ភ្នំពេញ ៖ ក្រសួងសុខាភិបាល បានបង្កើនការព្យាបាលអ្នកជំងឺប្រកបដោយគុណធម៌និងសមធម៌ ដើម្បីធានាការព្យាបាលជូនដល់ប្រជាពលរដ្ឋមានប្រសិទ្ធភាពឆាប់ជាសះស្បើយ។
ថ្លែងនៅក្នុងពិធីចែកសម្ភារៈប្រើប្រាស់ដល់ស្ត្រីឆ្លងទន្លេរួច នៅមន្ទីរពេទ្យរុស្ស៊ីកាលពីពេលថ្មីៗនេះលោកស្រីវេជ្ជបណ្ឌិតចក ធីតា អនុប្រធានមន្ទីរពេទ្យ មិត្តភាពខ្មែររុស្ស៊ីបានឲ្យដឹងថា ក្រសួងសុខាភិបាលបានផ្តោតការព្យាបាលអ្នកជំងឺជា៣ប្រភេទ គឺការបង់លុយ មូលនិធិសមធម៌ និងរបបបេឡាជាតិសន្តិសុខសង្គម។
លោកស្រីបញ្ជាក់ថា ទោះបីការព្យាបាលអ្នកជំងឺក្រីក្រដោយមិនបង់ប្រាក់តាមរយៈមូលនិធិសមធម៌ ឬ របបបេឡាជាតិសន្តិសុខសង្គមក៏ដោយ ក៏ការព្យាបាលធានាគុណភាពដូចអ្នកបង់លុយដែរ ពោលគឺគ្មានការរើសអើងអ្វីឡើយ។
អ្នកស្រីទិត្យ សុខី ជាកម្មការិនីរោងចក្រកាត់ដេរសម្លៀកបំពាក់នៅរាជធានីភ្នំពេញបានឲ្យដឹងថា ការមកទទួលសេវាព្យាបាលនៅមន្ទីរពេទ្យរដ្ឋបច្ចុប្បន្ននេះគឺមានភាពងាយស្រួល ហើយមិន អស់លុយកាកថែមទៀតផងបន្ទាប់ពីមានប័ណ្ណបេឡាជាតិរបបសន្តិសុខសង្គមឬប.ស.ស មកនោះ។
អ្នកស្រីបានបន្តថា ក្រុមគ្រូពេទ្យបានយកចិត្តទុកដាក់ក្នុងការព្យាបាលជំងឺជូនប្រជាពលរដ្ឋប្រកបដោយភាពកក់ក្តៅដូចអ្នកជំងឺដទៃទៀតដែលបង់លុយផ្ទាល់។ អ្នកស្រីបានបញ្ជាក់ថា ការព្យាបាលដោយយកចិត្តទុកដាក់និងមិនអស់កម្រៃសេវានេះ បានជួយសម្រាល ការលំបាកជូនដល់ប្រជាពលរដ្ឋក្រីក្របានច្រើនក្នុងបន្ទុកជីវភាព។
លោកវេជ្ជបណ្ឌិត ចាន់វិចិត្រ នាយករងមន្ទីរពេទ្យមិត្តភាពខ្មែរសូវៀតបានឲ្យដឹងដែរថា អ្នកជំងឺដែលមកទទួលសេវាព្យាបាលជំងឺនៅមន្ទីរពេទ្យមិត្តភាពខ្មែរសូវៀតភាគច្រើនមានជីវភាពក្រីក្រ។ជាក់ស្តែងនៅផ្នែកសេវាសម្ភពវិញមានស្ត្រីមកសម្រាលបុត្រប្រមាណជិត៥០ភាគមានជីវភាពក្រីក្ររួមទាំងកម្មករកម្មាការិនីផងដែរ។
លោកវេជ្ជបណ្ឌិតបានបន្តទៀតថា បើទោះបីជាមានអ្នកជំងឺមកទទួលសេវាមានជីវភាពក្រីក្រច្រើនតែមន្ទីរពេទ្យតែងតែធ្វើការណែនាំដល់បុគ្គលិកទាំងអស់ត្រូវបង្កើនការយកចិត្តទុកដាក់ពិនិត្យនិងព្យាបាលជំងឺឲ្យមានភាពស្មើៗគ្នាមិនថាបង់លុយ ឬ ឥតបង់លុយនោះទេពិសេសត្រូវគោរពក្រមសីលធម៌វិជ្ជាជីវៈជាគ្រូពេទ្យដើម្បីធ្វើយ៉ាងណាឲ្យអ្នកជំងឺដែលមកទទួលសេវមានភាពកក់ក្តៅ។
សូមបញ្ជាក់ថា ក្រសួងសុខាភិបាលបានអនុវត្តគម្រោងលើកកម្ពស់គុណភាព និងសមធម៌ សុខាភិបាល ក្នុងរយៈពេល៥ឆ្នាំចាប់ពីឆ្នាំ២០១៦ដល់២០២១ ដើម្បីពង្រឹងការផ្តល់សេវាសុខាភិបាលជូនដល់ប្រជាពលរដ្ឋក្រីក្រអោយមានប្រសិទ្ធិភាព និងស្មើភាពដូចនឹងប្រជាពលរដ្ឋដទៃទៀតដែលមានជីវភាពធូរធារ៕
Source: Kampuchea Thmey Daily
0 Comments