សៀមរាប ៖ ក្រុមយុវជនជិះម៉ូតូប្រើបំពង់ស៊ីមាំងធំៗ បង្កឲ្យឮខ្លាំង នាំឲ្យរំខានដល់អ្នកដទៃនិងភ្ញៀវទេសចរណ៍នោះ ត្រូវបានមន្ត្រីនគរបាលចរាចរខេត្តសៀមរាប ឃាត់ទុកបានជាង១០គ្រឿងដើម្បីអប់រំ។
លោកវរសេនីយ៍ឯក ជិម សុវណ្ណនាយការិយាល័យចរាចរផ្លូវគោកខេត្តសៀមរាប បានឲ្យដឹងថា ដោយមានបទបញ្ជារបស់លោកអភិបាលខេត្ត និងមានការណែនាំពីលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប ទើបកម្លាំង ការិយាល័យចរាចរណ៍ផ្លូវគោកខេត្តសៀមរាប បានចុះដាក់នៅតាមគោលដៅ ត្រួតពិនិត្យនិងចាប់ដកហូត ម៉ូតូដាក់បំពង់ស៊ីមាំងកែច្នៃ ខុសបច្ចេកទេស ដែលធ្វើឲ្យ មានសម្លេងខ្លាំង រំខាន ដល់អ្នកដទៃនៅពេលយប់ហើយ តម្រូវឲ្យ ម្ចាស់ម៉ូតូ យករបស់ដើម [របស់ហ្សីន ] មកប្តូរនៅមុខសមត្ថកិច្ច ទើបប្រគល់ម៉ូតូឲ្យវិញ។
លោកបន្តថា ការចុះចាប់នេះនឹងធ្វើដូចភ្លៀងរលឹម ដោយយោងតាមការណែនាំ របស់លោកឧត្តមសេនីយ៍ស្នងការខេត្ត។ លោកថានៅយប់មិញ ចាប់បានម៉ូតូដាក់បំពង់ស៊ីមាំងខុសបច្ចេកទេស បានចំនួន១៣គ្រឿង។ ជាមួយគ្នានេះ នគរបាលចរាចរ សំណូមពរដល់បងប្អូនប្រជាពលរដ្ឋ ជាពិសេសអ្នកដែលមាននិងកំពុងប្រើប្រាស់ ម៉ូតូស៊ីមាំងកែច្នៃ សូមកែសម្រួលឡើងវិញ ជៀសវាង ខាតបង់ថវិកានិងពេលវេលា៕
Source: Kampuchea Thmey Daily
0 Comments