កំណែទម្រង់​ព្រហ្មទណ្ឌ​នេ​ប៉ាល់​ ធ្វើ​ឲ្យ​មានការ​ព្រួយបារម្ភ​អំពី​សេរីភាព​សារព័ត៌មាន

ប្រទេស​នេ​ប៉ាល់​ បាន​ណែនាំ​ក្រមព្រហ្មទណ្ឌ​ថ្មី​មួយ​កាលពី​ថ្ងៃ​សុក្រ​ដែល​នឹង​ធ្វើ​ឲ្យ​ការ​ចែករំលែក​ព័ត៌មាន​សម្ងាត់​ក្លាយទៅជា​បទល្មើស​មួយ​ដែល​អាច​ជាប់ពន្ធនាគារ​ ហើយ​វា​បង្ក​ឲ្យ​មានការ​ព្រួយបារម្ភ​ក្នុងចំណោម​អ្នកកាសែត​ថា ច្បាប់​នេះ​អាច​ត្រូវ​បាន​ប្រើ​ដើម្បី​គ្រប់គ្រង​សារព័ត៌មាន។

ប្រព័ន្ធ​ផ្សព្វ​ផ្សាយបាន​ព្រមាន​ថា រដ្ឋាភិបាល​ដឹកនាំ​ដោយ​អ្នក​កុម្មុយនិស្ត​ដែល​បង្ហាញ​នូវ​ការមិន​អត់ឱន​ចំពោះ​អ្នកប្រឆាំង​គឺ​អាច​ប្រើ​ពាក្យ​មិន​ច្បាស់លាស់​ណាមួយ​ដើម្បី​បំបិទមាត់​អ្នក​រិះគន់។

ច្បាប់​ថ្មី​នេះ​នឹង​ធ្វើ​ឲ្យ​ការ​បោះពុម្ពផ្សាយ​ព័ត៌មាន​ឯកជន ថត​សំឡេង​ឬ​ថតរូប​ដោយ​គ្មាន​ការ​អនុញ្ញាត​ត្រូវ​ជាប់ពន្ធនាគារ​រហូត​ដល់​ទៅ​៣​ឆ្នាំ​និង​ពិន័យ​ជា​ប្រាក់។

ការ​បោះ​ពុម្ព​ផ្សាយ​មាតិកា​ដែល​បំផ្លាញ​កេរ្តិ៍ឈ្មោះ​របស់​មនុស្ស​ម្នាក់​ដោយផ្ទាល់​ឬ​តាមរយៈ​ការ​ដៀលត្មះ​ក៏​នឹង​ទទួលទោស​ដូច​គ្នា​នេះ​ផងដែរ។

ប្រធាន​សហព័ន្ធ​អ្នកកាសែត​នេ​ប៉ាល់​លោក Govinda Acharya បាន​ប្រាប់ AFP ថា “​ច្បាប់​ទូទៅ​ទាំងនេះ​អាច​ត្រូវបាន​គេ​ប្រើ​ដោយ​មិន​ត្រឹមត្រូវ​ដើម្បី​បំបិទមាត់​អ្នកកាសែត​និង​បំបាត់​ការរាយការណ៍​ស៊ើបអង្កេត​”​។​

ចំណែក​អ្នក​គូររូប​ថ្លុក​នយោបាយ​ដ៏​លេចធ្លោ​លោក Rajesh KC បាន​ព្រមាន​ថា ច្បាប់​ថ្មី​នេះ​បានបង្ហាញ​ពី​ការធ្លាក់ចុះ​ទៅរក “​អំណាច​ផ្តាច់ការ​”​។​

លោក KC បាន​និយាយថា “​ការងារ​របស់​យើង​គឺ​ដើម្បី​ចង្អុលបង្ហាញ​ពី​កំហុសឆ្គង​និង​ការរំលោភបំពាន​របស់​អ្នក​ដែលមាន​អំណាច​ប៉ុន្តែ​ច្បាប់​ទាំងនេះ​អាច​បង្ខំ​ឲ្យ​មានការ​ត្រួតពិនិត្យ​ខ្លួនឯង​”​។​

លោក​បាន​បន្ថែមថា “​វា​ប៉ះពាល់​ដល់​លទ្ធិប្រជាធិបតេយ្យ​របស់​យើង​”​។​
សារព័ត៌មាន Kathmandu Post បាន​អំពាវនាវ​ឲ្យ​រដ្ឋាភិបាល​ពិចារណា​ឡើងវិញ​នូវ​ច្បាប់​ទាំងនេះ​ដែល​អាច​ត្រូវបាន​ប្រើ​ដើម្បី​កាត់ទោស​អ្នកកាសែត។

ឧស្សាហកម្ម​ប្រព័ន្ធ​ផ្សព្វផ្សាយ​របស់​ប្រទេស​នេប៉ាល់​បាន​រីកចម្រើន​ចាប់តាំងពី​របប​រាជាធិបតេយ្យ​ត្រូវ​បាន​ផ្ដួលរំលំ​កាល​ពី​មួយ​ទសវត្សរ៍​មុន​បន្ទាប់ពី​សង្គ្រាមស៊ីវិល​ដ៏​ឃោរឃៅ​មួយ​។​
រដ្ឋធម្មនុញ្ញ​ថ្មី​ដែល​បាន​អនុម័ត​នៅ​ឆ្នាំ​២០១៥​បានការ​ពារ​សិទ្ធិ​សេរីភាព​សារព័ត៌មាន​និង​ហាមប្រាម​ការ​ត្រួតពិនិត្យ​សារព័ត៌មាន៕ AFP

​

Source: Kampuchea Thmey Daily