ភ្នំពេញ ៖ ស្ថានបេសកកម្មនៃព្រះរាជាណាចក្រកម្ពុជា ប្រចាំនៅសហភាពអឺរ៉ុប បានចេញសេចក្តីថ្លែងការណ៍មួយ ដោយចាត់ទុកសេចក្តីសម្រេចរបស់សភាពអឺរ៉ុប កាលពីថ្ងៃទី១៣ ខែកញ្ញា ឆ្នាំ២០១៨ ពាក់ព័ន្ធនឹងកម្ពុជានោះថា ធ្វើឡើងដោយលម្អៀង មានស្តង់ដារពីរ ហើយចេញសេចក្តីសម្រេចចិត្ត តាមការចង្អុលបង្ហាញរបស់អតីតមេដឹកនាំគណបក្សប្រឆាំង គឺលោក សម រង្ស៊ី។
ស្ថានបេសកកម្មនៃព្រះរាជាណាចក្រកម្ពុជា ប្រចាំនៅសហភាពអឺរ៉ុប ធ្វើសេចក្តីថ្លែងការណ៍នេះ បន្ទាប់ពីសភាអឺរ៉ុប បានបើកកិច្ចប្រជុំមួយពិភាក្សាកាលពីថ្ងៃទី១៣ ខែកញ្ញា ទាក់ទងស្ថានភាព និងលទ្ធិប្រជាធិបតេយ្យនៅក្នុងប្រទេសកម្ពុជា។ ជាមួយគ្នានោះ ហើយសភាអឺរ៉ុបបានបោះឆ្នោតអនុម័តលើសេចក្តីសម្រេចចិត្តមួយស្តីពីស្ថានការណ៍នៅក្នុងកម្ពុជា ដោយបានស្នើដល់រដ្ឋាភិបាលកម្ពុជា ឲ្យទម្លាក់គ្រប់បទចោទប្រកាន់ និងដោះលែងលោក កឹម សុខា ឲ្យមានសេរីភាពពេញលេញឡើងវិញ។ ក្រៅពីនោះ សភាអឺរ៉ុបក៏ទារឲ្យកម្ពុជាស្តារប្រជាធិបតេយ្យ នីតិរដ្ឋ និងគោរពសិទ្ធិមនុស្ស និងសិទ្ធិសេរីភាពជាមូលដ្ឋានដទៃទៀតផងដែរ។
ទាក់ទងបញ្ហានេះ នៅក្នុងសេចក្តីថ្លែងការណ៍ចំនួន៣ទំព័រ ដែលបណ្តាញព័ត៌មានយើងទើបទទួលបាននៅព្រឹកថ្ងៃទី១៥ ខែកញ្ញា ឆ្នាំ២០១៨ តំណាងកម្ពុជា បានអះអាងថា សេចក្តីសម្រេចចិត្តរបស់សភាអឺរ៉ុប ដែលបានអនុម័តនៅថ្ងៃទី១៣ ខែកញ្ញា គឺផ្អែកទៅលើការអះអាងមិនពិត និងមិនស្មោះត្រង់ពីក្រុមជ្រុលនិយមកម្ពុជា ដែលការពារដោយ សហភាពអឺរ៉ុប និងផ្អែកលើរបាយការណ៍លម្អៀងទាំងឡាយរបស់គណបក្សប្រឆាំង និងអង្គការមិនមែនរដ្ឋាភិបាល ដែលមានរបៀបវារៈនយោបាយ ហើយពាក្យពេចន៍ និងទម្រង់ប្រើក្នុងរបាយការណ៍ទាំងនេះ ពិតជាត្រូវបានចម្លងចេញពីប្រភពតែមួយ ហើយអ្វីដែលគួរឲ្យសោកស្តាយបំផុត គឺពាក្យពេចន៍ទាំងនោះត្រូវបានគេបញ្ចូលទៅក្នុងសេចក្តីសម្រេចចិត្តរបស់សភាអឺរ៉ុបនាពេលនេះ។
សេចក្តីថ្លែងការណ៍របស់ស្ថានបេសកកម្មនៃព្រះរាជាណាចក្រកម្ពុជាប្រចាំសហភាពអឺរ៉ុប ចុះថ្ងៃទី១៣ ខែកញ្ញា ឆ្នាំ២០១៨ បានលើកឡើងយ៉ាងនេះថា ចាប់តាំងពីបដិសន្ធិខ្លួនក្នុងឆ្នាំ១៩៧៩សភាអឺរ៉ុបនេះហើយ តែងតែបានអនុម័តមិនដែលខាននូវរាល់សេចក្តីសម្រេចចិត្តប្រឆាំង នឹងអាជ្ញាធរកម្ពុជា ដែលសេចក្តីសម្រេចទាំងនោះ បានបង្កប់នូវរបៀបវារៈនយោបាយ ដែលជំរុញដោយមហាអំណាចបរទេស ឬពួកក្រុមប្រឆាំង។ ស្មារតីដដែលនេះ បានស្តែងឲ្យឃើញយ៉ាងពិតប្រាកដតាមរយៈសេចក្តីសម្រេចចិត្ត ដែលបានអនុម័តនៅថ្ងៃនេះ ជាពិសេសបើយោងតាមសម្ដីបុគ្គលគណបក្សប្រឆាំងកម្ពុជាម្នាក់សេចក្តីសម្រេចចិត្តនេះ ត្រូវបានតាក់តែងឡើងតាមការចង្អុលបង្ហាញរបស់បុគ្គលរូបនេះ។
រាជរដ្ឋាភិបាលកម្ពុជាសូមរំលឹកជូនសភាអឺរ៉ុបអំពីទុក្ខសោកវេទនាដ៏សែនឈឺចាប់នៃសោកនាដកម្មក្នុងទសវត្សរ៍ឆ្នាំ១៩៧០ ដែលការឈឺចាប់របស់អ្នករស់រានមានជីវិតពីសោកនាដកម្មនេះ បានអូសបន្លាយបន្តអស់រយៈពេល១២ឆ្នាំ ដោយសារតែបំរាមជំនួយអភិវឌ្ឍន៍ពីសំណាក់រដ្ឋាភិបាលលោកខាងលិច ដែលទទួលការគាំទ្រជាចំហរដោយសភាអឺរ៉ុប។ នេះសបញ្ជាក់ឲ្យឃើញថា ប្រទេសដែលបានដកហូតពីប្រជាជនកម្ពុជាអស់រយៈពេល១២ឆ្នាំ នូវសិទ្ធិទទួលបានចំណីអាហារ សុខភាព ជម្រក ការអប់រំ ការងារ និងសិទ្ធិទទួលបានសន្តិភាព គឺជាប្រទេសដដែលដែលកំពុងតិចទៀនអាជ្ញាធរកម្ពុជា ក្រោមលេសលើកដំកើងសិទ្ធិមនុស្ស។ វាពិតជាពិបាកណាស់សម្រាប់ប្រជាជនកម្ពុជា ក្នុងការផ្ដល់ជំនឿទុកចិត្ត ឬភាពស្របច្បាប់ចំពោះជំហរបែបនេះ ដែលទាក់ទងនឹងការប្រើប្រាស់សិទ្ធិជាមូលដ្ឋានរបស់ប្រជាពលរដ្ឋ។
តាមស្ថានបេសកកម្មកម្ពុជាប្រចាំនៅសហភាពអឺរ៉ុប ទោះបីជាមានការលំបាក និងបន្ទុកធ្ងន់ធ្ងរពីអតីតកាលកន្លងទៅ ក៏កម្ពុជាសម្រេចបាននូវការអភិវឌ្ឍដ៏គួរឲ្យគត់សម្គាល់ជាមួយនឹងអត្រាកំណើនផលិតផលក្នុងស្រុកសរុបប្រចាំឆ្នាំ៧ភាគរយ។ សម្រាប់រយៈពេល២០ឆ្នាំចុងក្រោយអត្រាភាពក្រីក្របានធ្លាក់ចុះក្រោម១០ភាគរយ អត្រាចូលរៀនបានកើនឡើងខ្ពស់ជាង៩០ភាគរយ សម្រាប់ការអប់រំថ្នាក់បឋមសិក្សា និង៨៥ភាគរយ សម្រាប់ថ្នាក់មធ្យមសិក្សា។ ការងាររាប់លានកន្លែងត្រូវបានបង្កើត និងប្រជាជនថ្នាក់កណ្ដាល បានក៏កើតមានឡើងវិញផងដែរ។ ការអភិវឌ្ឍន៍ទាំងអស់នេះ នឹងមិនអាចកើតមានបានឡើយ ប្រសិនបើគ្មានការប្រកាន់ខ្ជាប់ទាំងស្រុងរបស់រាជរដ្ឋាភិបាលកម្ពុជា ចំពោះនយោបាយសេរីពហុបក្ស សេរីភាពបញ្ចេញមតិ និងសេដ្ឋកិច្ចសេរីនិយម។
