​​ ទីភ្នាក់ងារ​ជាតិ​មុខរបរ និង​ការងារ​បើក​វេទិកា​ការងារ​ជ្រើសរើស​បុគ្គលិក​ជិត​១​ពាន់​កន្លែង​នៅ​ពាក់កណ្តាល​ខែ​នេះ

ភ្នំពេញ​ ៖ ទីភ្នាក់ងារ​ជាតិ​មុខរបរ និង​ការងារ នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ NEA​សហការ​ជាមួយ ក្រុមហ៊ុន​ចំនួន​១០ នឹង​រៀបចំ​វេទិកា​ការងារ នៅតាម​មជ្ឈមណ្ឌល​ការងារ​នៅ​ថ្ងៃទី​១៦ ខែសីហា ឆ្នាំ​២០១៨ ខាងមុខនេះ ដោយ​ផ្តល់ឱកាស​ការងារ​ប្រមាណ​៧៦២​កន្លែង​។

ក្រុមហ៊ុន​ធំៗ​ចំនួន​១០​ដែល​សហការ​ជាមួយ ទីភ្នាក់ងារ​ជាតិ​មុខរបរ និង​ការងារ នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ រួមមាន មីក្រូហិរញ្ញវត្ថុ មហានគរ​, ក្រុមហ៊ុន Chip Mong, ក្រុមហ៊ុន ចំរើន​, ធនាគារ AEON, ក្រុមហ៊ុន Smart, ក្រុមហ៊ុន Smile, ក្រុមហ៊ុន WorldBridge, ក្រុមហ៊ុន 103 ញូ​ប្រូ​ដាក់​សិន​, សហគ្រាស​ហ្គោ​ដ​ហៀ​ល និង​ក្រុមហ៊ុន KTH​ដែល​កិច្ចសម្ភាសន៍​ការងារ​នេះ​នឹង​ធ្វើឡើង​ចាប់ពី​ម៉ោង​៨និង០០​នាទី​ព្រឹក ដល់​ម៉ោង ៥​ល្ងាច នៅ​ទីភ្នាក់ងារ​ជាតិ​មុខរបរ និង​ការងារ ស្ថិតនៅក្នុង​ក្រសួង​ការងារ និង​បណ្តុះបណ្តាល​វិជ្ជាជីវៈ​។

ប្អូនស្រី ហែម ស្រីមុំ និស្សិត​ឆ្នាំ​ទី​៤ នៃ​វិទ្យាស្ថាន​វ៉ាន់ដា ធ្លាប់បាន​លើកឡើង​ថា វេទិកា​ការងារ ជា​កន្លែង​មួយ ដែល​ជួយ​ឲ្យ​អ្នក​ស្វែង​រក​ការងារ​ធ្វើ ឆាប់​ទទួលបាន​ការងា​រ និង​រួមចំណែក​កាត់បន្ថយ​អត្រា​អ្នក​អត់​កា​ងារ​ធ្វើបាន​ច្រើន​។

ប្អូនស្រី វណ្ណ ម៉ូ​លីកា និស្សិត​ឆ្នាំ​២ ផ្នែក​គីមីវិទ្យា​នៅ​សាកលវិទ្យាល័យ​ភូមិន្ទ​ភ្នំពេញ ធ្លាប់​បាន​ចូលរួម​វេទិកា​ការងារ​នេះ​កន្លងមក ក៏បាន​ចាត់ទុក​វេទិកា​ការងារ​របស់ ទីភ្នាក់ងារ​ជាតិ​មុខរបរ និង​ការងារ ថា​បានរួម​ចំណែក​ជាច្រើន​ក្នុង​ការ​នាំ​យក​ឱកាស​ការងារ ដល់​សិស្ស​-​និស្សិត ដែល​មាន​បំណង​ចង់​ស្វែងរក​ការងារ​។

ប្អូនស្រី​លើក​ឡើង​ថា «​វេទិកា​នេះ​ពិតជា​ល្អ​ណាស់​បង ព្រោះ​បាន​ជូ​យ​ដល់​ខ្ញុំ ក៏ដូចជា​អ្នក​កំពុង​ស្វែងរក​ការងារ​ធ្វើ ឆាប់​ទទួល​បាន​ការងារ​ធ្វើ ជាក់ស្តែង​ខ្ញុំ​ចូលរួម​ក្នុង​វេទិកា​នេះ ជា​លើក​ទី​១​ទេ តែ​ខ្ញុំ​សង្កេត​ឃើញ​ថា ការរៀបចំ​វេទិកា​នេះ​ពិតជា​ល្អ​ណាស់​ព្រោះ​បាន​ជួយ​ដល់​សិស្ស​និស្សិត ឲ្យបាន​ជួប​ដោយ​ផ្ទាល់​ជាមួយនឹង​ក្រុមហ៊ុន​នានា​»​។

ម៉ូ​លីកា ដែល​ជាប់​ការងារ​នៅ​ផ្សារ​ទំនើប Lucky ផ្នែក​រៀបចំ​បន្លែ ផ្លែឈើ បាន​បន្ថែម​ថា ខ្ញុំ​ជឿជាក់​ថា វេទិកា​នេះ​នឹង​កាន់​តែមាន​ភាព​ពេញនិយម​កាន់តែ​ច្រើនឡើង​បន្ថែម​ទៀត ពី​សំណាក់​ម្ចាស់​ក្រុមហ៊ុន នឹង​អ្នក​ស្វែង​រក​ការងារ​ធ្វើ ដោយសារតែ​ជួយ​ដល់​ក្រុមហ៊ុន​ឲ្យ​ឆាប់​ទទួល​បាន​បុគ្គលិក​ដែល​ពួកគេ​ចង់បាន​នឹង​ជួយ​ដល់​អ្នក​ស្វែង​រក​ការងារ​ឲ្យ​ទទួល​បានការ​ងារ​អ្វី​ដែល​ពួកគេ​ស្រឡាញ់​។

គួរ​បញ្ជាក់​ថា ក្នុង​ឆមាស​ទី​១ ឆ្នាំ​២០១៨ NEA បាន​ជួយ​ស្វែងរក​ការងារ​ធ្វើ​ដល់​ប្រជាពលរដ្ឋ​ខ្មែរ​បាន​ប្រមា ណ​៣២៥១​នាក់ ចុះឈ្មោះ​អ្នកស្វែងរក​ការងារ​ធ្វើបាន​ប្រមាណ ៧៥៩០​នាក់ នឹង​រៀបចំ​វេទិកា​ការងារ​បាន​ចំនួន​៤២​ដង​។

សម្រាប់​ព័ត៌មាន​បន្ថែម​សូម​ទាក់ទង​មជ្ឈមណ្ឌល​ការងារ​រាជធានី​ភ្នំពេញ តាមរយៈ​លេខ​ទូរស័ព្ទ​៖ ០១៦ ៧៨ ៦៦ ៥៥ ឬ​គេហទំព័រ​របស់​ទីភ្នាក់ងារ​ជាតិ​មុខរបរ និង​ការងារ www.nea.gov.kh និង​ទំព័រ facebook neakhmer (​អិន​អ៊ី​អេ ខ្មែរ​) ៕

Source: Kampuchea Thmey Daily