ភ្នំពេញ ៖ សម្តេចក្រុមព្រះនរោត្តម រណឫទ្ធិ ប្រធានគណបក្សហ៊្វុនស៊ិនប៉ិច ដែលបានជួបគ្រោះថ្នាក់ចរាចរណ៍កាលពីថ្មីៗនេះ បានចេញសេចក្តីសម្រេចមួយ តែងតាំងព្រះរាជបុត្រច្បង១រូប ជាប្រធានស្តីទីរបស់គណបក្សរាជានិយមហ៊្វុនស៊ិនប៉ិច នេះបើតាមសេចក្តីសម្រេច ចុះថ្ងៃទី០៨ ខែសីហា ឆ្នាំ២០១៨។
តាមសេចក្តីសម្រេច ចុះហត្ថលេខាដោយសម្តេចក្រុមព្រះនរោត្តម រណឫទ្ធិ បានឲ្យដឹងថា ទី១, សម្រេចតែងតាំងព្រះអង្គម្ចាស់ នរោត្តម ចក្រាវុឌ្ឍ ជាប្រធានស្តីទីគណបក្សហ៊្វុនស៊ិនប៉ិច ទី២, តែងតាំងលោក ពេជ្រ សូដេថ្ថា ជាអគ្គលេខាធិការប្រតិបត្តិគណបក្សហ៊្វុនស៊ិនប៉ិច។
សេចក្តីសម្រេចនោះបញ្ជាក់ថា ប្រធានស្តីទីគណបក្ស និងអគ្គលេខាធិការប្រតិបត្តិគណបក្សហ៊្វុនស៊ិនប៉ិច មានភារកិច្ច និងសិទ្ធិដូចជា ទី១, ព្រះប្រធានស្តីទីគណបក្សដឹកនាំ ចាត់ចែង សម្រេច រាល់ការងារគណបក្សហ្វ៊ុនសិនប៉ិច ឲ្យមានប្រសិទ្ធភាពខ្ពស់ នៅពេលអវត្តមានព្រះប្រធានគណបក្សក្នុងពេលសម្រាកព្យាបាលជំងឺ ទី២, អគ្គលេខាធិការប្រតិបត្តិដឹកនាំ ចាត់ចែង សម្រេចរាល់ការងាររបស់អគ្គលេខាធិការដ្ឋាននៃគណបក្សហ៊្វុនស៊ិនប៉ិច ឲ្យមានប្រសិទ្ធភាពខ្ពស់ ទី៣, ព្រះប្រធានស្ដីទីគណបក្សមានសិទ្ធិសម្រេច កែសម្រួល ផ្លាស់ប្ដូរ តែងតាំងសមាសភាពនានា តាមការចាំបាច់ និងមានសិទ្ធិអនុវត្តរាល់ការងារផ្សេងៗទៀត ដូចមានចែងនៅក្នុងលក្ខន្តិកៈគណបក្សហ៊្វុនស៊ិនប៉ិច។
សូមបញ្ជាក់ថា ព្រះអង្គម្ចាស់ នរោត្តម ចក្រាវុឌ្ឍ គឺជាព្រះរាជបុត្រច្បងរបស់សម្តេចក្រុមព្រះនរោត្តម រណឫទ្ធិ ជាមួយម្ចាស់ក្សត្រិយ៍ ម៉ារី រណឫទ្ធិ។
សម្តេចក្រុមព្រះនរោត្តម រណឫទ្ធិ បានរងរបួសយ៉ាងដំណំក្នុងករណីគ្រោះថ្នាក់ចរាចរណ៍ដ៏រន្ធត់មួយ ដែលបណ្តាលមកពីរថយន្តតាក់ស៊ី ជែងរថយន្តផ្សេងទៀត ហើយជ្រុលមកបុកក្បួនរថយន្តរបស់ព្រះអង្គ នៅស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ គ្រោះថ្នាក់ចរាចរណ៍នេះបានបណ្តាលឲ្យអ្នកម្នាង អ៊ុក ផល្លា រណឫទ្ធិ ទទួលមរណភាព រួមទាំងអ្នករួមដំណើរមួយចំនួនទៀតរងរបួស។ ចំណែកសម្តេចក្រុមព្រះ ត្រូវបានបញ្ជូនទៅព្យាបាលនៅក្រៅប្រទេសរហូតមក។ ទោះជាយ៉ាងណា សុខភាពពិតប្រាកដរបស់សម្តេចក្រុមព្រះ ដែលមានព្រះជន្ម៧៤ព្រះវស្សា នៅមិនទាន់ដឹងច្បាស់នៅឡើយទេ បើទោះបីមានមន្ត្រីខ្លះនិយាយថា ព្រះសុខភាពរបស់ព្រះអង្គ មានភាពប្រសើរជាងមុនហើយ ព្រះអង្គនឹងយាងចូលរួមបោះឆ្នោតនៅកម្ពុជា ប៉ុន្តែជាក់ស្តែងព្រះអង្គមិនបានយាងមកបោះឆ្នោតនោះទេ៕
Source: Kampuchea Thmey Daily
0 Comments