ប្រធានាធិបតី​សហរដ្ឋអាមេរិក​លោក Donald Trump បាន​រិះគន់​អតីតរដ្ឋមន្ត្រី​ការបរទេស​លោក John Kerry សម្រាប់​កិច្ចប្រជុំ​របស់គាត់​ជាមួយ​រដ្ឋមន្ត្រីការបរទេស​អ៊ីរ៉ង់​បន្ទាប់ពី​អ្នក​ដែល​តែងតាំង​ដោយ​លោក Obama រូបនេះ​បាន​ចុះ​ចេញពី​តំណែង​។​
​
លោក Trump បាន​បង្ហោះ Twitter កាលពី​ល្ងាច​ថ្ងៃ​ព្រហស្បតិ៍​ថា “​លោក John Kerry បាន​ជួបប្រជុំ​ដោយ​ខុសច្បាប់​ជាមួយ​របប​របស់​ប្រទេស​អ៊ីរ៉ង់​ដែល​អាចជួយ​កាត់បន្ថយ​ការងារ​ដ៏​អស្ចារ្យ​របស់​យើង​ហើយ​ធ្វើ​ឲ្យ​ខូចខាត​ដល់​ប្រជាជន​អាមេរិក​”​។​
​
លោក Kerry ដែល​បាន​ចរចា​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ​២០១៥​ដែល​លោក Trump លុបចោល​នៅ​ឆ្នាំនេះ​បាន​និយាយ​ក្នុងអំឡុង​ដំណើរ​មួយ​ដើម្បី​ផ្សព្វផ្សាយ​សៀវភៅ​ថ្មី “Every Day is Extra” របស់គាត់​ថា គាត់​បាន​ជួប​រដ្ឋមន្ត្រីការបរទេស​អ៊ីរ៉ង់ Mohammad Javad Zarif បី​ឬ​បួន​ដង​ចាប់តាំងពី​គាត់​ចាក​ចេញពី​ការិយាល័យ​ហើយ​លោក Trump បាន​ចូល​សេត​វិមាន​។​
​
ដោយ​មិន​អត្ថាធិប្បាយ​អំពី​ភាពស្របច្បាប់​នៃ​កិច្ចប្រជុំ​បែប​នោះ​, រដ្ឋមន្ត្រីការបរទេស​អាមេរិក​លោក Mike Pompeo បាន​ចោទប្រកាន់​អតីត​អ្នក​កាន់តំណែង​មុន​របស់លោក​ថា​បានធ្វើ​ឲ្យ​ខូច​ដល់​គោលនយោបាយ​របស់​អាមេរិក​។​
​
លោក Pompeo ដែល​ត្រូវបាន​គេ​មើលឃើញថា​ជា​អ្នកប្រឆាំង​អ៊ីរ៉ង់​បាន​និយាយថា “​អ្វីដែល​លោក Kerry បានធ្វើ​គឺ​មិន​ធ្លាប់មាន​ពីមុន​និង​មិន​សមរម្យ​ទេ​។ នេះ​ជា​អតីតរដ្ឋមន្ត្រី​ក្រសួងការបរទេស​មួយរូប​ដែល​ពាក់ព័ន្ធ​នឹង​រដ្ឋ​ឧបត្ថម្ភ​អំពើ​ភេរវកម្ម​ធំ​បំផុត​របស់​ពិភពលោក​”​។​
​
ទោះបីជា​យ៉ាងណាក៏ដោយ អ្នកនាំពាក្យ​របស់លោក Kerry បាន​និយាយថា មិនមាន​អ្វីដែល​មិន​ត្រឹមត្រូវ​ទេ​អំពី​ការ​ប្រ​ព្រឹ​ត្ដរបស់​គាត់​។​
​
អ្នកនាំពាក្យ​រូបនេះ​បាន​និយាយ​នៅក្នុង​សេចក្តីថ្លែងការណ៍​មួយ​ថា “​លោក​រដ្ឋមន្ត្រី Kerry នៅតែមាន​ទំនាក់ទំនង​ជាមួយ​អតីត​សម​ភាគី​របស់គាត់​នៅ​ជុំវិញ​ពិភពលោក​ដូចជា​រដ្ឋមន្ត្រីការបរទេស​មុនៗ​ដែរ​”​។​
​
នៅពេល​សួរ​ដោយ​ពិធីករ​វិទ្យុ​អភិរក្ស​លោក Hugh Hewitt កាលពី​ថ្ងៃ​ពុធ​ថា​តើ​គាត់​បានទទួល​យោបល់​ពី​លោក Zarif អំពី​របៀប​ដោះស្រាយ​ជាមួយ​ការសម្រេចចិត្ត​របស់លោក Trump ក្នុងការ​ដកខ្លួន​ចេញពី​កតិកាសញ្ញា​ដែរ​ឬក៏​អត់​នោះ គាត់​បាន​ឆ្លើយថា “​ទេ វា​មិនមែនជា​ការងារ​របស់​ខ្ញុំ​ទេ​”៕ AFP

​

Source: Kampuchea Thmey Daily