សហព័ន្ធកីឡាបាល់ទាត់អន្តរជាតិ ឬ ហៅកាត់ថា FIFA បានបញ្ចេញតារាងចំណាត់ថ្នាក់ក្រុមបាល់ទាត់ទាំងអស់ជាសមាជិករបស់ខ្លួន (FIFA World Ranking) ដែលមាន ២០៦ ប្រទេស ប្រចាំខែ សីហា ឆ្នាំ២០១៨ នៅល្ងាចថ្ងៃព្រហស្បតិ៍ ទី១៧ ខែកក្កដា ថ្មីៗនេះស្របពេលក្រុមកម្ពុជា នៅឈរចំណាត់ថ្នាក់ចំនួនលេខ១៦៦ ពោលគឺចំណាត់ថ្នាក់នៅស្មើនឹងខែមុន។
យោងតាមវិបសាយ fifa.com បានបញ្ជាក់ថា តារាងចំណាត់ថ្នាក់នេះគិតចាប់ពីថ្ងៃទី១៧ ខែសីហា រហូតដល់ថ្ងៃទី១៧ ខែកញ្ញា ឆ្នាំ២០១៨ ខាងមុខ។ តារាងចំណាត់ថ្នាក់នេះមិនមានការប្រែប្រួលច្រើនព្រោះក្រុមជម្រើសជាតិកម្ពុជា មិនមានសកម្មភាពប្រកួតកាលពីខែកក្កដា កន្លងទៅ ពោលគឺមានសកម្មភាពតាំងពីខែមីនា ម្ល៉េះក្រោយបានប្រកួតឈ្នះលើក្រុមឡាវ ក្នុងប្រកួតមិត្តភាពអន្តរជាតិ ១ទល់០ តែចាញ់ក្រុមអាហ្វហ្គានីស្ថាន ២ទល់១ ក្នុងប្រកួតជម្រុះជើងឯកទ្វីបអាស៊ី (AFC Asian Cup 2019 UAE)។
សរុបតារាងចំណាត់ថ្នាក់ប្រចាំតំបន់អាស៊ាន ប្រទេសវៀតណាម ឡើងមកឈរកំពូលតារាង៨ខែជាប់គ្នា ដោយឈរលេខ១០២ពិភពលោក បន្ទាប់ពីវ៉ាដាច់ហ្វីលីពីន នៅលេខ១១៥ តាមពីក្រោយក្រុមថៃ ឈរលេខ១២២ពិភពលោក ,មីយ៉ាន់ម៉ា លេខ១៣៨,ឥណ្ឌូណេស៊ី លេខ១៦៤, កម្ពុជា លេខ១៦៦, សឹង្ហបុរី លេខ ១៦៩, ម៉ាឡេស៊ី លេខ១៧១, ឡាវ លេខ១៧៨,ទីម័រខាងកើត លេខ១៩០ និងប្រ៊ុយណេ លេខ១៩៥។
បើរាល់តារាងចំណាត់ថ្នាក់ក្រុមល្អទាំង១០ ប្រចាំទ្វីបអាស៊ី ក្នុងខែមិថុនា នេះមានអ៊ីរ៉ង់បានឡើងមកឈរលេខ៣២ ពិភពលោកក្នុងតារាងក្រោយទម្លាក់ក្រុមអូស្ត្រាលី ឲ្យឈរលេខ៤៣ពិភពលោក,ជប៉ុន លេខ៥៥, កូរ៉េខាងត្បូង លេខ៥៧, អារ៉ាប់ប៊ីសាអ៊ូឌីត លេខ៧០, ស៊ីរី លេខ៧៣, ចិន លេខ៧៥, អារ៉ាប់រួម លេខ៧៧, លីបង់ លេខ ៧៩, និងអូម៉ង់ លេខ៨៤ពិភពលោក។
សម្រាប់ចំណាត់ថ្នាក់ក្រុមខ្លាំងជាងគេប្រចាំពិភពលោកក្នុងខែសីហា នេះគឺបារាំងបានឡើងមកឈរចំណាត់ថ្នាក់លេខ១ ក្រោយឈ្នះជើងឯកពានរង្វាន់ 2018 FIFA World Cup ខណៈក្រុមប៊ែលហ្សិច ឈរលេខ២ ហើយប្រេស៊ីល ឈរលេខ៣ ,ក្រូអាត លេខ ៤, ប្រទេសអ៊ុយរ៉ាហ្គាយ ឈរលេខ៥, អង់គ្លេស លេខ៦, ព័រទុយហ្គាល់ លេខ៧, ស្វីស លេខ៨, អេស្ប៉ាញ ឡើងមកលេខ ៩ ស្ទួនជាមួយក្រុមជម្រើសជាតិ ដាណឺម៉ាក៕
Source: Kampuchea Thmey Daily
0 Comments