ភ្នំពេញ ៖ ការស្ទង់មតិរបស់វិទ្យុអាស៊ីសេរី ដែលមានរយៈពេល៧ថ្ងៃ ត្រូវបានបិទបញ្ចប់ទាំងស្រុងហើយ នៅវេលាមម៉ោង២៣ និង៤៥ នាទីយប់ថ្ងៃទី១៤ ខែកញ្ញា ឆ្នាំ២០១៨ ហើយលទ្ធផលបានបង្ហាញយ៉ាងច្បាស់ក្រឡែតថា ប្រជាពលរដ្ឋខ្មែររហូតទៅដល់៩១ ភាគរយ បានបោះឆ្នោតគាំទ្ររាជរដ្ឋាភិបាលអាណត្តិទី៦ ដែលដឹកនាំដោយគណបក្សប្រជាជនកម្ពុជា និងមានមតិ៩ ភាគរយប៉ុណ្ណោះ ដែលមិនគាំទ្រ។
បន្ទាប់ពីគណបក្សប្រជាជនកម្ពុជាឈ្នះអាសនៈទាំងអស់នៅក្នុងរដ្ឋសភា និងដឹកនាំរាជរដ្ឋាភិបាលក្នុងអាណត្តិថ្មីនោះ វិទ្យុអាស៊ីសេរី (RFA) បានរៀបចំការស្ទង់មតិមួយ នៅលើទំព័រ Facebook ផ្លូវការរបស់ខ្លួន រយៈពេល១សប្តាហ៍ ដើម្បីចង់ដឹងអំពីចំណាប់អារម្មណ៍របស់ប្រជាជនខ្មែរទៅលើការដឹកនាំរបស់គណបក្សប្រជាជនកម្ពុជា។ ការស្ទង់មតិរបស់វិទ្យុអាស៊ីសេរី ដែលជាវិទ្យុទទួលបានការឧបត្ថម្ភគាំទ្រពីសហរដ្ឋអាមេរិកនេះ បានបញ្ចប់នៅវេលាម៉ោង២៣ និង៤៥នាទីយប់ ថ្ងៃទី១៤ ខែកញ្ញា ឆ្នាំ២០១៨ ដោយមានអ្នកចូលរួមបោះឆ្នោតចំនួនជាង៨ម៉ឺន៧ពាន់នាក់ (87.2K) ក្នុងនោះ អ្នកដែលបានបោះឆ្នោតគាំទ្រ មានចំនួន 79K ទទួលស្គាល់ស្មើនឹង៩១ភាគរយ និងអ្នកដែលមិនបានបោះឆ្នោតគាំទ្រ មានត្រឹមតែ 8K ស្មើនឹង៩ភាគរយប៉ុណ្ណោះ។ ដូច្នេះតាមរយៈការស្ទង់មតិរយៈពេល៧ថ្ងៃនេះ បានបង្ហាញឲ្យឃើញថា ប្រជាពលរដ្ឋភាគច្រើនលើសលប់បានគាំទ្រដល់រាជរដ្ឋាភិបាលថ្មី ដែលដឹកនាំដោយគណបក្សប្រជាជនកម្ពុជា។
ទោះជាយ៉ាង មជ្ឈដ្ឋានជាច្រើនបានលើកឡើងថា ការរៀបចំការស្ទង់មតិរបស់វិទ្យុអាស៊ីសេរីនាពេលនេះ គ្រាន់តែជាការចង់ផ្ចាញ់ផ្ចាលមកលើរាជរដ្ឋាភិបាលស្របច្បាប់របស់កម្ពុជាតែប៉ុណ្ណោះ ហើយទោះជាគ្មានលទ្ធផលការស្ទង់មតិនេះ ក៏រាជរដ្ឋាភិបាលថ្មី ដែលដឹកនាំដោយសម្តេចតេជោ ហ៊ុន សែន ត្រូវបានស្វាគមន៍ និងទទួលស្គាល់រួចទៅហើយ ដោយប្រជាពលរដ្ឋខ្មែរនៅទូទាំងប្រទេស និងសហគមន៍អន្តរជាតិ ជាពិសេសបណ្តាប្រទេសសំខាន់ធំៗដូចជា ចិន រុស្ស៊ី ជប៉ុន អាល្លឺម៉ង់ កូរ៉េ អាស៊ាន បណ្តាប្រទេសជាច្រើននៅក្នុងតំបន់ និងអឺរ៉ុប៕
Source: Kampuchea Thmey Daily
0 Comments