋគឺជាសុខពួកយើង៕