ភ្នំពេញ ៖ សំណើនេះ ត្រូវបានធ្វើឡើងនៅក្នុងជំនួបរវាងលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ជាមួយលោកស្រី ធីណា ស៊ូស្សាន រីតវ៉ា (Tina Susan Redshaw) ឯកអគ្គរដ្ឋទូតនៃចក្រភពអង់គ្លេសប្រចាំកម្ពុជា ចូលជួបសម្តែងការគួរសម និងពិភាក្សាការងារ កាលពីថ្ងៃទី១៦ ខែសីហា ឆ្នាំ២០១៨។
បន្ទាប់ពីជំនួបពិភាក្សានោះ លោក កេត សោផាន់ អនុរដ្ឋលេខាធិការ និងជាអ្នកនាំពាក្យក្រសួងការបរទេសបានថ្លែងប្រាប់អ្នកសារព័ត៌មានថា នៅក្នុងជំនួបនោះ លោកទេសរដ្ឋមន្ត្រី ប្រាក់ សុខុន បានថ្លែងអំណរគុណ ដែលលោកស្រី Tina Susan Redshaw ត្រូវបានតែងតាំងជាឯកអគ្គរដ្ឋទូតនៃចក្រភពអង់គ្លេសប្រចាំកម្ពុជា ហើយលោកបានជូនពរឲ្យលោកស្រីបំពេញការងារប្រកបដោយជោគជ័យ ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ។
តាមលោក កេត សោផាន់ នៅក្នុងជំនួបនោះ ភាគីទាំងពីរបានពិភាក្សាគ្នាលើបញ្ហាជាច្រើន ទាំងថ្នាក់តំបន់ និងអន្តរជាតិ ហើយទាក់ទងកិច្ចសហប្រតិបត្តិការរវាងប្រទេសទាំងពីរ គឺកម្ពុជា និងចក្រភពអង់គ្លេស ភាគីទាំងពីរបានសន្យាថា នឹងជំរុញកិច្ចសហប្រតិបត្តិការទ្វេភាគីឲ្យរឹងមាំបន្ថែមទៀត ហើយលោកទេសរដ្ឋមន្ត្រីបានអះអាងថា ផ្អែកតាមបទពិសោធន៍របស់លោកស្រីនឹងអាចធ្វើឲ្យទំនាក់ទំនងទ្វេភាគី ជាពិសេសអនុស្សរណៈនៃការពិគ្រោះយោបល់គ្នារវាងក្រសួងការបរទេសនៃប្រទេសទាំងពីរ ដែលអនុស្សរណៈនេះ មានបំណងផ្លាស់ប្ដូរមតិយោបល់ និងកិច្ចការផ្សេងៗ ដែលបម្រើឲ្យប្រទេសទាំងពីរ ក៏ដូចជានៅក្នុងតំបន់។
លោក កេត សោផាន់ បានអះអាងថា វិស័យអប់រំក៏ត្រូវបានលើកឡើងផងដែរ នៅក្នុងជំនួបពិភាក្សានោះ ជាពិសេសបញ្ហាទំនាក់ទំនងរវាងវិទ្យាស្ថានការទូតរវាងប្រទេសទាំងពីរ ជាពិសេសការសិក្សាតាមអនឡាញ។
ទាក់ទងបញ្ហាវិស័យដោះមីននៅកម្ពុជា លោកទេសរដ្ឋមន្ត្រី ក៏បានថ្លែងអំណរគុណដល់ចក្រភពអង់គ្លេស ដែលបានកន្លងមកបានផ្តល់ជំនួយដល់កម្ពុជា តាមរយៈអង្គការហេឡូត្រាស់ និងបានស្នើឲ្យអង់គ្លេសផ្ដល់ជំនួយការដល់វិទ្យាស្ថានដោះមីនរបស់អាស៊ាន ដែលមានទីតាំងនៅភ្នំពេញ។
