រតនគិរី ៖ ជនសង្ស័យម្នាក់ ត្រូវបាននគរបាលប៉ុស្តិ៍ឃុំតឺន ឃាត់ខ្លួនពាក់ព័ន្ធករណីចាប់រំលោភសេពសន្ថវៈ លើស្ត្រីម្នាក់បានសម្រេច។
ហេតុការណ៍នេះបានកើតឡើងកាលពីវេលាម៉ោង៣និង៣០នាទីរសៀល ថ្ងៃច័ន្ទ ១២រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៥ ខែវិច្ឆិកា ឆ្នាំ២០១៨ ត្រង់ចំណុចក្នុងចម្ការសណ្ដែកសៀងប្រហែល៥គីឡូពីផ្ទះ ស្ថិតនៅភូមិម៉ឺនថាំង១ ឃុំតឺន ស្រុកកូនមុំ។
អធិការរងទទួលផែនព្រហ្មទណ្ឌស្រុកកូនមុំ លោក ជា សារិទ្ធ បានឲ្យដឹងថា ជនរងគ្រោះឈ្មោះ ត.ញ.យ អាយុ២៦ឆ្នាំ ជនជាតិគ្រឹង រស់នៅភូមិឃុំកើតហេតុខាងលើ។ រីឯជនសង្ស័យឈ្មោះ ឈៀវ យ៉ាវ ភេទប្រុស អាយុ៤៤ឆ្នាំ ជនជាតិគ្រឹង។
លោកអធិការរងបានបន្តថា មុនពេលកើតហេតុជនសង្ស័យបានចាប់រំលោភស្ត្រីរូបនោះនៅវេលាម៉ោង៩ព្រឹក ថ្ងៃទី០៥វិច្ឆិកា បន្ទាប់មកបានចាប់រំលោភម្តងទៀតនៅម៉ោង០៣រសៀលនៅថ្ងៃខែដដែល។
លោកថា ស្ត្រីរងគ្រោះបានមកប្តឹងមេភូមិថា មានគេចាប់រំលោភសេពសន្ថវៈបានសម្រេចចំនួន២ដងមកហើយ ភ្លាមៗនោះដែរ លោកមេភូមិក៏បានរាយការណ៍មកប៉ុស្តិ៍នគរបាលរដ្ឋបាលឃុំតឺនចុះឃាត់ខ្លួនជនសង្ស័យ ហើយបញ្ជូនទៅអធិការនគរបាលស្រុកកូនមុំមកសាកសួរបំភ្លឺ និងឃុំខ្លួនបណ្ដោះអាសន្ន ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕
Source: Kampuchea Thmey Daily
0 Comments