សេរីភាពបញ្ចេញមតិមិនអាច និងមិនមែនជាសេរីភាពនៃការជេរប្រមាថ បង្កាច់បង្ខូច បរិហារកេរ្តិ៍ និងវាយប្រហារមកលើភាពថ្លៃថ្នូររបស់បុគ្គលនោះទេ។ សេរីភាពប្រឆាំងនឹងរដ្ឋាភិបាល ក៏មិនមែនជាសេរីភាពក្នុងការសាបព្រោះការបំបែកបំបាក់សង្គម ការអំពាវនាវឲ្យមានការស្អប់ខ្ពើមជាតិសាសន៍ និងការញុះញង់ ឲ្យមានការរើសអើងជនជាតិបរទេសនោះទេ។ សេរីភាពខាងនយោបាយត្រូវបានបញ្ឈប់ភ្លាម នៅពេលដែលទង្វើទាំងនោះ បង្កហានិភ័យដល់សន្តិភាព និងសន្តិសុខសាធារណៈ។ ការបង្ករឿងច្រើនរូបភាព របស់អ្នកញុះញង់មួយចំនួន ដែលប្រទេសអឺរ៉ុបខ្លះចាត់ទុកថា ជាអ្នករងគ្រោះប្រជាធិបតេយ្យនោះ បានបង្កើតឲ្យមានភាពតានតឹងជាអចិន្ត្រៃយ៍រវាងកម្ពុជា ជាមួយប្រទេសជិតខាងដ៏ធំមួយ និងបានរារាំងដល់ការដោះស្រាយបញ្ហាព្រំដែន។ ផ្ទុយទៅវិញមនុស្ស ដែលប្រើប្រាស់វិធីសាស្ត្រ និងការអនុវត្តទាំងនេះ បែរទៅជាមនុស្សដែលសភាអឺរ៉ុបស្តាប់ និងជឿទៅវិញ។
រាជរដ្ឋាភិបាលកម្ពុជាផ្ដល់តម្លៃចំពោះកិច្ចពិភាក្សាដេញដោលបែបប្រជាធិបតេយ្យ ថាជាកិច្ចសន្ទនា ដែលកំពុងដំណើរការរវាងតួអង្គជាតិទាំងឡាយ ដោយឈរលើការគោរពគ្នាទៅវិញទៅមក ការឯកភាពជាតិ និងការគោរពយ៉ាងខ្ជាប់ខ្ជួន ចំពោះកិច្ចសហប្រតិបត្តិការអន្តរជាតិ ប៉ុន្តែគួរឲ្យសោកស្ដាយ គំនិតប្រជាធិបតេយ្យតាមបែបលក្ខណៈកម្ពុជា មិនត្រូវបានផ្ដល់តំលៃ ឬទទួលយកឡើយ ដោយបណ្ដាប្រទេសលោកខាងលិចភាគច្រើន។
យើងមានភស្តុតាងគ្រប់គ្រាន់ ដើម្បីបង្ហាញហេតុផលត្រឹមត្រូវ ក្នុងការចាត់វិធានការតាមផ្លូវច្បាប់ចំពោះគណបក្សប្រឆាំងមួយ រួមទាំងប្រធាន និងថ្នាក់ដឹកនាំគណបក្សនេះ។ ដូចករណីក្នុងឆ្នាំ១៩៧០ សោកនាដកម្មដ៏ខ្លោចផ្សា ដែលពិភពលោកបានដឹងទាំងអស់គ្នា គឺបណ្ដាលមកពីការរួមគំនិតធ្វើអំពើក្បត់ ដោយមានការគាំទ្រផ្នែកហិរញ្ញវត្ថុ និងបច្ចេកទេសពីមហាអំណាចបរទេសមួយ ដើម្បីផ្ដួលរំលំរដ្ឋាភិបាលស្របច្បាប់មួយ តាមមធ្យោបាយផ្ទុយនឹងរដ្ឋធម្មនុញ្ញ។ សម្រាប់ប្រជាជនកម្ពុជា មិនអាចបំភ្លេចបាននូវភាពឈឺចាប់បង្កឡើងដោយប្រទេសមហាអំណាចនេះបានទេ ហើយជាមេរៀនអតីតកាល យើងនឹងទប់ស្កាត់កុំឲ្យមានអំពើអាក្រក់កើតឡើងនៅពេលបច្ចុប្បន្នតទៅទៀត។
