អាជ្ញាកណ្ដាល​កម្ពុជា​២​នាក់​ចេញទៅ​ដឹកនាំ​ក្នុង​ប្រកួត​មិត្តភាព​អន្តរជាតិ​នៅ​ប្រទេស​ឥណ្ឌូណេស៊ី

អាជ្ញាកណ្ដាល​កម្រិត​អន្តរជាតិ​ដែល​ទទួលស្គាល់​ពី FIFA របស់​កម្ពុជា ចំនួន​២​រូប​គឺ​លោក លឹម ប៊ុនធឿន និង​លោក ស៊ុន ចាន់​ភា​រិ​ទ្ធិ បាន​ចេញទៅ​ដឹកនាំ​ក្នុង​ប្រកួត​មិត្តភាព​អន្តរជាតិ​នៅ​ប្រទេស​ឥណ្ឌូណេស៊ី រវាង​ក្រុម​ម្ចាស់ផ្ទះ​ជម្រើសជាតិ​ឥណ្ឌូណេស៊ី ទទួល​ក្រុម​ហុងកុង នៅ​ល្ងាច​ថ្ងៃ​អង្គារ ទី​១៦ ខែតុលា ឆ្នាំ​២០១៨ សប្ដាហ៍​នេះ​។

​ការប្រកួត​ដែល​ធ្វើឡើង​នៅលើ​ទីលាន​កីឡដ្ឋាន Stadion Wibawa Mukti ក្នុង​ទីក្រុង Cikarang ប្រទេស​ឥណ្ឌូណេស៊ី ក្រុម​ម្ចាស់ផ្ទះ​បាន​ប្រកួត​ស្មើគ្នា​ជាមួយ​ក្រុម​ហុងកុង ដោយ​លទ្ធផល​១​ទល់​១ ខណៈ​អាជ្ញាកណ្ដាល​ក្នុងការ​ប្រកួត​នេះ​ដឹកនាំ​ដោយ​លោក លឹម ប៊ុនធឿន របស់​កម្ពុជា ជា​អាជ្ញាកណ្ដាល​លើ​ទីលាន ខណៈ​លោក ស៊ុន ចាន់​ភា​រិ​ទ្ធិ របស់​កម្ពុជា​និង​លោក Takumi Takagi របស់​ជប៉ុន ជា​អាជ្ញាកណ្ដាល​ខ្សែបន្ទាត់ និង​លោក Hiroyuki Kimura របស់​ជប៉ុន ជា​មន្ត្រី​ទី​៤​។

សូម​បញ្ជាក់​ថា ​យោងតាម​វិ​ប​សាយ​របស់ FIFA កម្ពុ​ជាមាន​អាជ្ញាកណ្ដាល​ចំនួន​៩​រូប​ជាប់​ឈ្មោះ​ក្នុង​អាជ្ញាកណ្ដាល​កម្រិត FIFA នៅ​ឆ្នាំ​២០១៨​នេះ ដោយ​ក្នុងនោះ​មាន​៣​រូប​ជា​អាជ្ញាកណ្ដាល​លើ​ទីលាន ៥ រូប​ជា​អាជ្ញាកណ្ដាល​ខ្សែបន្ទាត់ ឬ ជំនួយការ​អាជ្ញាកណ្ដាល​និង​១​រូប​ជា​អាជ្ញាកណ្ដាល​កីឡាបាល់ទាត់​ក្នុង​សាល​។ ចំពោះ​អាជ្ញាកណ្ដាល​លើ​ទីលាន​ទាំង​៣​រូប​មាន​លោក ជី សាម​ឌី លោក ឃួន វីរៈ និង​លោក លឹម ប៊ុនធឿន ខណៈ​ជំនួយការ​អាជ្ញាកណ្ដាល​មាន​លោក ចេង ចាន់​តារា​, ឈី សុភាព​, គឹម ស៊ី​ពិសាល​, ស៊ុន ចាន់​ភា​រិ​ទ្ធិ និង​លោក ស៊ុន ដារ៉ាវុធ​។ ចំណែក​អាជ្ញាកណ្ដាល​សម្រាប់​កីឡាបាល់ទាត់​ក្នុង​សាល គឺ​លោក សៀង សុ​ភ័​ក្រ​។

​ជាទូទៅ​អាជ្ញាកណ្ដាល​កម្រិត​អន្តរជាតិ មានឱកាស​ចេញទៅ​ដឹកនាំ​ការប្រកួត​នៅ​ក្រៅ​ប្រទេស​ក្នុង​ដែន​សមត្ថកិច្ច​របស់​ស​ហ​ព័ន្ធ​កីឡាបាល់ទាត់​ទ្វីបអាស៊ី (AFC) ដោយ​ទទួលបាន​កម្រៃ​ខ្ពស់​ផងដែរ។ យ៉ាងណាក្តី​អាជ្ញាកណ្ដាល​ជើងចាស់​ចំនួន​២​រូប​គឺ​លោក ទុយ វិច្ឆិកា និង​លោក ថោង ច័ន្ទ​កិ​ត្យា បានសម្រេច​ចិត្ត​ដកខ្លួន​ពី​វាលស្មៅ ដោយ​មិនសូវមាន​ពេល​គ្រប់គ្រាន់​សម្រាប់​អាជីព​មួយ​នេះ​។ ចំណែក​អាជ្ញាកណ្ដាល​ទើប​ជាប់​ឈ្មោះ​នៅ​ឆ្នាំ​២០១៨ នេះ​មាន ស៊ុន ដារ៉ាវុធ​៕

Source: Kampuchea Thmey Daily