ទាក់ទងបញ្ហាដោះមីននេះដែរ លោកស្រីឯកអគ្គរដ្ឋទូតបានលើកឡើងថា នៅសប្តាហ៍ក្រោយនេះអនុរដ្ឋមន្ត្រីការបរទេសនៃចក្រភពអង់គ្លេស នឹងបំពេញទស្សនកិច្ចនៅប្រទេសកម្ពុជាលោកនឹងជួបជាមួយអង្គការហេឡូត្រាស់ នៅខេត្តសៀមរាប មុនបន្តដំណើរទៅទីក្រុងវៀងច័ន្ទប្រទេសឡាវ ហើយលោកស្រីបានអះអាងថា នៅពេលឆាប់ៗនេះនឹងមានសេចក្តីប្រកាសមួយទាក់ទងនឹងជំនួយរបស់ចក្រភពអង់គ្លេសលើវិស័យដោះមីននៅកម្ពុជារយៈពេលបីឆ្នាំ។ តាម លោកស្រី Tina Susan Redshaw ការផ្ដល់ជំនួយលើវិស័យដោះមីននេះ ដោយសារតែរាជរដ្ឋាភិបាលកម្ពុជា មានការប្ដេជ្ញាចិត្តខ្ពស់លើវិស័យដោះមីន។
ដោយឡែកលើបញ្ហាពាណិជ្ជកម្ម សារតែកម្ពុជា និងចក្រភពអង់គ្លេស មានទំនាក់ទំនងផ្នែកពាណិជ្ជកម្ម ហើយមានការរីកចម្រើនផងនោះ លោកទេសរដ្ឋមន្ត្រី ប្រាក់ សុខុន បានជំរុញឲ្យមានការផ្លាស់ប្ដូរទស្សនៈកិច្ច របស់ធុរៈជនកម្ពុជា ទៅកាន់ប្រទេសអង់គ្លេស ហើយលោកទេសរដ្ឋមន្ត្រី ក៏បានស្នើឲ្យចក្រភពអង់គ្លេសផ្ដល់នូវប្រព័ន្ធអនុគ្រោះ សម្រាប់ប្រទេស ដែលមានការអភិវឌ្ឍន៍តិចតួច (LDC) ក្នុងនោះមានកម្ពុជាផងដែរ។
លើវិស័យអប់រំ លោកស្រីឯកអគ្គរដ្ឋទូតបានបញ្ជាក់ថា អង់គ្លេសមានកិច្ចសហប្រតិបត្តិការលើវិស័យអប់រំនេះរយៈពេល២ ឆ្នាំ គឺផ្នែកវិទ្យាសាស្ត្រ និងគណិតវិទ្យា ហើយពេលនេះ បានឈានដល់វិស័យមួយទៀត គឺការបណ្ដុះបណ្ដាលដល់យុវជន ដែលផ្ដល់ឱកាសឲ្យពួកគេ ស្វែងរកជំនាញផ្សេងៗក្នុងការចិញ្ចឹមជីវិត។
ចំពោះកិច្ចសហប្របត្តិការជាមួយអាស៊ានចក្រភពអង់គ្លេសកំពុងបង្កើនកិច្ចសហប្រតិបត្តិការរបស់ខ្លួន ក្នុងការចូលរួមជាមួយអាស៊ាន ដើម្បីក្លាយជាដៃគូសន្ទនាតាមវិស័យនីមួយៗ។
ដោយឡែកទាក់ទងទៅនឹងការបោះឆ្នោតនៅប្រទេសកម្ពុជា លោកទេសរដ្ឋមន្ត្រី ប្រាក់ សុខុន បានជម្រាបលោកស្រីឯកអគ្គរដ្ឋទូតនៃចក្រភពអង់គ្លេសថា ការចេញមកបោះឆ្នោតរបស់ប្រជាពលរដ្ឋជាង៨៣ភាគរយ បញ្ជាក់ថា ប្រជាពលរដ្ឋពិតជាបានជ្រើសរើស និងបង្ហាញនូវសិទ្ធិនយោបាយរបស់ខ្លួន ហើយបើទោះបីជាមានបណ្ដាប្រទេសមួយចំនួន បានធ្វើការរិះគន់ការបោះឆ្នោតនៅកម្ពុជាក៏ដោយ ប៉ុន្តែជាសមត្ថភាពជាក់ស្តែង បានបង្ហាញថា ប្រជាពលរដ្ឋកម្ពុជាបានជ្រើសរើសនៅផ្លូវដើរ ឬការសម្រេចចិត្តរបស់ខ្លួន ហើយដើម្បីឆ្លើយតបចំពោះប្រជាពលរដ្ឋដែលបានចេញមកបោះឆ្នោតនេះ រាជរដ្ឋាភិបាលថ្មី នឹងខិតខំបន្ថែមទៀត ដើម្បីបំពេញបំណងប្រាថ្នារបស់ប្រជាជន៕
Source: Kampuchea Thmey Daily
0 Comments