សៀមរាប ៖ យោងតាមប្រភពព័ត៌មានច្បាស់ការ ដែលផ្តល់មកថាស្ត្រីជនសង្ស័យ(ប្រពន្ធ)បានសម្រេចចិត្តចាក់សម្លាប់ប្តីរបស់ខ្លួនដោយសារតែខឹងប្តីបានចុះចេញពីផ្ទះអស់រយៈពេលជាច្រើនខែទៅរស់នៅជាមួយស្រីថ្មី។
ប្រភពខ្សឹបប្រាប់ថា ស្ត្រីជនសង្ស័យដែលចាក់សម្លាប់ (ប្តី)ជាមន្ត្រីនគរបាលប៉ុស្តិ៍គោកចក ចំនួន១០កាំបិត បណ្តាលឲ្យស្លាប់ភ្លាមៗនោះ គឺបណ្តាលមកពីរឿងប្រច័ណ្ឌ ប្តីមានស្រី និងទំនាស់ក្នុងគ្រួសារជាយូរខែមកហើយ ទើបឈានដល់បែបនេះ។ ទើបរៀបគំរោងការហៅប្តីមកផ្ទះ ដោយយកលេសថាកូនឈឺ លឺដូច្នេះជនរងគ្រោះជាប្តីបានមកឌុបកូនទៅពេទ្យរួចរាល់ក៏ជិះម៉ូតូមកផ្ទះវិញ គ្រានោះជនសង្ស័យបានព្យាយាមលួងលោមប្តីឲ្យមករួមរស់ជាមួយគ្នាវិញតែប្តីមិនព្រម ទើបកើតរឿងនឹកឃើញយកកាំបិតមកចាក់សម្លាប់ប្តីតែម្តង។ ដោយគិតខ្លីថា បើខ្លួនមិនបានចឹងនរណាក៏មិនបានដែរ។ ចំណែកស្ត្រីកំណាន់គឺជាស្ត្រីមេម៉ាយ ប្តីជាប់គុក។
បន្ទាប់ពីទទួលសេចក្តីរាយការណ៍ពីបងប្អូនប្រជាពលរដ្ឋ និង ដោយមានបទបញ្ជារយ៉ាងម៉ឺងម៉ាត់ពីលោក ឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប ក៏ដូចជាលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌ នគរបាលក្រុងសៀមរាប បានធ្វើការរក្សានិងពិនិត្យកន្លែងកើតហេតុ ហើយបើកការស្រាវជ្រាវ ដោយមានការចូលរួមពីសមត្ថកិច្ចជំនាញ។
លទ្ធផលពិនិត្យកន្លែងកើតហេតុ និងនៅលើសាកសពជនរងគ្រោះ មានស្នាមចាក់ដោយកាំបិតចំនួន១០ចំណុច ដោយឡែកសម្ភារៈទ្រព្យសម្បត្តិរបស់ជនរងគ្រោះមិនមានការបាត់បង់ឡើយ ហើយបានសន្និដ្ឋានថា ករណីនេះ ជាករណីគំនុំ។
លោក វរសេនីយ៍ត្រី នួន សក្តិ័ចំរើនរិទ្ធ អធិការរងទទួលផ្នែកព្រហ្មទណ្ឌ បានឲ្យដឹងថា បន្ទាប់ពីរូបលោក បានធ្វើការស្រាវជ្រាវ យ៉ាងយកចិត្តទុកដាក់ អស់រយៈពេល៧ម៉ោង នៅវេលាម៉ោង១៣និង០០នាទីថ្ងៃដដែល មន្ត្រីនគរបាលយុត្តិធម៌យើង បានធ្វើការកំណត់អត្តសញ្ញាណជនសង្ស័យ និងនាំខ្លួនយកមកធ្វើការសាកសួរ។