គ្មានប្រទេសណាមួយក្នុងពិភពលោកយើងនេះ អាចអនុញ្ញាតឲ្យមហាអំណាចបរទេសមួយ មកដល់ហិរញ្ញវត្ថុ និងណែនាំឲ្យគណបក្សនយោបាយមួយ ដើម្បីជួយផ្ដួលរំលំរដ្ឋាភិបាលស្របច្បាប់បាននោះទេ ប៉ុន្តែចំពោះសភាអឺរ៉ុបវិញ នៅពេលដែលនិយាយដល់ប្រទេសកម្ពុជា ពួកគេបែរជាបិទភ្នែក ធ្វើមិនដឹងមិនឮ ចំពោះទង្វើបែបនេះទៅវិញ។ ជាការពិតដែលមិនអាចប្រកែកបាន គឺប្រជាជនកម្ពុជាបានផ្ដល់ការគាំទ្រដល់អ្នកដែលបានការពារពួកគេក្នុងការបង្ការមិនឲ្យមានសង្គ្រាមស៊ីវិលកើតមានសាជាថ្មី។
ស្ថានបេសកកម្មកម្ពុជាប្រចាំនៅសហភាពអឺរ៉ុបលើកឡើងទៀតថា យុទ្ធនាការឃោសនាបោះឆ្នោត និងការបោះឆ្នោតកាលពីថ្ងៃទី២៩ ខែកក្កដា ឆ្នាំ២០១៨ កន្លងទៅ ជាគំរូដ៏ល្អ និងត្រូវបានវាយតម្លៃខ្ពស់ដោយអ្នកសង្កេតការណ៍ជាតិ និងអន្តរជាតិ និងភ្នាក់ងារគណបក្សរាប់ពាន់នាក់ ដែលតំណាងឲ្យគណបក្សនយោបាយចូលរួមប្រកួតប្រជែងចំនួន២០។ ការមិនចូលរួមក្នុងការបោះឆ្នោតរបស់គណបក្សមួយ ដែលត្រូវបានហាមឃាត់ ក្រោមបទល្មើសសន្ទិដ្ឋិភាពជាមួយបរទេស នឹងអំពើក្បត់ជាតិ មិនអាចធ្វើអោយខូចនូវដំណើរការបោះឆ្នោត ដែលមានលក្ខណៈពហុបក្ស សេរី និងយុត្តិធម៌ បាននោះទេ។
ក្នុងចំនោមអ្នកចុះឈ្មោះបោះឆ្នោតចំនួន៨៣៨០២១៧ មានអ្នកទៅបោះឆ្នោតរហូតដល់ ៦៩៥៦៩០០នាក់ ស្មើនឹង៨៣.០២ភាគរយ។ អត្រានៃការចូលរួមបោះឆ្នោតនេះ គឺខ្ពស់ណាស់បើប្រៀបធៀបជាមួយនឹងអត្រានៃការបោះឆ្នោតឃុំ សង្កាត់ ការបោះឆ្នោតជាតិ អាណត្តិមុន និងការបោះឆ្នោតនៅបណ្ដាប្រទេសអឺរ៉ុប ជាច្រើនផងដែរ។ គណបក្សប្រជាជនកម្ពុជា ដែលបានឈ្នះ១២៥ អាសនៈ ដោយទទួលបានសំឡេងគាំទ្ររហូតដល់ទៅ៧៦,៧៨ភាករយ គឺអនុវត្តតាមវិធីសាស្ត្របែងចែកអាសន ដែលបានអនុម័តក្នុងឆ្នាំ២០១៤ ដោយមានការចូលរួមពីអតីតគណបក្សប្រឆាំងផងដែរ។ ចំនួនអ្នកចូលរួមបោះឆ្នោត មានអត្រាខ្ពស់នេះ បានផ្ដល់ភាពស្របច្បាប់មិនអាចប្រកែកបានចំពោះសន្លឹកឆ្នោត និងលទ្ធផលដែលគណបក្សកាន់អំណាចទទួលបាន នឹងបានបញ្ជាក់ពីការគាំទ្រយ៉ាងលើសលប់ពីសំណាក់ប្រជាជន ចំពោះគណបក្សប្រជាជនកម្ពុជា។
