ប្រធាន​ក្រុម​ជម្រើសជាតិ​នារី​របស់​កម្ពុជា ជាប់​អាហារូបករណ៍​ទៅ​សិក្សា​នៅ​ប្រទេស​អាមេរិក

កីឡាការិនី​បាល់ទាត់ ហួត គឹមហុង សមាជិក​ក្នុង​ក្រុមបាល់ទាត់​នារី​របស់​ក្លិប​ភ្នំពេញ​ក្រោ​ន និង​ជា​ប្រធាន​ក្រុម​ប្រចាំ​ជម្រើសជាតិ​បាល់ទាត់​នារី​កម្ពុជា ត្រៀម​ចាក​ចេញពី​មាតុភូមិ​ទៅ​សិក្សា​នៅ​សហរដ្ឋអាមេរិក​រយៈពេល​២​ឆ្នាំ ខណៈ​រូបគេ​ក៏​នឹង​ក្លាយជា​កីឡាការិនី​ប្រចាំ​សាលា​ថ្មី​របស់គេ​នេះ​ផងដែរ​។

សាមីខ្លួន​បាន​បញ្ជាក់​ថា រូបគេ​នឹង​ធ្វើ​ដំណើរ​ទៅកាន់​សហរដ្ឋអាមេរិក វេលា​ម៉ោង​១០​យប់​ថ្ងៃអាទិត្យ ទី​១៩ ខែសីហា ឆ្នាំ​២០១៨ នេះ​ដោយ​នឹង​ចំណាយពេល​នៅ​ទីនោះ ២​ឆ្នាំ​ប៉ុន្តែ​ប្រសិនបើ​នាង​ទទួលបាន​លទ្ធផល​ល្អ​ក្នុង​ការ​សិក្សា​ភាគី​អាមេរិក​នឹង​ផ្តល់​ឱកាស​អាហារូបករណ៍​គ្រប់ ៤​ឆ្នាំ​តែម្តង​។​សាលា​ដែល​រូប​បាន​ទទួល​អាហារូបករណ៍​ឈ្មោះថា​សាលា Bryant and Stratton College ដែល​ស្ថិតនៅ​ទីក្រុង​ញូវយ៉ក​។

ម្ចាស់​គ្រាប់​បាល់​ច្រើន​ជាង​ឲ្យ​កម្ពុជា ពេល​ប៉ះ​ទី​ម័​រ​ខាងកើត កាល​ពី​ពេល​ថ្មីៗ​រូបនេះ​បញ្ជាក់​ថា មូលហេតុ​ដែល​ខ្លួន​ទទួល​បាន​ឱកាស​នៅ​ក្រៅ​ប្រទេស​នេះ​ ដោយសារ​ការ​ជ្រោមជ្រែង​ពី​ជនបរទេស​មួយរូប​ឈ្មោះ Rick Beal ព្រោះតែ​រូបនាង​គឺជា​គ្រូបង្វឹក​កូនៗ​របស់​គ្រួសារ​អាមេរិគ​មួយ​នេះ​។ គីម​ហុង បានបង្ហាញ​ចំណាប់អារម្មណ៍​របស់ខ្លួន​ថា «​ខ្ញុំ​មាន​ក្តី​រីករាយ​មែនទែន​នៅពេលដែល​ខាង​សាលា​ទាក់ទង​ដោយ​ប្រាប់​ថា ខ្ញុំ​បានជា​ប់​អាហារូបករណ៍​ហើយ​ក្រោយ​ឆ្លងកាត់​ការប្រលង និង​សម្ភាសន៍​រួចមក ហើយ​នៅ​ទីនោះ​ក្រៅពី​ការសិក្សា​ជំនាញ​គ្រប់គ្រង ខ្ញុំ​ក៏​នឹង​ក្លាយជា​កីឡាការិនី​បាល់ទាត់​ប្រចាំ​សាលា​ផងដែរ​»​។



កីឡាការិនី ហួត គីម​ហុង ធ្លាប់​បានទទួល​ការបណ្តុះបណ្តាល​នៅ​អង្គការ Mighty Girls ក្នុង​ខេត្តបាត់ដំបង​ជាទី​ដែល​រូប​នាង​បាន​ផ្លាស់​ប្តូរជីវិត​រហូត​មក​ដល់​បច្ចុប្បន្ន​ក្រោយពី​បាន​ចូល​ហ្វឹកហាត់​កីឡាបាល់ទាត់​រួចមក។ ដោយ​ការ​ខិតខំ​ព្យាយាម គួបផ្សំ​ជាមួយនឹង​ទេពកោសល្យ​ពី​ធម្មជាតិ​ផង​នោះ គីម​ហុង បាន​វិវត្តន៍​ខ្លួន​រហូត​ក្លាយជា​កីឡាការិនី​អាជីព​មួយ​រូប​នៅក្នុង​ក្លឹប​ភ្នំពេញ​ក្រោ​ន ព្រមទាំង​ជាប់​ជា​កីឡាការិនី​ក្រុម​នារី​ជម្រើសជាតិ​កម្ពុជា​ដោយមាន​តួនាទី​ជា​ប្រធាន​ក្រុម​ក្នុង​ព្រឹត្តិការណ៍ AFF Women’s Championship 2018 និង​រកបាន ៧​គ្រាប់​នៅក្នុង​ជំនួប​ជាមួយ​ក្រុមទី​ម័​រ​ខាងកើត​៕

 

Source: Kampuchea Thmey Daily