ភ្នំពេញ ៖ ឆ្លើយតបជាមួយ នឹងការលើកឡើង ក៏ដូចជាការផ្សព្វផ្សាយមួយចំនួន ដែលថា ជប៉ុនបានបង្ហាញការមិនពេញចិត្តចំពោះការបោះឆ្នោតនៅកម្ពុជានោះ អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា លោក កេត សោផាន់ ដែលបានចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥១ នៅប្រទេសសិង្ហបុរីដែរនោះ បានអះអាងថា ជប៉ុនជាប្រទេសមួយដែលបានជួយជាសម្ភារៈ (ហឹបឆ្នោត) នៅក្នុងការបោះឆ្នោតនៅកម្ពុជា ហើយជប៉ុនចង់ឃើញកម្ពុជាមានការរីកចម្រើន និងជំរុញឲ្យកម្ពុជាអនុវត្តការងាររបស់ខ្លួនបន្តទៅទៀត។
លោក កេត សោផាន់ លើកឡើងបែបនេះ កាលពីព្រឹកថ្ងៃទី០៩ ខែសីហា ឆ្នាំ២០១៨ គឺបន្ទាប់ពីជំនួបរវាងលោកជំទាវ ល្វីស មុស៊ីគីវ៉ាបូ (Louise Mushikiwabo) រដ្ឋមន្ត្រីការបរទេស កិច្ចសហប្រតិបតិ្តការ និងសហគមន៍អាហ្វ្រិកបូព៌ា នៃសាធារណរដ្ឋរ៉ូវ៉ាន់ដា (Rwanda) អមដោយលោក ម៉ាម៉ាឌី ទូរ៉េ (Mamadi Touré) រដ្ឋមន្ត្រីការបរទេសនៃសាធារណរដ្ឋហ្គីណេ ជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា។
លោក កេត សោផាន់ បានថ្លែងប្រាប់ក្រុមអ្នកសារព័ត៌មានថា នៅឯកិច្ចប្រជុំរដ្ឋមន្ត្រីការបរទេសអាស៊ានលើកទី៥១ នៅប្រទេសសិង្ហបុរី លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានជួបទ្វេភាគីជាមួយរដ្ឋមន្ត្រីការបរទេសជប៉ុន ហើយជប៉ុនជាប្រទេសមួយដែលបានជួយជាសម្ភារៈនៅក្នុងការបោះឆ្នោតនៅកម្ពុជា គឺជប៉ុនចង់បន្តឃើញកម្ពុជាមានការរីកចម្រើន និងត្រៀមខ្លួន ជំរុញឲ្យកម្ពុជាបន្តការអនុវត្តការងាររបស់ខ្លួនបន្តទៅទៀត។ លោកបន្តថា នៅក្នុងជំនួបនោះ ក៏បានពិភាក្សាផងដែរ អំពីសន្លឹកឆ្នោត ដែលអសុពលភាព ហើយជាការឆ្លើយតប លោកទេសរដ្ឋមន្ត្រី បានប្រាប់ទៅរដ្ឋមន្ត្រីក្រសួងការបរទេសជប៉ុនថា នេះគឺជាសិទ្ធិស្វ័យសម្រេចរបស់ប្រជាពលរដ្ឋ ជាបំណងប្រាថ្នារបស់ប្រជាពលរដ្ឋ ដែលបានចេញទៅបោះឆ្នោត ហើយពេលនេះ ប្រជាពលរដ្ឋបានសម្តែងនូវបំណងប្រាថ្នារបស់ខ្លួន។ ទោះជាយ៉ាងណា នៅក្នុងកិច្ចប្រជុំរដ្ឋមន្ត្រីការបរទេសអាស៊ាន នៅប្រទេសសិង្ហបុរីនោះ មិនមានការសម្តែងនូវការរិះគន់ចំពោះការបោះឆ្នោតនៅកម្ពុជានោះទេ។
ចំពោះការបោះឆ្នោតជ្រើសតាំងតំណាងរាស្ត្រ នីតិកាលទី៦ នៅកម្ពុជា កាលពីថ្ងៃទី២៩ ខែកក្កដា ឆ្នាំ២០១៨ កន្លងមកនេះ អ្នកនាំពាក្យក្រសួងការបរទេសកម្ពុជា បានបញ្ជាក់ថា រហូតមកដល់ពេលនេះ មានប្រទេសជាច្រើនបានអបអរសាទរមានដូចជា ប្រទេសចិន ឥណ្ឌា រុស្ស៊ី ទីម័រឡេសខាងកើត ស្រីលង្ការ វៀតណាម ឡាវ ហ្វីលីពីន ថៃ...។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួម ហើយជាលទ្ធផល មានប្រជាពលរដ្ឋកម្ពុជាបានអញ្ជើញទៅបោះឆ្នោតចំនួន៦.៩៤៦.១៦៤នាក់ ដែលស្មើនឹង៨២,៨៩ ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប៨.៣៨០.២១៧នាក់។ ក្រោយការបោះឆ្នោតភ្លាម អ្នកសង្កេតការណ៍ជាតិ អន្តរជាតិបានវាយតម្លៃថា ដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ បានបញ្ចប់ក្រោមបរិយាកាសល្អ រលូន ត្រឹមត្រូវ សេរី និងយុត្តិធម៌ និងមានការគោរពច្បាប់ គោរពសិទ្ធិមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្ដាប់ធ្នាប់ល្អ។
ទន្ទឹមនិងការសាទរចំពោះលទ្ធផលនេះ ក៏នៅមានបណ្តឹងមួយចំនួនផងដែរ ដែលធ្វើឡើងដោយតំណាងគណបក្សនយោបាយ ដែលបានចូលរួមប្រកួតប្រជែង ហើយបើតាម គ.ជ.ប ទទួលបាន២៥២៥បណ្តឹង។ ក្នុងនោះ គណបក្សប្រជាជនកម្ពុជាមានចំនួន៣បណ្តឹង គណបក្សសម្ព័ន្ធដើម្បីប្រជាធិបតេយ្យចំនួន២៥២០បណ្តឹង និងគណបក្សប្រជាធិបតេយ្យមូលដ្ឋានចំនួន២បណ្តឹង៕
Source: Kampuchea Thmey Daily
0 Comments