ដូចដែលបានរំពឹងទុក សេចក្តីសម្រេចចិត្តរបស់សភាអឺរ៉ុប ដែលបានអនុម័តនេះ ផ្អែកទៅលើការអះអាងមិនពិត និងមិនស្មោះត្រង់ ពីក្រុមជ្រុលនិយមកម្ពុជា ដែលការពារដោយសហភាពអឺរ៉ុប និងផ្អែកលើរបាយការណ៍លម្អៀងទាំងឡាយ របស់គណបក្សប្រឆាំង និងអង្គការមិនមែនរដ្ឋាភិបាល ដែលមានរបៀបវារៈនយោបាយ។ ពាក្យពេចន៍ និងទម្រង់ប្រើក្នុងរបាយការណ៍ទាំងនេះ ពិតជាត្រូវបានចម្លងចេញពីប្រភពតែមួយ ហើយអ្វីដែលគួរឲ្យសោកស្ដាយបំផុត គឺពាក្យពេចន៍ទាំងនោះ ត្រូវបានគេបញ្ចូលនៅក្នុងសេចក្តីសម្រេចចិត្តរបស់សភាអឺរ៉ុបនាពេលនេះ។
រាជរដ្ឋាភិបាលកម្ពុជាបានលើកជាសំណួរថា ប្រសិនបើសេចក្តីសម្រេចនេះ កំណត់នូវស្តង់ដារសិទ្ធិមនុស្ស និងស្តង់ដារប្រជាធិបតេយ្យខ្ពស់ ដែលមិនអាចធ្វើបាន សូម្បីតែនៅក្នុងបណ្ដារដ្ឋជាសមាជិកសហភាពអឺរ៉ុប មួយចំនួននោះ តើសភាអឺរ៉ុបអាចរំពឹងពីការប្រតិបត្តិប្រកបដោយភាពល្អឥតខ្ចោះពីសំណាក់កម្ពុជាយ៉ាងដូចម្ដេច?
ទាក់ទងទៅនឹងលក្ខខណ្ឌ ដែលត្រូវបំពេញក្រោមកិច្ចព្រមព្រៀងអនុគ្រោះពន្ធ លើការនាំចេញគ្រប់មុខទំនិញទាំងអស់លើកលែងតែអាវុធ (EBA) សេចក្តីសម្រេចចិត្តនេះ មិនអើពើដោយចេតនា និងមិនយកចិត្តទុកដាក់ចំពោះកិច្ចខិតខំប្រឹងប្រែងដ៏គួរឲ្យកត់សម្គាល់ ពីសំណាក់រាជរដ្ឋាភិបាលកម្ពុជា ក្នុងការដោះស្រាយបញ្ហាដ៏ស្មុគស្មាញធ្ងន់ធ្ងរជាច្រើនដូចជាបញ្ហាដីធ្លី ឬការដាក់ចេញនូវបទប្បញ្ញត្តិសង្គម និងទំនាក់ទំនងរវាងនិយោជក និងនិយោជិត នៅក្នុងសង្គមមួយដែលមិនធ្លាប់ជួបប្រទះបញ្ហានេះពីមុនមក។
សេចក្តីសម្រេចចិត្តនេះ បានអំពាវនាវយ៉ាងអយុត្តិធម៌ ឲ្យមានការដាក់ទណ្ឌកម្មប្រឆាំងនឹងកម្ពុជា នៅពេលដែលបទឧក្រិដ្ឋកម្មធំៗជាច្រើនបានកើតមាននៅបណ្ដាប្រទេសដទៃទៀត ដែលអឺរ៉ុប កំពុងមានកិច្ចព្រមព្រៀងពាណិជ្ជកម្មជាមួយ ហើយកិច្ចព្រមព្រៀងទាំងនេះមានបទបញ្ញត្តិស្រដៀងគ្នាស្តីពីការគោរពសិទ្ធិមនុស្ស និងគោលការណ៍លទ្ធិប្រជាធិបតេយ្យ។ នៅចំពោះមុខប្រព្រឹត្តកម្មដោយលំអៀង និងមានស្តង់ដារពីររបស់សភាអឺរ៉ុបបែបនេះ តើអោយយើងយល់តម្លៃដល់សេចក្តីសម្រេចចិត្តបែបនេះយ៉ាងដូចម្ដេច ?៕
Source: Kampuchea Thmey Daily
0 Comments