លោកបន្តថា ជនសង្ស័យមានឈ្មោះ សុខ លីនី ភេទស្រី អាយុ ២៦ឆ្នាំ មានទីកន្លែងកំណើត នៅភូមិដើមចន្ទ សង្កាត់ច្បារអំពៅ២ ខណ្ឌមានជ័យ រាជធានីភ្នំពេញ ត្រូវជាភរិយា របស់ជនរងគ្រោះ ទៅមន្ទីរពេទ្យ ព្រោះកូនឈឺហើយក្អួតចេញមកឈាម។
លោកបន្ថែមថា ជនសង្ស័យបានឆ្លើយសារភាពថា មុនពេលកើតហេតុ កាលពីយប់វេលាម៉ោង២៤និង២៥នាទី ឆ្លងចូលថ្ងៃទី១៥ខែសីហា នៅចំណុចផ្ទះរបស់ជនសង្ស័យ ស្ថិតក្នុងក្រុមទី១១ ភូមិឆ្លកអណ្តូង សង្កាត់ស្លក្រាម ក្រុងសៀមរាប ជនសង្ស័យបាន យកទូរស័ព្ទ ខលទៅជនរងគ្រោះ ឈ្មោះហ៊ឹម វណ្ណារ៉ូ ដើម្បីឲ្យមកជួយយកកូន តបវិញថា ចាំស្អែកទៅ។ លុះដល់វេលាម៉ោង០១និង១៣នាទី ជនសង្ស័យបានធ្វើការខលទៅម្តងទៀត ដោយប្រាប់ជនរងគ្រោះថា បងឆាប់មកៗកូនយើងកាន់តែមិនស្រួលមែនទែនហើយ ជនរងគ្រោះក៏បានធ្វើដំណើរចេញពីកន្លែងធ្វើការ ដើម្បីទៅយកជនសង្ស័យនិងកូនទៅមន្ទីរពេទ្យ។
ចំណែកប្រភពមួយទៀតបាននិយាយថា ចំពោះរឿងករណីឃាតកម្មចាក់សម្លាប់ ប៉ូលិស ដែលត្រូវជាប្តីនោះ មិនមែនស្ត្រី ជនសង្ស័យ ធ្វើតែម្នាក់ឯងទៅរួចទេ បើមិនមានអ្នកជួយ ក្រៅពីសាច់ញាតិ ឬមិត្តភ័ក្កិ ចាប់២ទៅ៣នាក់ទេនោះ ក៏មិនអាចចាក់សម្លាប់រហូតដល់ទៅ១០កាំបិត ក្នុងនោះត្រូវចំពីមុខចំនួន៩កាំបិត និង ក្រោយខ្នង បោះដៃផុត ១កាំបិត ទៀត បណ្តាលឲ្យស្លាប់ភ្លាមៗផងដែរ ព្រោះជនរងគ្រោះ ដែល ជាមន្ត្រីប៉ូលិសប៉ុស្តិ៍សង្កាត់គោកចក មានមាឌធំល្មមដែរ រឿងអី ចាញ់ស្រីម្នាក់នោះ វាមិនអាចទៅកើតទេ ប្រហែលស្ត្រីរូបនោះយកទោសកំហុសជាប់គុកតែម្នាក់ឯង មិនឲ្យមានការពាក់ព័ន្ធដល់អ្នកដទៃឡើយ ឬសាច់ញាតិរបស់ខ្លួនឡើយ។
លោកយិន ស្រាង អ្នកនាំពាក្យនៃសាលាដំបូងខេត្តសៀមរាបបានឲ្យដឹងនៅរសៀលថ្ងៃទី១៧នេះថា បច្ចុប្បន្នជនសង្ស័យត្រូវបានកម្លាំងនគរបាលជំនាញរៀបចំសំណុំរឿងបញ្ជូនមកកាន់តុលាការហើយលោកចៅក្រមបានសម្រេចចោទប្រកាន់ជនសង្ស័យពីបទឃាតកម្ម និងនាំយកទៅឃុំខ្លួនបណ្តោះអាសន្ននៅពន្ធនាគារនៅល្ងាចនេះផងដែរ៕
Source: Kampuchea Thmey Daily
0 Comments