រតនគីរី ៖ រថយន្តបាឡែនដឹកឈើប្រណិតខុសច្បាប់ កំពុងពេញនិយមត្រូវប៉ាន់ សមត្ថកិច្ចជំនាញ និងស្ថាប័នពាក់ព័ន្ធមិនបានបង្ក្រាប។ ជាក់ស្ដែង កាលពីវេលាម៉ោង៤និង៣០នាទីរសៀល ថ្ងៃទី១ ខែសីហា ឆ្នាំ២០១៨កន្លងទៅ រថយន្តបាឡែន១គ្រឿង ផ្ទុកឈើប្រណិតខុសច្បាប់ពេញប្រៀប បានខូចនៅកណ្ដាលផ្លូវជាតិទាំងថ្ងៃ ស្ថិតនៅក្នុងភូមិថារ៉ងជង ឃុំអូរជុំ ស្រុកអូរជុំ គ្មានសមត្ថកិច្ចណាហ៊ានបង្ក្រាប នោះទេ។
ប្រភពពីតៃកុងរថយន្តដឹកឈើ បានឲ្យដឹងថា រថយន្តដឹកឈើនេះ មានម្ចាស់ឈ្មោះ វ៉ា ភេទប្រុស ជាម្នាក់រត់ការឲ្យសមត្ថកិច្ចទូទាំងខេត្តរួចរាល់អស់ហើយ គ្មានសល់ម្នាក់ណាទេ បើអ្នកកាសែតចង់ថតអីក៏ថតចុះមិនខ្វល់ទេ ហើយក៏មិនឈឺក្បាលនោះដែរ។
ប្រភពព័ត៌មាន ពីក្រុមអ្នករកស៊ីដឹកឈើប្រណិតខុសច្បាប់ដូចគ្នា បានឲ្យដឹងថា ឈ្មោះ វ៉ា នេះសព្វថ្ងៃមានរថយន្តបាឡែនចំនួន២គ្រឿង ដឹកឈើយ៉ាងសកម្មចេញពីស្រុកវើនសៃ ចូលក្រុងបានលុង យកមកចែកចាយនៅក្នុងខេត្ត។
ពួកគាត់បានបន្តទៀតថា ឈ្មោះ វ៉ា បានស៊ីឈ្នួលដឹកឈើឲ្យជនជាតិវៀតណាមម្នាក់ ជាថៅកែមានលុយដុល្លារច្រើនមកបំផ្លាញព្រៃឈើនៅទឹកដីខេត្តរតនគីរី ស្ទើរតែរលាយហិនហោចអស់គ្មានសល់ទេ។
ហើយឈ្មោះ វ៉ា មានរថយន្តបាឡែន២គ្រឿង ពាក់ស្លាកលេខដូចគ្នា ពណ៌ប្រផេះ ភ្នំពេញ 2S-3178 ជាស្លាកលេខក្លែងក្លាយ ហើយក្រុមនេះបានត្អូញត្អែរថា រកស៊ីដឹកឈើខុសច្បាប់សព្វថ្ងៃនេះមិនសូវចំណេញនោះទេ មូលហេតុសមត្ថកិច្ចមាន ជាង៧០ស្ថាប័នដេកចាំទទួលលុយបង់ខែ នឹងបង់ជើងសរុប១ឡានបាឡែន ក្នុង១ខែអស់លុយ ចំនួន៤០០០ដុល្លារ។
លោក ឡេង យុគ នាយផ្នែករដ្ឋបាលព្រៃឈើ កាន់ចំនួន៣ស្រុក គឺស្រុកអូរជុំ ស្រុកវើនសៃ នឹងស្រុកតាវែង សារព័ត៌មានយើងមិនអាចសុំការទំនាក់ទំនងបានទេ៕
Source: Kampuchea Thmey Daily
0 Comments